Qəbul imtahanlarının nəticələri ilə əlaqədar yaradılmış Apellyasiya Komissiyasına müraciətlər abituriyentlərin xeyrinə həll edilib.

Reyting.az bildirir ki, Tələbə Qəbulu üzrə Dövlət Komissiyasından (TQDK) publika.az-a verilən məlumata görə, 23 iyul 2016-cı il tarixində ali təhsil müəssisələrinə II ixtisas qrupu üzrə keçirilmiş qəbul imtahanında A və C variantlarında coğrafiya fənni üzrə istifadə edilən 75 saylı test tapşırığı açıq tiplidir və uyğunluğun müəyyən edilməsi tələb olunur.

Test tapşırığı elmi-metodiki baxımdan doğrudur və ümumtəhsil məktəblərində istifadədə olan VIII sinif "Coğrafiya" dərsliklərinə əsaslanır.

Qəbul imtahanında yüksək bal toplayan və bu tapşırığı cavablandıran 17 abituriyent test tapşırığının həllində IX sinif dərsliyi ilə VIII sinif dərslikləri arasındakı incə bir fərqi də dərindən təhlil edərək, bununla bağlı Apellyasiya Komissiyasına müraciət ediblər. Apellyasiya Komissiyası tərəfindən bu məsələ araşdırılıb və müraciət edənlərin xeyrinə həll edilib.

Qeyd olunduğu kimi, test tapşırığı açıq tiplidir və Apellyasiya Komissiyasının qərarı yalnız ona düzgün cavab verən abituriyentlərə şamil olunur.