Separatçılar vəziyyəti yenidən gərginləşdirir, Paşinyanı devirmək istəyirlər
Tarix: 23-05-2023 12:30 | Bölmə: Slayd
Separatçılar vəziyyəti yenidən gərginləşdirir, Paşinyanı devirmək istəyirlər

Ermənistan baş naziri Nikol Paşinyanın Azərbaycanın ərazi bütövlüyünü tanıması, Qarabağın dağlıq hissəsini də Azərbaycan ərazisi hesab etməsinə dair bəyanatı Ermənistan və Xankəndi şəhərindəki revanşist və separatçıların kefini pozub.

Reyting.az
xəbər verir ki, separatçılar, revanşistlər və çörəyi müharibədən çıxan erməni siyasətçiləri Paşinyanın bəyanatına qarşı çıxış etməyə başlayıblar.

Öncə Xankəndi şəhərindəki qondarma parlament toplaşaraq Ermənistanın keçmiş prezidentlərini Paşinyanın bəyanatına reaksiya verməyə dəvət edib. Eyni zamanda müxtəlif illərdə separatçılara rəhbərlik etmiş şəxslərdən də ortaya mövqe qoymaq tələb olunub.

Qarabağdakı separatçı rejimin qondarma parlamenti bəyan edib ki, N. Paşinyanın bəyanatı hiddət və qəzəb doğurur.

Qondarma parlamentin çağırışına ilk cavabı müxtəlif dövrlərdə Qarabağdakı separatçılara rəhbərlik etmiş Bako Saakyan və Arkadi Qukasyan verib. İki separatçının birgə bəyanatında qeyd olunur ki, Azərbaycanın istəklərinə qeyd-şərtsiz tabe olmaq məntiqi ilə bağlı Ermənistanın hazırkı hakimiyyətinin davranışı və mövqeyi qəbuledilməzdir:

“Ermənistanın indiki baş nazirinin açıqladığı bəyanatlar Ermənistan dövlətçiliyinin əsaslarını sarsıtdı, xüsusən də bütün ermənilərin hüquqlarının müdafiəçisi olmaq öhdəliyini pozdu”.

Ermənistanın sabiq prezidenti, hakimiyyəti devrilmiş Serj Sarksiyan da separatçılara dəstək nümayiş etdirib:

“Ermənistanın baş naziri vəzifəsində çalışan kapitulyatorun Qarabağın Azərbaycanın tərkib hissəsi kimi tanınması ilə bağlı birbaşa bəyanatından sonra məndən cavab “tələb edilməsi” sadəcə anlaşılmazdır”.

Sarksiyan Qarabağdakı separatçıların yanında olduğunu bəyan edib.

Ermənistan parlamentində təmsil olunan “Ermənistan” bloku da Paşinyanın bəyanatına qarşı çıxaraq Qarabağ separatçılarını dəstəkləyib. Daşnaksütyun Prtiyasının üzvü Artsvik Minasyan parlamentin bu gün keçirilən iclasında bununla bağlı bəyanat səsləndirib. Onun sözlərinə görə, müxalifət indiki siyasi rəhbərliyin fəlakətli niyyətlərinin qarşısını almaq üçün hər cür səy göstərəcək.

O, bütün sağlam qüvvələri birləşdirməyə və “hakimiyyətin xəyanətkar planlarının” qarşısını tezliklə almağa çağırıb. “Ölkənin və Vətənin maraqlarına xəyanət edən bu qüvvəni hakimiyyətdən uzaqlaşdırmaq üçün hər şeyi edəcəyik”, - deyə Minasyan əlavə edib.

Parlament sədri Alen Simonyan isə deyib ki, baş nazirin əvvəllər səsləndirdiyi mövqeləri tam dəstəkləyir:

“Şəxsi fikrimlə maraqlanırsınızsa, o zaman mən respublikanın baş nazirinin bir gün əvvəl səsləndirdiyi mövqeyi tamamilə bölüşürəm”.

Qeyd edək ki, Paşinyanın Qarabağı Azərbaycanın tərkib hissəsi kimi tanıması ilə bağlı bəyanatı Azərbaycanın analitiklər tərəfindən də şərh edilir.

Ekspert İlham Şaban deyib ki, belə davam edərsə, Rusiya Baxmut məsələsini buraxıb Ermənistanla məşğul olmağa çalışacaq.

Ekspert Ələsgər Məmmədli isə bildirib ki, belə bəyanatdan sonra erməni müxalifəti və onun xaricdəki dəstəkçiləri Paşinyan hakimiyyətini devirməyə cəhd edə bilər.

Politoloq Elxan Şahinoğlu isə düşünür ki, Paşinyanın açıq danışması, hətta Ruben Vardanyanı ittiham etməsi göstərir ki, Vardanyan siyasi fiqur kimi artıq əhəmiyyətə malik deyil və heç bir təhlükə törədə bilməz.

E. KAMAL
Reyting.az




Bölməyə aid digər xəbərlər
{sape_links}{sape_article}