2024-cü ildə Antarktidada tədqiqatçıların apardığı elmi araşdırmalar gözlənilməz bir sonluqla başa çatıb. 2026-cı ildə isə axtarış missiyası yenidən bərpa olunub.

Reyting.az xəbər verir ki, "Indian Defence Review" nəşrinin yazdığına görə, 2024-cü ilin yanvarında Dotson şelf buzlağı altında tədqiqat aparan robotlaşdırılmış "Ran" adlı sualtı aparatla əlaqə qəflətən itib və o, müəmmalı şəkildə yoxa çıxıb.

Alimlər bildiriblər ki, aparat itməzdən öncə buzlağın alt səthində indiyə qədər qeydə alınmamış, həmçinin mövcud ərimə modellərinə uyğun gəlməyən qəribə strukturlar üzə çıxıb. Bununla da alimlər bölgənin ən detallı xəritələrini yenidən tam mükəmməl şəkildə hazırlayaraq təqdim ediblər.

Cihazın taleyi və izaholunmaz bir şəraitdə yoxa çıxma səbəbləri naməlum qalsa da, tədqiqatçılar baş verən bu sirli anomaliya hadisəsini 2026-cı ildən yenidən araşdırmağa başlayıblar.

Elm adamları baş verən hadisə ilə bağlı qeyri-real fikirlər səsləndirməməyi də tövsiyə ediblər. Onların sözlərinə görə, həmin cihazın yoxa çıxmasında Antarktidada baza quran yadplanetlilərin əlinin olması barədə fərziyyələr uydurmadır.

Tədqiqat qrupuna daxil olanlar xüsusi vurğulayıblar ki, guya yadplanetli varlıqların müdaxiləsi nəticəsində kəşfiyyat aparatı olan "Ran"ın söndürülməsi və ya qeyri-maddi portalda itməsi haqqında heç bir elmi dəlil yoxdur.

Oqtay QORÇU