Beş yaşından peşəkar səhnədə… - Turan Etibaroğlu yazır
Tarix: 05-06-2019 13:55 | Bölmə: Mədəniyyət
Beş yaşından peşəkar səhnədə…

Gənc Xədicənin zərif çiyinlərinə ağır və məsuliyyətli bir yük düşüb. O, ailə ənənəsini uğurla davam etdirməlidir. Mənsub olduğu nəsil uzun illərdir ki, Azərbaycan mədəniyyətinin inkişafına şərəflə xidmət göstərir. Xədicə xanımın ana babası tanınmış rejissor və aktyor, əməkdar mədəniyyət işçisi Məmmədkamal Kazımovdur. Mərhum Məmmədkamal müəllim bu gün də sevilə-sevilə baxılan bədii filmlərimizdə, televiziya tamaşalarında maraqlı rollar yaradıb. Bir müddət Ağdam Dövlət Dram Teatrının baş rejissoru olub, ölkənin müxtəlif teatrlarında tamaşalara quruluş verib.

Gənc aktrisanın atası Sahib Novruzov tanınmış pedaqoqlardandır, illərdir ki, Mədəniyyət və İncəsənət Universitetində dərs deyir.

Beş yaşından peşəkar səhnədə…

Xədicənin anası Vəfa xanım uzun müddət Mədəniyyət Nazirliyində məsul vəzifədə çalışıb, “Dövlət qulluğunda fərqlənməyə görə” medalı ilə təltif edilib.

Xədicə Novruzlu 1995-ci il iyunun 23-də məhz belə bir ailədə dünyaya gəlib, kiçik yaşlarından valideynləri ilə birgə tez-tez teatr tamaşalarına baxıb, evdə aparılan sənət söhbətlərini, müzakirələri dinləyib. Üstəlik, əksər yaşıdlarından fərqli olaraq səhnəyə çıxaraq, görkəmli sənət adamlarının iştirakı ilə hazırlanan tamaşalarda epizodik rollar oynayıb. Və onu tanıyanların gözlədiyi kimi, 2013-2018-ci illərdə Azərbaycan Dövlət Mədəniyyət və İncəsənət Universitetinin “Dram və kino aktyoru” fakültəsində təhsil alıb.

Xədicə təhsil aldığı Azərbaycan Dövlət Mədəniyyət və İncəsənət Universitetinin səhnəsində “Zorən təbib”də Martina, "Hacı Qara"da Sona, “Antiqona”da Antiqona, “Adi möcüzə”də Şahzadə, “Cəhənnəm sakinləri”də Qadın, “Dəli yığıncağı”nda Sona, “Kimdir müqəssir”də Bahar rollarını oynayıb.

Beş yaşından peşəkar səhnədə…

Sənət müəllimləri Sona Mikayılova, Azad Şükürov, Nadir Hüseynov, Ayan Mirqasımova, Gümrah Ömərov hər zaman gənc-aktrisanın istedadına inanıb, daima onun üzərində çalışıblar və Xədicədə müəllimlərinin ümidini hər zaman doğrudub.

Bayaq xatırlatdığımız kimi, Xədicə hələ 5 yaşında olanda ilk dəfə peşəkar səhnəyə çıxıb. 2000-ci ildə Akademik Dövlət Milli Dram Teatrında Xalq yazıçısı, görkəmli dramaturq Elçinin “Mənim ərim dəlidir” əsərinə quruluş verən Xalq artisti Azər Paşa Nemətov Xədicəyə Qonşu qız rolunu tapşırır və gələcəyin aktrisası səhnədə debüt edir. İlk rolun ayağı düşərli olur və orta məktəb şagirdi Xədicə Novruzlu bu sənət məbədində bir-birinin ardınca rollar oynayır.

Son illər tamaşaçılar onu “Müsyö Jordan və dərviş Məstəlişah”da Gülçöhrə, "Qürbətdən gələn məktublar”da Dilənçi uşaq, "İkinci səs"də İradə, "Alın yazısı”nda İlisu, “Xəcalət”də Fəridə, “Kabuslar”da İbnə bacı, “Qaraca qız”da Tutu xanım, “Danışan gəlincik” Tıx-tıx xanım, “Əlibaba və qırx quldur”da Mərcan, “Şah Qacar”da Qacarın ilk sevdiyi qız, “Ölülər”də Nazlı, “Çipollino”da Çipollino, “Buzlar ölkəsi”ndə Balaca Cırtdan, “Biri var idi, biri yox idi”də Nağılçı, Mərcan,“Bir, iki, bizimki”ndə Qız, “Ah, bu uzun sevda yolu”nda Gülər obrazlarında görüb və dəyərləndiriblər. İstedadlı aktrisa 2002 – 2011-ci illərdə “Lider” telekanalında efirə gedən “Dan ulduzu” yarışmasının aparıcısı olub, bu illərdə 2 bədii filmə də çəkilib.

Beş yaşından peşəkar səhnədə…

Akademik Milli Dram Teatrının aktyor truppasının yardımçı heyətində çalışan Xədicə Novruzlu kollektivlə birgə Gürcüstanda, Serbiyada, Moldovada, Rusiyanın Dağıstan Respublikasında qastrol səfərlərində olub, əcnəbi tamaşaçıların alqışını qazanıb. Krımda keçirilən “Teatr. Çexov. Yalta”, Belarusun Brest şəhərində ənənəvi təşkil olunan “Belaya veja” teatr festivallarında uğurla iştirak edib.

Xədicə Novruzlu 2012-ci ildə Azərbaycan Respublikası Gənclər və İdman Nazirliyinin təsis etdiyi “İlin ən gənc aktrisası” nominasiyasının qalibi olub. 2015-ci ildə Azərbaycan Respublikasının Prezidenti İlham Əliyevin imzaladığı sərəncamla “Gənclər üçün Prezident mükafatı”na layiq görülüb.

Beş yaşından peşəkar səhnədə…

İnanırıq ki, istedadlı aktrisa Xədicə Novruzlu bu uğurlara kifayətlənməyəcək, gələcəkdə daha böyük mükafatlar qazanacaq. Mənsub olduğu nəslin ənənəsini şərəflə davam etdirəcək.(Manera.az)

Turan ETİBAROĞLU
скачать dle 10.5фильмы бесплатно




Bölməyə aid digər xəbərlər
{sape_links}{sape_article}