Putin nüvə silahından istifadə edə bilər
Tarix: 07-05-2025 13:55 | Bölmə: Slayd
Putin nüvə silahından istifadə edə bilər

“Prezident Vladimir Putinin 25 illik hakimiyyəti dövründə Rusiyada çox az şey dəyişib. Bununla belə, prezidentlik müddətləri ilə bağlı sənədli filmdə o, Qərbdə diqqət yetirilməli bir neçə narahatedici bəyanatlar verib”.

Reyting.az
bildirir ki, bunu “The Telegraph” qəzetinə hərbi ekspert Hamiş de Bretton-Qordon deyib.

Ekspert xatırladıb ki, Putin Ukraynanı əsarət altına almaq üçün başladığı hərbi əməliyyatın plan və məqsədlərinin dəyişməyəcəyini bildirib. Üstəlik, Rusiya lideri “ümid edir ki, nüvə silahından istifadəyə ehtiyac olmayacaq”.

Bretton-Qordon qeyd edib ki, Putinin nüvə silahı ilə bağlı əvvəlki bütün təhdidləri Ukraynanın müttəfiqlərini qorxutmaq və onların dəstəyini azaltmağa hesablansa da, indi Rusiya lideri üçün vəziyyət dəyişib.

Ekspertin fikrincə, fevralın 28-də ABŞ prezidenti Donald Tramp və Ukrayna lideri Vladimir Zelenski Oval kabinetdə mübahisə etdikdən sonra Vladimir Putin Ukraynanı asanlıqla ələ keçirə biləcəyinə əmin olub. Lakin son vaxtlar Trampın Rusiyaya qarşı ritorikası daha sərt xarakter alır.

Bretton-Qordon bildirib ki, Rusiyanın Ukraynadakı müharibədə itkiləri artıq bir milyon nəfərə (ölən və yaralananlar) yaxınlaşır.

Hərbi ekspert qeyd edib ki, son bir ildə Moskva yalnız kiçik irəliləyişlərə nail ola bilib: “Rusiya hərbi texnikasının istehsalı əsasən neft ixracından əldə edilən gəlirlər hesabına maliyyələşdirilir. Putinin hərbi ambisiyalarına növbəti zərbə olaraq, OPEK hasilatı artırır və Səudiyyə Ərəbistanı neft qiymətlərinin bir barel üçün 50 dollara çatmasını istəyir. İndiki xərclər səviyyəsində bu, tezliklə Rusiyanı iflasa aparacaq”.

Bretton-Qordonun fikrincə, Putin taktiki nüvə silahından istifadə etmək qərarına gələ bilər. O, istisna etmir ki, Rusiya rəhbəri Ukrayna qoşunlarını tez bir zamanda məğlub etməyə çalışa bilər, çünki Böyük Britaniya və Fransadan cavab zərbəsi gözləmir.

Ekspert əmin edib ki, Rusiyanın taktiki nüvə silahından istifadəsinin qarşısını almaq mümkündür: “Bunun üçün NATO-nun ABŞ-nın dəstəyi ilə böyük adi qüvvələr və ya taktiki nüvə silahları ilə cavab zərbələri endirməsini təmin etmək lazımdır”.

Bretton-Qordon sonda qeyd edib ki, Britaniya öz ərazisində ABŞ-nın taktiki nüvə silahlarını yerləşdirməlidir. Çünki nüvə balansı III Dünya Müharibəsinin qarşısını almağa kömək edə bilər.

E. KAMAL




Bölməyə aid digər xəbərlər