Qarabağdakı talanın qarşısı alınır - Deputat
Tarix: 07-12-2022 15:40 | Bölmə: Slayd
Qarabağdakı talanın qarşısı alınır

“Qarabağda yaranmış hazırkı vəziyyət Azərbaycanın növbəti uğurudur. Azərbaycan qalan ərazilərə də nəzarət etmək üçün işlər görür. Bu, Azərbaycanın hüquqi, siyasi və diplomatiya sahəsində uğurlu gedişdir”.

Bunu Reyting.az-a Milli Məclisin deputatı Elman Məmmədov Azərbaycanın müvafiq qurumlarının rus sülhməramlıların nəzarətindəki ərazilərə daxil olaraq erməni separatçılarının faydalı qazıntılarımızı qanunsuz istismar edərək dağıtmasını araşdırmaq, habelə ekoloji vəziyyətin yerində öyrənilməsi üçün görülən işlərdən danışarkən deyib.

E. Məmmədovun fikrincə, yaranmış vəziyyət Rusiya ilə danışıqlarda müəyyən qədər irəliləyişin olduğunu göstərir:

“Sözsüz ki, söhbət Qarabağda yaşayan separatçı və terrorçulardan getmir. Məncə, Rusiya ilə danışıqlardan sonra mərkəzdən sülhməramlılara təlimat verilib ki, müvafiq şərait yaradılsın, Azərbaycanın aidiyyəti qurumları həmin ərazilərə baxsınlar və araşdırma aparsınlar. Hesab edirəm ki, gələcəkdə bu işlər daha da genişlənəcək. Nəticədə ərazilərimizə nəzarət bizim ixtiyarımıza keçəcək. Bu, bizim uğurumuz və ədalətli mövqeyimizdir”.


E. Məmmədov

Milli Məclis üzvü diqqətə çatdırıb ki, Azərbaycan əraziləri işğal altında olduğu 30 il müddətində ermənilər tərəfindən talan edilib: “Hazırda separatçıların olduğu ərazilərdə yenə talana cəhdlər olur. Özü də, ərazilərimizi təkcə separatçılar talan eləmir. Çox təəssüflər olsun ki, hüququn aliliyindən və ədalətdən danışan Avropanın şirkətləri də son 30 ildə bu talanda iştirak ediblər. Onlar bu yaxınlarda bizimkilər tərəfindən ifşa edildilər. Bəzi Avropa şirkətləri Qarabağın ermənilər yaşadığı hissəsindəki faydalı qazıntıları qanunsuz olaraq istismar ediblər. Onlar separatçılarla bu işdə şərikdirlər. Necə ki, İran son 30 ildə ərazilərimiz üzərində talanla məşğul olurdu, Avropa şirkətləri də yerin alt qatında eyni işi görürlər”.

E. Məmmədov bildirib ki, Azərbaycan öz ərazilərinin talan olunmasının və qanunsuz yolla istismar edilməsinin qarşısını almaq üçün lazımı tədbirlər görür: “Hələ torpaqlarımız işğal altında qalan dövrdə də Azərbaycan BMT, ATƏT, Avropa Şurası, Avropa Birliyi və digər beynəlxalq qurumlarda bu məsələləri qaldırır, etiraz edirdi. Amma onda gücümüz yox idi, səsimiz eşidilmirdi. Ancaq indi meydanda gücümüz olduğundan masada da sözümüz eşidilir. Bəli, biz masada diktə edirik. Artıq nə İran, nə Avropa şirkətləri Azərbaycanın nəzarətsiz ərazilərində sərvətlərimizi talan edə bilməzlər. Azərbaycan bu məsələdə ortaya ciddi mövqe qoyub, dövlət orqanlarının mütəxəssisləri hazırda nəzarət etmədiyimiz ərazilərdə yeraltı sərvətlərimizin istismar vəziyyətini araşdırır, ekoloji durumla bağlı monitorinqlər həyata keçirirlər. Biz heç kimə imkan verməyəcəyik ki, ərazilərimizi talan etsin. Odur ki, indi Azərbaycan mütəxəssislərinin faydalı qazıntıların qanunsuz istismarı, bundan irəli gələn ekoloji və digər fəsadlarla bağlı yataqlarda və müvafiq digər məntəqələrdə monitorinq, əmlakın inventarizasiyası və ekoloji araşdırma işləri aparması yüksək qiymətləndirilməlidir”.

Reyting.az




Bölməyə aid digər xəbərlər
{sape_links}{sape_article}