Sərdar Cəlaloğlu: “Dağlıq Qarabağa status verilməsi gələcək nəsillərə yeni problem saxlamaq deməkdir”
Tarix: 16-10-2020 19:02 | Bölmə: Slayd
Sərdar Cəlaloğlu: “Dağlıq Qarabağa status verilməsi gələcək nəsillərə yeni problem saxlamaq deməkdir”

“Hər bir azərbaycanlı əvvəlcədən bilirdi ki, bu haqlı mübarizəmizdə qalib gələcəyik. Ermənilər Azərbaycan Ordusunun qarşısında durmağa qadir deyil. Amma çox təəssüflər olsun ki, arada Rusiya təşəbbüs irəli sürərək atəşkəs oyunu oynadı. Bu səbəbdən də proseslər bir qədər gecikdi. Əks halda bu addımlar oktabrın ortalarında başa çata bilərdi. Açığı, ermənilərin bizə uzun müddət müqavimət göstərmək və dirənmək üçün nə şansı, nə imkanı, nə də resursları var”.

Bu fikirləri Reyting.az-a Azərbaycan Demokrat Partiyasının sədri Sərdar Cəlaloğlu Azərbaycan Ordusunun Qarabağda apardığı anti-terror əməliyyatlarından danışarkən deyib.

S. Cəlaloğlunun fikrincə, Moskvada humanitar atəşkəs razılaşdırıldıqdan sonra ermənilər səhv edərək rusları pis vəziyyətə salıb: “İndi müharibə, ərazilərimizin işğaldan azad edilməsi prosesi davam edir. Mən ordumuzun addımlarını, yeridilən siyasəti yüksək qiymətləndirirəm. Çalışmaq lazımdır ki, mümkün qədər müharibədən az itki ilə çıxaq. Sözsüz ki, verdiyimiz itkilər hesabına da dövlət suverenliyini bütün Azərbaycan ərazilərində təmin etməliyik. İmkan verməyək ki, bu problem gələcək nəsillərə qalsın”.

S. Cəlaloğlun qeyd edib ki, son dövrlər həmsədrlər və bəzi diplomatlar atəşkəs çağırışı edir, Qarabağa status verilməsi haqqında fikirlər səsləndirir: “Dağlıq Qarabağa status verilməsi gələcək nəsillərə yeni problem saxlamaq deməkdir. O zaman Kommunist Partiyası Dağlıq Qarabağa status verdi və indi yaşayan nəsillər bunun ağrısını çəkir. İndi biz yenidən status məsələsinə razılaşsaq 30 ildən sonra yenidən münaqişələr yarana, qan tökülə bilər. Odur ki, problemi kökündən həll etmək lazımdır. Dövlətlərin süveren bərabərliyi beynəlxalq hüquqdur. Heç bir ölkə öz ərazisində zorakılıqla etnik azlığa status vermirsə, Azərbaycan da verməməlidir. Mənim net mövqeyim belədir. Ona görə də, ərazilərimizi düşməndən azad edənə, axırıncı terrorçu orada qalana qədər mübarizəmiz davam etməlidir”.

“Yalnız ordumuz vuruşmur. Bu müharibə böyük bir cəbhəni əhatə edir. Bura ordumuz, diplomatiya, siyasət, informasiya və təbliğat işləri də daxildir”, - deyən S. Cəlaloğluna görə, bütün cəbhə boyu mübarizə gedir: “Şükür olsun ki, ordumuzun əldə etdiyi naliyyətlərlə bərabər diplomatiyamız və təbliğatımız da inkişaf edir. Hesab edirəm ki, diplomatiyamız bir qədər də fəallaşmalıdır”.

Reyting.az




Bölməyə aid digər xəbərlər
bütün xəbərlər
{sape_links}{sape_article}