Nəriman Qasımoğlu: "İslamın 5 şərtinə yenidən baxmağı təklif edirəm"
Tarix: 18-03-2023 19:05 | Bölmə: Cəmiyyət
Nəriman Qasımoğlu: "İslamın 5 şərtinə yenidən baxmağı təklif edirəm"

"Ötən əsrin 90-cı illərində Azərbaycan cəmiyyətində İslam dininin yerinin və rolunun müəyyənləşdirilməsi konsepsiyasını hazırlayıb ictimaiyyətə təqdim etmişdim".

Bunu Reyting.az-a tanınmış şərqşünas alim, Din və Demokratiya Mərkəzinin rəhbəri Nəriman Qasımoğlu deyib.

N. Qasımoğlu əlavə edib ki, sözügedən konsepsiyanın müddəalarından biri cəmiyyətimizin inanclı kəsiminə ünvanlı olaraq ənənəvi dindarlığın beş şərtinə - kəlməyi şəhadət, namaz, oruc, zəkat və həccə yenidən baxılması təklif olunurdu:

"Əlbəttə, təklifimiz ənənəvi şərtlərin aradan qaldırılmasını nəzərdə tutmurdu. İnanclılara aşılanırdı ki, ibadət şərtləri sırasında birinciliyi elmlənməyə, təhsillənməyə versinlər. Yəni şərti olaraq dünyəvi deyilən elm, təhsil (Oxu mətni dini-dünyəvi bölgünü tamamilə istisna edir!) inanclı kəsim üçün də prioritet olsun. Oxumağa istinad edən təklif idi. Çünki, ilk enən, Tanrıya təslimiyyəti seçənlərə ilk göstəriş, ilk yönəltmə, ilk təlqin, ilk buyuruq "Oxu!" əmridir. Qalan mətləblər sonra gəlməlidir, Quran məntiqinə görə".

Alim bildirib ki, idealist düşüncəsində qalır: "Elmlənmə, təhsillənmə Tanrıya ən üstün ibadət borcu kimi qəbul edilsə, "müsəlman"lıq Quran tələbi ilə ənənəviliyindən əl çəkib mahiyyətini ilk enən ayədəki "Oxu!"ya uyğunlaşdırsa, təsəvvür etmək çətin deyil, bəlli coğrafiyanın insan potensialı dünyada hansı heyrətamiz dəyişikliklər, hansı yeni sivilizasiya yaradar".

ELÇİN




Bölməyə aid digər xəbərlər
21-02-2024, 12:24 Sabah yağış yağacaq

{sape_links}{sape_article}