Rusiyanın Moskva şəhərində hərbçi generala sui-qəsd ediblər. Hakimiyyət orqanları hücumdan sonra generalın xəstəxanaya yerləşdirildiyini bildirib.

Reyting.az xəbər verir ki, hadisə Rusiya ordusunun yüksək rütbəli üzvlərini hədəf alan sui-qəsd cəhdlərinin son nümunəsi hesab olunur.

İstintaq Komitəsinin açıqlamasında bildirilir ki, sui-qəsdə məruz qalan şəxs Rusiya Baş Qərargahının generalı Vladimir Alekseyevdir.

İstintaq Komitəsi şübhəlilərin şəxsiyyəti ilə bağlı heç bir məlumat paylaşmayıb.

Xatırladaq ki, Rusiya 2022-ci ilin fevral ayında Ukraynaya qarşı genişmiqyaslı hərbi əməliyyata başladığı vaxtdan bəri, çoxsaylı yüksək rütbəli hərbi məmurlar onları hədəf alan hücumlarda öldürülüb. Kiyev administrasiyası bu hücumların bəzilərinə görə məsuliyyəti öz üzərinə götürüb.

Bioqrafiyasına görə, peşəkar hərbçi olan Alekseyev Rusiya Baş Qərargah rəisinin birinci müavini vəzifəsində çalışıb. Alekseyev Rusiyanın Bəşər Əsəd rejimini dəstəkləmək üçün Suriyaya hərbi müdaxiləsi zamanı kəşfiyyat əməliyyatlarına rəhbərlik edib.

Bildirilir ki, Alekseyevə 2023-cü ildə “Vaqner”in rəhbəri Yevgeni Priqojinin Rusiya hərbi rejiminə qarşı rəhbərlik etdiyi üsyan zamanı danışıqlar aparmaq tapşırılıb.

V. QULİYEV