Fransada son illər doğum nisbəti sürətlə azalır. Fransa Milli Assambleyasının tərkibindəki xüsusi komissiya 11 fevral 2026-cı ildə əhali artımının kəskin azalmasına qarşı diqqətəlayiq təklif təqdim edib.

Reyting.az xəbər verir ki, Fransanın mövcud ailə müavinəti sistemi artıq öz məqsədinə xidmət etmir və əhali artımının azalmasını dayandıra bilmir. Bu səbdən köklü bir dəyişiklik təklif olunur: “Versement Familial Unique-VFU”.

Təklif olunan yeni sistem, ilk uşaqdan başlayaraq, gəlirindən, uşaq sayından və ya yaşından asılı olmayaraq hər ailəyə aylıq 250 avro ödəniş etməyi nəzərdə tutur. Bundan əlavə, ailələrə faizsiz mənzil kreditləri kimi müxtəlif maliyyə üstünlüklərinin verilməsi də planlaşdırılır.

Hesabatda, xüsusən də aşağı və orta gəlirli ailələrin artan yaşayış xərcləri səbəbindən uşaq sahibi olmaq qərarını təxirə saldığı vurğulanır. Yeni model iqtisadi narahatlıqları azaltmağı və doğum nisbətlərinin bərpasını stimullaşdırmağı hədəfləyir.

İslahat mövcud klassik ailə müavinətlərini, dövlət işçilərinə verilən ailə əlavəsini və mənzil müavinətlərindən biri olan ALF-ni vahid sistem altında bir araya gətirməyi hədəfləyir. Beləliklə, hər kəs üçün daha sadə və ədalətli bir struktur yaratmaq planlaşdırılır.

Hələlik məcburi qərar olmayan hesabat parlamentə təqdim edilib. Ekspertlər isə hesab edirlər ki, bu iş hökumətin yaxın aylarda konkret addımlar ata biləcəyinə dair güclü bir göstəricidir.

Fransada demoqrafik azalmaya qarşı atılacaq addımların təkcə sosial siyasətə deyil, həm də ölkənin uzunmüddətli iqtisadi və sosial gələcəyinə birbaşa təsir edəcəyi gözlənilir.

V. QULİYEV