Şimali Kipr Türk Respublikasında (ŞKTR) müəssisələrə atəş açmaq və şantaj hadisələrinə görə beynəlxalq axtarışda olan “Kasper” mütəşəkkil cinayətkar qrupun lideri “Emmi” kod adlı Mehmet Kurtoğlunun diplomatik nömrə nişanlı nəqliyyat vasitəsində ölkədən qaçaqmalçılıq yolu ilə çıxarılması iddiası Türkiyə təhlükəsizlik qüvvələrini səfərbər edib.

Reyting.az xəbər verir ki, ŞKTR-də çoxsaylı silahlı hücumlar və təhdidlərin törədicisi kimi axtarılan Kurtoğlu Rumıniyada saxlanılıb.

Rumıniya hakimiyyəti tərəfindən Bolqarıstana təhvil verilən Kurtoğlu Bolqarıstandan Türkiyəyə deportasiya edilib. Yanvarın 10-da saxlanılan Kurtoğlu polisə verdiyi ifadədə qaçış prosesini ətraflı təsvir edib.

Kurtoğlu İstanbuldan Ədirnəyə lisenziyasız taksi ilə gətirildiyini və bir gecə şəhər mərkəzindəki apart-oteldə qaldığını bildirib. O, ertəsi gün Ədirnə Yeni Sənaye Sahəsinin 29-cu blokunda yerləşən avtomobilyuma müəssisəsinə aparıldığını və orada bir müddət gözlədildiyini deyib.

Daha sonra Vyetnam Sosialist Respublikasının İstanbuldakı Baş Konsulluğuna məxsus diplomatik nəqliyyat vasitəsinə üç nəfərlə birlikdə aparılıb. Beləcə, diplomatik nömrə nişanlı nəqliyyat vasitəsinin baqajında ölkədən qaçaqmalçılıq yolu ilə çıxarılıb. O, Bolqarıstana keçdikdən sonra Rumıniyaya gedib.

Kurtoğlunun açıqlamasından sonra Ədirnə polisi genişmiqyaslı araşdırmaya başlayıb. Apart-otel və avtomobilyuma məntəqəsindən təhlükəsizlik kamerasındakı görüntülər araşdırılıb. Texniki təhlillər nəticəsində məlum olub ki, sözügedən avtomobil Vyetnamın İstanbuldakı Baş Konsulluğuna məxsus diplomatik nəqliyyat vasitəsidir. Həmçinin, nəqliyyat vasitəsinin 23 yanvar - 1 fevral tarixləri arasında Kapıkule vasitəsilə Bolqarıstana və Pazarkule Gömrük Qapısı vasitəsilə Yunanıstana çoxsaylı giriş-çıxış etdiyi müəyyənləşib.

İstintaqa Kurtoğlunun İstanbuldan Ədirnəyə daşınmasında iştirak etdiyi iddia edilən saxta taksi sürücüsü və Ədirnədə onun gizlədilməsi və qaçaqmalçılığına kömək etməkdə şübhəli bilinən bir neçə nəfər saxlanılıb.

Şübhəlilərin diplomatik toxunulmazlıqdan istifadə edərək əməliyyatda fəal rol oynadıqları güman olunur.

Hadisənin diplomatik nəqliyyat vasitəsindən istifadə iddiası səbəbindən beynəlxalq miqyas aldığı, müvafiq konsulluq nəqliyyat vasitəsi və personalı ilə bağlı inzibati və məhkəmə araşdırmalarının başlandığı bildirilir.

V. QULİYEV