Prezident yanında QHT-lərə Dövlət Dəstəyi Şurasının dəstəyi ilə Beynəlxalq Münasibətlərin Araşdırılması Mərkəzi "Yeni hədəflərə doğru” vətəndaş həmrəliyinin gücləndirilməsi layihəsinin icrasına başlayır.

Reyting.az Azadinform-a istinadən xəbər verir ki, Azərbaycanın son zamanlar həyata keçirdiyi genişmiqyaslı və fundamental islahatlara vətəndaş cəmiyyəti tərəfindən zəruri dəstəyin təmin olunması formalarının öyrənilməsi, həmçinin praktiki səviyyədə nəzərdən keçirilməsi layihənin əsas ideyasıdır. Həmçinin, islahatlar nəticəsində əldə edilən nailiyyətlərin ictimaiyyət arasında təbliği sahəsində aparılan maarifləndirmə işlərini gücləndirməkdən ibarətdir.

QHT-lərə Dövlət Dəstəyi Şurasının üzvü, Beynəlxalq Münasibətlərin Araşdırılması Mərkəzinin (BMAM) sədri, politoloq və layihənin rəhbəri Rufiz Qonaqov bildirib ki, layihənin həyata keçirilməsində müəyyən istiqamətlər seçilmiş, qrafikə uyğun olaraq, müəyyən olunmuş istiqamətlər sahəsində 3 konfrans keçiriləcək. Layihə ilə eyni adlı - "Yeni hədəflərə doğru” vətəndaş həmrəliyinin gücləndirilməsi konfranslarında QHT təmsilçilərinin, gənclərin, mətbuat nümayəndələrinin iştirakı planlaşdırılır. Konfranslar Bakı, Gəncə və Quba şəhərlərində keçiriləcək. Konfranslarda sosial, iqtisadi, siyasi və s. Islahatlar, bu islahatların əhəmiyyəti, genişmiqyaslı islahatların vətəndaş cəmiyyətinin inkişafındakı rolu və cəmiyyətin həyata keçirilən islahatların icrasına münasibəti müzakirə olunacaq. 3 ay müddətinə həyata keçirilən layihə zamanı müxtəlif internet aksiyalar da təşkil olunacaq”.

R.Qonaqov qeyd edib ki, layihənin həyata keçirilməsi ilə ictimaiyyət siyasi sistemin həyata keçirdiyi sosial, iqtisadi, siyasi və s. islahatlarla daha yaxından tanış olacaq: "Keçirilən genişmiqyaslı islahatlar vətəndaş cəmiyyəti birlikləri, həmçinin individual şəxslər arasında daha da effektiv formada təbliğ olunacaq və vətəndaş cəmiyyəti ilə siyasi institutlar arasında qərarların qəbul edilməsi və icra mexanizmində yeni əlaqələrə nail olunacaq”.

Reyting.az