Bələdiyyə seçkiləri yaxınlaşır: partiyalar mübarizəyə hazırlıqsızdır - Mövqelər
Tarix: 27-08-2019 17:55 | Bölmə: Slayd
Bələdiyyə seçkiləri yaxınlaşır: partiyalar mübarizəyə hazırlıqsızdır

Dekabrın 27-də Azərbaycanda bələdiyyə seçkiləri keçiriləcək. Əksər ölkələrdə maraqlı tərəflər belə tədbirlərə bir il əvvəlcədən hazırlaşsalar da, ölkəmizdə seçkinin keçirilməsinə dörd ay qalsa da, seçki əhval-ruhiyyəsi hiss olunmur.

Görəsən, Azərbaycanın siyasi qüvvələri bələdiyyə seçkilərinə necə hazırlaşır? Ümumiyyətlə, hansı partiyalar seçkidə iştirak edəcək?

Reyting.az-ın bu və ya digər suallarını siyasi partiyaların nümayəndələri cavablandırıblar.

Vətəndaş və İnkişaf Partiyasının sədr müavini Ramil Hüseynov deyib ki, bələdiyyə seçkiləri ilə bağlı partiyanın rəsmi qərarı yoxdur. Onun sözlərinə görə, çox guman ki, seçkidə iştirak etməməklə bağlı qərar veriləcək: "Bunun da obyektiv və subyektiv səbəbləri var. Ölkədə bələdiyyə qurumlarına olan munasibət musbət xarakterizə olunmur. Çox təəssüf ki, bu hakimiyyətin “əməyi” nəticəsində Azərbaycanda seçkilərə münasibət birmənalı olaraq mənfidir. Seçki sanki dənizkənarı parkda verilən konsert proqramı səviyyəsinə salınıb və vətəndaşlar bu tip proqramlarda iştrak etmək istəmirlər”.

R. Hüseynov qeyd edib ki, digər problem bələdiyyələrin statusu ilə bağlıdır. Xüsusən də kənd yerlərində bələdiyyə orqanları sanki lazımsız bir qurumdur, heç bir fəaliyyətə malik deyil: “Şəhər bələdiyyələri isə ancaq vətəndaşlardan guya bələdiyyə rüsumları toplamaqla məşğuldur. Lakin o rüsumların müqabilində vətəndaşa heç bir xidmət göstərilmir. Çünki bələdiyyələr icra orqanlarının vassalına çevrilib.

Bələdiyyənin qərarları, sərəncamları heç bir dövlət təşkilatı tərəfindən tanınmırsa, o bələdiyyə kimə və nəyə lazımdır? İcra hakimiyyətləri bələdiyyə sənədini tanımır, Əmlak Komitəsi bələdiyyə sənədini tanımır, baxmayaraq, bununla bağlı Prezidentin müvafiq sərəncamları var.

Bələdiyyədən alınan torpaq sahəsi üçün vətəndaş külli miqdarda vəsait ödəyir, amma digər qurumlar o sənədi qəbul etmir. Bu da ölkədə çox ciddi problemə çevrilib. Bələdiyyə sənədləri ilə verilən hansısa əmlakı Əmlak Komitəsi özəlləşdirmir. Ona görə də bu qurum sadəcə imitasiya xarakteri daşıyır. Bu tip davranışdan demək olar ki, butun dövlət qurumları yararlanır. Yəni, vətəndaşın hüquqları sanki öz axarına buraxılıb. Ancaq öz maraqlarını duşünürlər. Hesab edirik ki, bu problemlər aradan qalxmayınca, bələdiyyə seçkilərində iştrakın heç bir məntiqi sonluğu yoxdur. Seçki vətəndaşda o zaman maraq kəsb edir ki, ondan doğan nəticələrdən vətəndaş və dövlət xeyir görsun. Biz heç bir seçkidə belə nəticəni görmədik. Belə aqibətlə üzləşən vətəndaşların seçkilərdə fəallıq göstərməsi də qeyri-mümkündür".

Ədalət Partiyasının sədr müavini Mütəllim Rəhimli isə bildirib ki, seçkilərin mahiyyəti prizmasından yanaşılsa, bələdiyyə seçkilərinə o qədər də çox vaxt qalmayıb: "Əslində qeyri-rəsmi olaraq indidən seçkilərə başlamaq lazımdır. Lakin ölkəmizdə seçkilərin keçirilmə prosesində baş verən neqativ hallar insanların ona marağını, inamını və nəticələrinə etirbarını öldürüb. Ona görə də son vaxtlar keçirilən seçkilərin yalnız adı qalıb və insanların biganəliyi ilə müşahidə olunur. Belə olduğu üçün seçki komissiyaları icra hakimiyyətinin tapşırığını protokollara köçürməklə öz işlərini bitmiş sayırlar. Bütün bunlar siyasi partiyalara da təsirsiz ötüşmür. Üstəlik, bələdiyyələrin səlahiyyətsizliyi də bu quruma marağı azaldıb”.

M. Rəhimli qeyd edib ki, Ədalət Partiyası bələdiyyələrin nüfuzunun artırılması ilə bağlı dəfələrlə təkliflər versə də, nə hökumət, nə də Milli Məclis bu təklifləri nəzərə almayıb: “Düşünürəm ki, bütün bunlar bu il bələdiyyə seçkilərinin formal keçirilməsinə və yenə də icra hakimiyyətinin siyahısı əsasında onun formalaşmasına gətirib çıxaracaq. Bizdə bu arqumentlər və inam olsa da, hələlik seçkilərlə bağlı qərar verməmişik. Hər şey partiyanın Ali Məclisinin qərarından, partiya üzvlərinin fikir və iradəsindən asılı olacaq.

Şəxsən mənə gəldikdə, düşünürəm ki, səlahiyyəti, təsiri, nüfuzu olmayan bir quruma seçki adı altında həyata keçirilən təyinata güc və enerji sərf etmək mənasızdır. İndi xalq siyasi qüvvələrdən tamamilə fərqli addımlar və yeniliklər gözləyir".

AXCP-dən ayrılaraq eyni adlı qurum yaradan siyasi təşkilatın mətbuat xidmətinin rəhbəri Vüsal Qarayev isə bildirib ki, istənilən seçkidə iştirak hər bir siyasi partiyanın prioriteti olmalıdır:

"Biz ilk gündən bələdiyyə seçkilərinə fokslanmışıq. Hazırda fəaliyyətimizin əsasını bu təşkil edir. Baxmayaraq ki, hazırda cəmiyyətdə bələdiyyə seçkilərinə münasibət, reaksiya olduqca aşağıdır, sönükdür... Buna səbəb seçkilərin şəffaflığına inamsızlıqla yanaşı, həm də bələdiyyələrin ölkədə söz sahibi olmamasıdır. Bələdiyyələrin səlahiyyətləri artırılmalı, bələdiyyələr müstəqil olmalı, bələdiyyələr icra hakimiyyətlərinin şöbəsi olmaqdan çıxarılmalı və seçkilər şəffaf keçrilməlidir. Yalnız bu zaman biz normal, çəkişməli, rəqabətli, maraqlı seçkinin şahidi ola bilərik. Amma, istənilən halda düşünürəm ki, kimsə yaxasını geri çəkməməlidir. Biz seçkidə iştirak edib, səsimizi qorumağa çalışmalıyıq ki, istədiyimiz sivil seçkilərə doğru addım-addım irəliləyə bilək. Hər kəs çəkilib bir kənarda dursa, ölkədə heç nə dəyişməyəcək".

AMİP Siyasi Şurasının üzvü Əli Orucov isə düşünür ki, bu il bələdiyyə seçkiləri ili olmasına və vaxtın daralmasına baxmayaraq, ölkədə seçki ab-havası yoxdur. Onun sözlərinə görə, müxalifət partiyaları da bu seçkilərə həvəs göstərmirlər: "Bunun başlıca səbəbi ondan ibarətdir ki, Azərbaycanda seçki sistemi sıradan çıxarılıb və formal xarakater alıb. Şəxsən mən 10-dan çox rayonda həm AMİP-in yerli təşkilatları ilə, həm də sakinlərlə görüşlərimdə bələdiyyəyə və bələdiyyə seçkilərinə münsibətin xoş olmadığını gördüm. Bununla belə, hesab edirəm ki, bədbinliyə qapalıb, əlimizi-qolumuzu sallayıb, möcüzə qözləməyimiz də yanlışdır. Ölkədə demokratik seçki möcüzəsini xalqla birlikdə yaratmalıyıq”.

Ə. Orucov AMİP-in boykot tərəfdarı olmadığını da diqqətə çatdırıb: “Bu seçkilərdə də mütəşəkkil qaydada iştirakımız gözləniləndir. Lakin son qərarı partiyanın seçkili qurumları verəcək. Üzərimizə düşən hazırlıq işlərini isə davam etdiririk. Potensial namizədlərin müəyyənləşdirilməsi, seçkilərə qatılacaq könüllülərin təşkili, maliyyə resursları və sair diqqət mərkəzindədir. Bununla bahəm çalışırıq ki, seçkiyədək seçki mühitinin əlverişli hala gətirilməsi üçün müxalif düşərgədəki dost və müttəfiqlərimizlə işimizi daha da genişləndirək. Ümid edirəm ki, seçkiyədək ölkədə və regionda müsbətə doğru çox şeylər dəyişəcək".

Z. ƏHMƏD
Reyting.az
скачать dle 10.5фильмы бесплатно




Bölməyə aid digər xəbərlər
{sape_links}{sape_article}