Azərbaycanda diplomların tanınması üçün rüsumu 20 dəfə artırıblar
Tarix: 03-05-2021 12:44 | Bölmə: Slayd
Azərbaycanda diplomların tanınması üçün rüsumu 20 dəfə artırıblar

“Təhsil Nazirliyinin tabeliyindəki Təhsildə Keyfiyyət Təminatı Agentliyi xarici ölkələrdə təhsil almış şəxslərin Azərbaycanda diplomunun tanınması və ekvivalentliyinin müəyyənləşdirilməsi üçün 250 manat rüsum müəyyənləşdirilib”.

Bunu Reyting.az-a təhsil üzrə ekspert Kamran Əsədov deyib. K. Əsədov bildirib ki, bu rüsum həmin diplomun araşdırılması üçün tələb olunan xərclər müqabilində ortaya çıxır:

“Qeyd edim ki, bu məbləğ 2021-ci ildə artırılıb. Buna qədər müvafiq xidmətin göstərilməsi üçün 50 manat, ondan əvvəlki illərdə isə 15 manat tələb olunurdu. Baxsaq görərik ki, 1 il ərzində diplomların tanınması üçün tələb olunan məbləğ 20 dəfəyə qədər artırılıb. Bu da kifayət qədər yüksək artımdır. Doğrudur, insanlar bu məbləği ödəyirlər, amma dünya təcrübəsinə baxsaq məsələn, Türkiyədə bu xidmətin göstərilməsi 35 manat, Gürcüstanda 20 manatdır. Yəni dünyanın müxtəlif ölkələrində qeyd olunan xidmətin göstərilməsi üçün tələb olunan məbləğ Azərbaycandan dəfələrlə ucuzdur”.

Ekspert qeyd edib ki, Təhsildə Keyfiyyət Təminatı Agentliyi (TKTA) publik hüquqi şəxsdir və xərclərini daxil olan vəsait hesabına ödəyir:

“Amma bütün hallarda bu, yüksək məbləğdir. Kifayət qədər insan Azərbaycandan kənarda təhsil alır və hər il ən azı 15-17 min nəfər diplomun tanınması üçün müraciət edir. Deməli, bu məbləğ böyükdür və azaldılması labüddür. Digər tərəfdən, əməkdaşların əməkhaqlarının müəyyən qismi də dövlət tərəfindən ödənilir. Təbii ki, xərclər müəyyənləşdirilir, 250 manatlıq xidmətə həmin şəxsin sərhəd keçib, keçməməsi barədə sorğu, həmin diplomun müvafiq ali təhsil müəssisəsi tərəfindən verilməsinin müəyyənləşdirilməsi daxildir.

Qeyd edim ki, Azərbaycanda sərhəd xidməti fəaliyyət göstərir və bu quruma göndərilən sorğu ödənişsiz cavablandırılır. TKTA sərhəd sorğusu üçün maksimum poçt xidmətinə görə ödəniş edə bilər, bu da böyük məbləğ deyil”.


K. Əsədov

Ekspert əlavə edib ki, Prezidentin sərəncamından sonra, 2011-ci ildən etibarən ölkədə dövlət müəssisələri xidmətlərini elektronlaşdırıblar: “Yəni kağızdaşıyıcı olmadan belə müvafiq quruma sorğu göndərmək olur və bunun üçün pul ödənilmir.

İkincisi, ali təhsil müəssisəsinə, məsələn, Ukrayna, Gürcüstan və ABŞ-a həqiqətən həmin diplomun verilib-verilməməsini yoxlamaq üçün email ünvanlarına elektron qaydada sorğu göndərirsiniz. Demək, müraciət edən şəxsin sərhəd keçib-keçməməsi, eyni zamanda ali təhsil müəssisəsi ilə bağlı informasiyanı pulsuz alırsınız. Burada yalnız əməkdaşların xidmətə görə sərf etdiyi vaxt, bunun əməkhaqqı var.

Bir də müraciət edən şəxsin sərhədi keçməsi qanunvericilik tələbinə uyğundursa, diplom normal qaydalar çərçivəsində verilibsə, həmin şəxs müsahibəyə dəvət olunur və ondan üç ekspert ixtisas və dil biliklərini yoxlayır. Burada iştirak edən şəxs maksimum 15 dəqiqə danışır və bu da gündəlik iş rejimidir. Bu proses də onlayn həyata keçirilir. Proqram da “Microsoft Teams”dir, buna görə agentlik xüsusi proqram yaratmayıb”.

K. Əsədovun sözlərinə görə, bütün xərclər nəzərə alındıqda belə 250 manat böyük məbləğdir.

“Digər tərəfdən, bütün proseslər müsbət keçdikdən sonra həmin şəxsə kağızdaşıyıcı üzərində çap olunmuş iki diplom verilir. Onu özəl qurumda maksimum 50 qəpiyə və ya 1 manata çap edə bilərsiniz. Ümumiyyətlə, prosesin təşkili üçün 35 manat xərc yetərli olardı. Məncə, 50 manat rüsum normal idi. Nəzərə alsaq ki, müraciət edənlərin 50 faizə qədərinin diplomunun tanınmasından ilkin mərhələdə imtina olunur və bu o deməkdir ki, həmin şəxsin verdiyi pul batır. Ona görə də alınan rüsumu çox hesab edirəm. Bundan sonrakı mərhələdə müraciət edən şəxs məhkəmə instansiyalarına üz tutur və xərci daha çox özü çəkir. Birmənalı şəkildə 250 manat məbləğ çoxdur və mütləq şəkildə azaldılmalıdır”.

Reyting.az




Bölməyə aid digər xəbərlər
{sape_links}{sape_article}