İsrailin baş naziri Benyamin Netanyahunun keçmiş şəxsi katibi və baş müşaviri Aşer Hayon 58 yaşında qəflətən vəfat edib.

Reyting.az-ın məlumatına görə, baş nazirin ofisindən bildiriblər ki, Hayon bu səhər dünyasını dəyişib. Onun ölüm səbəbi ilə bağlı məlumat verilməyib.

“Times of Israel” qəzeti yazır ki, Hayon son illər səhhətindəki problemlərə görə dövlət vəzifəsindən çəkilibmiş. Lakin onun qəfil ölüm xəbəri İsrail siyasi lobbilərində suallar yaradıb.

Hayonun səlahiyyət müddəti ərzində daha çox inzibati və strateji sahələrdə çalışdığı və ictimaiyyətdən uzaq durmağa üstünlük verdiyi bildirilir. Buna baxmayaraq, İsrailin son illərdə ən kritik qərar proseslərində iştirak etdiyi məlumdur.

Netanyahu verdiyi yazılı açıqlamada ölüm xəbərini “dərin sarsıntı və böyük kədər”lə qarşıladığını qeyd edib.

Hayonun 2018-2022-ci illərdə baş nazirlik aparatının direktoru, daha sonra isə özəl katib vəzifələrində çalışdığını bildirən Netanyahu əlavə edib ki, aralarındakı iş əlaqəsi təxminən 20 il əvvələ, maliyyə naziri olduğu dövrə qədər uzanır.

Netanyahu, Hayonun “sağ düşüncəli və güclü humanitar” bir insan olduğunu ifadə edərək, son illərdə rəsmi vəzifədə olmamasına baxmayaraq, əlaqələrinin davam etdiyini bildirib.

Ancaq Hayonun ailəsi təəccüblü bir açıqlama verib. Ölümün şübhəli olduğu bildirilir. Ailəsinin “O, sağlam idi. Heç bir şeyi yox idi. Onu öldürdülər, Netanyahu soyuqqanlılıqla öldürdü”,- dediyi iddia olunur.

Modində yaşayan Hayonun həyat yoldaşı Miti, altı uşağı və bir nəvəsi qalıb. Qəfil ölümün təfərrüatları İsrail ictimaiyyəti üçün maraq doğurur. Rəsmi açıqlamada ölüm səbəbi ilə bağlı dəqiq məlumat verilməsə də, diqqətlər yaxın günlərdə veriləcək açıqlamalara yönəlib.

V. QULİYEV