Nikol Paşinyan

“Nikol Paşinyan hökumətinin Azərbaycanla sülh sazişini Ermənistanda keçiriləcək parlament seçkilərindən əvvəl imzalamaq niyyəti başadüşüləndir. Baş nazir Paşinyan seçkilərdə xalqın dəstəyini almaq, apardığı siyasətin yanlış olmadığını nümayiş etdirmək istəyir”.

Bunu “Reytinq” qəzetinə açıqlamasında professor Qabil Hüseynli deyib.

Onun sözlərinə görə, ABŞ-nın vitse-prezidenti Vensin bölgəyə səfəri zamanı bu məqamın gündəmə gətirilməsi təsadüfi deyil.

Ermənistanın Konstitusiyasında Azərbaycan və Türkiyəyə qarşı ərazi iddialarına da diqqət çəkən Q. Hüseynli bildirib ki, Azərbaycan və Ermənistan arasındakı müharibədən sonra iki ölkə mövqe yaxınlaşması var, ticarət əlaqələri tədricən başlayıb və davam edir: “Bütün müsbət hallarla yanaşı Ermənistan Azərbaycan və Türkiyəyə qarşı ərazi iddiasından imtina etməli və bunu Konstitusiya referendumu ilə sübuta yetirməlidir”.

Müsahibimizin müşahidəsinə görə, Paşinyan hakimiyyəti parlament seçkilərindən əvvəl Konstitusiya dəyişikliyinə getmək istəmir, bunu daha çox parlament seçkilərində qalib gəldikdən sonrakı mərhələyə saxlamaq niyyətindədir: “Azərbaycan isə bu şərtin sülh sazişinin əldə edilməsi üçün əsas olduğunu bildirir. Mümkündür ki, Paşinyan bu məsələni amerikalı rəsmilərlə də müzakirə edib. Amerika siyasəti də bölgədə sülh sazişinin tezliklə əldə edilməsini istəyir. Ancaq bütün bunların baş tutması məsələsində Azərbaycanın mövqeyi həlledicidir”.

Q. Hüseynlinin qənaətincə, Azərbaycan buna razılıq verə də, verməyə də bilər:

“Bütün hallarda Ermənistan Konstitusiyanı dəyişdirərək Azərbaycan və Türkiyəyə qarşı ərazi iddialarını geri götürəcəyinə təminat verməli və bunu həyata keçirməlidir”.

Nemət ORUCOV

Reyting.az