İlham Əliyev toydakı dəhşətli partlayışla bağlı Türkiyə prezidentinə başsağlığı verib
Tarix: 21-08-2016 12:42 | Bölmə: Gündəm


Azərbaycan prezidenti İlham Əliyev Qaziantep vilayətində toy mərasimi zamanı törədilmiş dəhşətli partlayış nəticəsində çoxsaylı insan tələfatı ilə bağlı Türkiyənin dövlətinin başçısı Rəcəb Tayyib Ərdoğana başsağlığı verib.

Reyting.az-ın xəbərinə görə, başsağlığında deyilir:

"Hörmətli cənab Prezident,

Əziz Qardaşım,

Qaziantep vilayətində toy mərasimi zamanı törədilmiş dəhşətli partlayış nəticəsində çoxsaylı insan tələfatı və yaralananlar barədə xəbər bizi olduqca sarsıtdı.

Biz bu amansız terror əməlindən, ölkənizdə xaincəsinə törədilmiş digər terror aktlarından son dərəcə hiddətlənir, terrorizmin bütün təzahürlərinə qarşı hamılıqla, qətiyyətlə və ardıcıl mübarizə aparılmasını vacib və zəruri hesab edirik.

Bu faciə ilə əlaqədar Sizə, həlak olanların ailələrinə və yaxınlarına, bütün qardaş Türkiyə xalqına şəxsən öz adımdan və Azərbaycan xalqı adından dərin hüznlə başsağlığı verir, yaralananlara şəfa diləyirəm.

Allah rəhmət eləsin!"

 





Bölməyə aid digər xəbərlər
{sape_links}{sape_article}