Ölkəmizdə repetitorluq orta məktəbi üstələyir
Tarix: 18-04-2021 19:42 | Bölmə: Cəmiyyət
Ölkəmizdə repetitorluq orta məktəbi üstələyir

Son 25 ildə Azərbaycanda “kölgə təhsili”, yəni repetitorluq baş alıb gedir. Dövlət hər il təhsilə 3 milyard manatdan çox pul ayırır, bunun əksər hissəsi orta təhsilə gedir. 15 ildə 4500 yeni məktəb tikilib. Amma orta təhsilin, xüsüsən yuxarı siniflərdə böyük payı "kölgədədir". Reyting.az-ın məlumatına görə, Azərbaycan Dövlət Pedaqoji Universitetinin riyaziyyatcı dosenti İlham Əhmədov “Turan”a deyib ki, yuxarı siniflərdə tədrisin pozulması, sinif otaqlarının boşalması narahatlıq yaradır.

"Ölkədə belə bir rəy yaranıb ki, repetitor yanına getməyən şagirdın universitetə qəbul olmaq şansı yoxdur. Hər şagirdin 2 il repetitorların yanına getməsi ailəyə 10.000 -15.000 manat itkidir. Əgər ailədə bir neçə uşaq varsa, bu rəqəm ailə üçün daha böyük məsrəfdir. Bu sahədə illik dövriyyə milyard manata yaxındır. Öz maaşından vergi ödəyən valideyn övladının orta təhsili üçün niyə əlavə bu qədər ödənişlər etməlidir?", - İlham Əhmədov ritorik sual verir.

O, valideynlərin xeyli əlavə pul xərcləməsindən, borca düşmələrindən, uşaq universitetə daxil olanda təhsil haqqını ödəməkdə problemlər yaşamalarından narahatdır.

"Bunun səbəbi məktəbın öz işinin öhdəsindən gələ bilməməsidir, yoxsa valideynlər indiki çətin zamanda repetitorlara bu qədər pulu niyə səpələyərdi ki? Repetitor dərsləri şagirdlərin həddən artıq yüklənməsinə, sonralar müxtəlif xəstəliklər tapmasına da səbəb olur, bu, ayrıca söhbətin mövzusudur", - dosent Təhsil Nazirliyinin üzərinə düşən öhdəlikdən söz acıb.

“15 il əvvəl bu məsələlər müzakirə ediləndə Təhsil Nazirliyinin rəsmiləri deyirdilər ki, repetitorluq bir çox ölkələrdə var. Amma demirdilər ki, heç bir ölkədə belə kütləvi deyil. İctimaiyyətdə belə fikir yaranıb ki, repetitorluğun yaranmasında və uzun müddət davam etməsində aidiyyatı məsul qurumların fəaliyyətsizliyinin də mühüm rolu var.

Görəsən, bu kölgə təhsilinin qarşısı nə vaxt alınacaq? Bunu kim etməlidir?” - dosent yenidən Təhsil Nazirliyinə sualla müraciət edib.

Nazirliyin bu məsələyə münasibətini Təhsil Nazirliyinin ümumi və məktəbəqədər təhsil şöbəsinin müdiri Vəfa Yaqublu jurnalistlərə izah edib. О deyib ki, “repetitorluq fəaliyyəti Təhsil Nazirliyinin tabeliyində deyil, bu iş biznes sahəsidir. Bununla bağlı qərarlar Nazirlər Kabineti tərəfindən verilir”.




Bölməyə aid digər xəbərlər
10-05-2021, 11:48 Sabah yağış yağacaq

bütün xəbərlər
{sape_links}{sape_article}