12:54 / 24-05-2024
MEDİA müsabiqə elan edib
12:26 / 24-05-2024
Sabah yağış yağacaq
Yaddaşlarda yaşayan xeyirxah insan - Fotolar
Tarix: 11-04-2024 00:28 | Bölmə: Xəbərlər
Yaddaşlarda yaşayan xeyirxah insan

(Görkəmli hüquqşünas Əli Məhərrəmovun anadan olmasının 100 illiyinə)

Əli Hüseyn oğlu Məhərrəmov Azərbaycanın hüquq-mühafizə orqanları sistemində layiqli yer tutan görkəmli hüquqşünaslarımızdandır. O, mənalı ömrünün 27 ilini ədalət keşiyində ləyaqətlə çalışaraq, prokurorluq və məhkəmə sistemində özünəməxsus iz qoyub.

1924-cü il aprelin 12-də Qərbi Azərbaycanda, Oğuz türklərinin qədim yurdu Göyçə mahalında dünyaya gələn Əli Məhərrəmov orta məktəbi bitirdikdən sonra bir müddət Basarkeçər rsyonunun Dərə kəndində müəllim işləyib.



İkinci Dünya Müharibəsi başlayanda 18 yaşlı Əli Hüseynoğlu könüllü cəbhəyə gedib, zenit artilleriyası diviziyasında atıcı kimi faşizmə qarşı vuruşub. Qanlı müharibə illərinin bütün məhrumiyyətlərini yaşayan, döyüşlərdə ağır yaralanaraq uzun müddət müalicə alan gənc döyüşçü tərxis olunmaq istəməyərək, yenidən ön xəttə qayıdıb, düşmənlə sona qədər əzmlə mübarizə aparıb. Ukraynadan, Belarusdan, Polşadan keçməklə Almaniya sərhədlərinə qədər uzanan şərəfli döyüş yollarında igidliyinə görə “Qvardiyaçı” ordeninə, “Döyüşdə göstərdiyi şücaətə görə”, “Böyük Vətən müharibəsində Almaniya üzərində qələbəyə görə” və s. medallara layiq görülüb.

Qələbədən sonra doğma vətəni Göyçəyə qayıdaraq Basarkeçər rayonunda məktəb direktoru işləyən Əli Məhərrəmov təhsilini artırmaq üçün əvvəlcə Bakıda ikiillik Hüquq məktəbinə daxil olub oranı fərqlənmə diplomu ilə bitirib, sonra Azərbaycan Dövlət Universitetində hüquq fakültəsində və Leninqradda (indiki S-Peterburq) ali hüquq təhsili alıb.

Əli Məhərrəmov müxtəlif illərdə Ağdam rayon prokurorunun köməkçisi (1950-51), Şuşanın prokuroru (1951-54), Qubadlı (1954-55), Zəngilan (1955-57), Zaqatala (1957-62) və Lənkəran (1962-66) rayon prokurorluqlarında müstəntiq vəzifələrində işləyib.



İstintaqçı kimi böyük təcrübəyə, biliyə və peşə hazırlığına malik Əli Məhərrəmov 1966-cı ildə Respublika Prokurorluğunda (indiki Baş Prokurorluq) xüsusilə mühüm işlər müstəntiq vəzifəsinə irəli çəkilib. Bu ağır və məsuliyyətli vəzifədə səkkiz il bacarıqla çalışıb ən ağır cinayət işlərinin açılmasında xüsusi bacarıq göstərib, sonra zona prokuroru vəzifəsinə təyin edilib.

Bilik və bacarığına görə hüquq ictimaiyyətinin böyük etimadını qazanan Əli Məhərrəmovun zəngin təcrübəsini nəzərə alan respublika rəhbərliyi 1975-ci ildə onu Ali Məhkəmənin üzvü vəzifəsinə tövsiyə edib. Seçildiyi həmin məsul vəzifədə hər zaman şəxsən ulu öndər Heydər Əliyevin cinayətkarlığa qarşı mübarizənin möhkəmləndirilməsi istiqamətində verdiyi dəyərli məsləhət və tövsiyələri əldə rəhbər tutaraq səylə çalışıb, ölkə rəhbərinin etimadını doğrultmaq üçün var qüvvəsini səfərbər edib. Uzun illər hüquq-mühafizə orqanlarında səmərəli fəaliyyətinə görə dəfələrlə Respublika Prokurorluğunun yüksək mükafatlarına layiq görülüb, cinayətkarlığa qarşı mübarizədə xüsusi fərqləndiyinə görə Azərbaycan Respublikası Ali Soveti Rəyasət Heyətinin Fəxri Fərmanı ilə təltif olunub.



Bütün həyatını sevdiyi hüquqşünas peşəsinə həsr edən Əli Məhərrəmov 1950-ci ildən ömrünün sonuna qədər Azərbaycan Respublikasının hüquq-mühafizə orqanlarında məsul vəzifələrdə vicdanla çalışıb. O, bütün bilik və bacarığını ölkədə cinayətkarlığa qarşı mübarizə işinə həsr edib, hadisələrin ən qaynar və təhlükəli nöqtələrində olub, öhdəsinə düşən mürəkkəb tapşırıqları layiqincə yerinə yetirib. Bütün fəaliyyətini cinayətkarlıqla mübarizəyə, qanunçuluğun qorunmasına və hüquq qaydalarının möhkəmləndirilməsinə, vətəndaşların hüquqlarının qorunmasına həsr edərək, hüququn aliliyi və ədalət prinsiplərini uca tutan görkəmli hüquqşünas heç vaxt cinayətin cəzasız qalmasına, günahsız insanın müttəhimlər kürsüsündə əyləşməsinə razı olmayıb. Humanizm amalı qanında olan, insan taleyinə həssaslıqla yanaşan, haqqı, ədaləti, qanunçuluğu təkcə sakit kabinetdə, məhkəmə, prokuratura divarları arasında, səlahiyyət kreslosunda yox, həyatın hər məqamında, ictimaiyyət arasında da qoruyan hüquqşünas öz imkanları, səlahiyyətləri müqabilində və qanun çərçivəsində daim onlara yardım etməyə çalışıb.

Təbiətcə sakit, az danışan hüquqşünas olduqca səbrli, təmkinli, tədbirli və müdrik insan olub. Yanına tez-tez əsasən şəxsi problemləri ilə bağlı məsləhətə gələn çoxsaylı vətəndaşları diqqətlə dinləyər, imkanı daxilində kömək etməyə çalışardı. Təbiəti etibarilə mülayim xasiyyətli, son dərəcə demokratik xarakterli hüquqşünas heç vaxt nüfuzundan və səlahiyyətlərindən sui-istifadə etməz, ədaləti üstün tutaraq hər kəsin müstəqil fikrinə və düşüncəsinə hörmətlə yanaşardı.



Xeyirxah və həssas qəlbli peşəkar hüquq mütəxəssisi, həqiqi vətənpərvər, qayğıkeş el ağsaqqalı, sədaqətli dost, etibarlı yoldaş, gözəl ailə başçısı olan Əli Məhərrəmov 1977-cildə, 53 yaşında qəflətən vəfat edib.

1924-cü il aprelin 12-də qədim Oğuz yurdu füsunkar Göyçədə dünyaya gələn və qısa ömür yolunda öz işi, peşəsi, ədaləti, xeyirxahlığı ilə dərin iz qoyub dünyadan köçən xalqımızın dəyərli şəxsiyyətlərindən biri, yüksək intellektual potensiala malik hüquqşünas Əli Məhərrəmovun 100 yaşı tamam olur. Həyatı boyunca elin-obanın, xalqın, yurdun təəssübünü çəkən, vətəndaşların hüququnu qoruyan son dərəcə təmiz, təmənnasız, təvazökar, nəcib və xeyirxah İnsan olan əsil vətənpərvər ziyalı və qayğıkeş el oğlu Əli Məhərrəmovun işıqlı xatirəsi doğmalarının, dostlarının, həmkarlarının və bütün tanıyanların yaddaşında daim yaşayacaqdır.

Ruhu şad olsun!





Bölməyə aid digər xəbərlər
{sape_links}{sape_article}