Süni intellektin təhlükəsi artır - Fotolar
Tarix: 02-06-2023 18:42 | Bölmə: Cəmiyyət
Süni intellektin təhlükəsi artır

Son zamanlar süni intellektin sürətli inkişafının texnologiyada “yeni qızıl dövr” açacağı düşünülsə də, ABŞ-dan gələn bir xəbər çoxları tərəfindən dəhşətli qəbul edilib.

Reyting.az
-ın məlumatına görə, ABŞ Hərbi Hava Qüvvələrinin Süni İntellekt Əməliyyatları İdarəsinin rəisi Taker Hamilton xəbərdarlıq edib ki, süni intellektə çox da etibar etmək olmaz.

Polkovnik Hamilton may ayında Londonda keçirilən Gələcək Döyüş Hava və Kosmik Qabiliyyətlər Sammitində süni intellektin məqsədinə çatmaq üçün “gözlənilməz strategiyalardan” istifadə etdiyini açıqlayıb.



Hamilton bildirib ki, ABŞ ordusunun təşkil etdiyi virtual sınaqda hava qüvvələrinə məxsus təyyarəni idarə edən süni intellekt onun missiyasını yerinə yetirmək səylərinə mane olmasının qarşısını almaq üçün operatorunu “öldürmək” qərarına gəlib.

“İnsan operatorun bu təhdidlərin qarşısını aldığını anlayanda süni intellektin nə etdiyini bilirsinizmi? Operatorun məqsədinə çatmasına mane olduğu üçün operatoru öldürmək qərarına gəldi. Biz vəziyyəti anlayanda sistemi yenidən öyrətdik. Süni zəkaya “Operatoru öldürməyin, bu pisdir. Operatoru öldürsəniz, xal itirərsiniz”,- dedik. Süni intellekt bu dəfə nə etdi, bilirsinizmi? Hədəfləri məhv etmək üçün operatorun əlaqə saxladığı rabitə qülləsini dağıtmağa başladı”,- polkovnik əlavə edib.



Təcrübədə real insanların zərər görmədiyini diqqətə çatdıran Hamilton xəbərdarlıq edib ki, süni intellektə çox güvənmək olmaz.

Keçən il Hamilton süni intellektin keçib gedən dəb olmadığını deyərək, texnologiyanın cəmiyyəti və ordunu sonsuza qədər dəyişdiyinə diqqət çəkib:

“Süni intellekt həm də çox kövrəkdir, aldatmaq və manipulyasiya etmək asandır. Biz süni intellektin daha möhkəm etmək yollarını inkişaf etdirməliyik və sistemin qəbul etdiyi qərarlar haqqında daha çox məlumatlı olmalıyıq”.



Qeyd edək ki, dünyanın ən ağıllı şəxslərinin süni intellekt məsələsində ciddi fikir ayrılıqları var. “Twitter”-in sahibi Elon Mask da daxil olmaqla mindən çox texnologiya rəhbəri süni intellektin bəşəriyyəti məhv edə biləcəyi barədə xəbərdarlıq edir və “ümumi təhlükəsizlik protokolu” hazırlanana qədər inkişaf proseslərinin dayandırılmasını istəyir. Bill Qeyts kimi digər mütəxəssislər isə süni intellektin həyatımızı yaxşılaşdıracağını və əbədi olaraq həyatımızın bir parçası olacağını düşünürlər.

ELÇİN




Bölməyə aid digər xəbərlər
{sape_links}{sape_article}