Rusiyanın neft hasilatı ikinci aydır ki, azalır. ABŞ sanksiyaları Rusiyanın “qara qızıl”ını satmasını daha da çətinləşdirib.

Reyting.az xəbər verir ki, “Bloomberg”in mənbələrinə görə, ötən ay ölkə gündə orta hesabla 9,28 milyon barel neft hasil edib. Bu da 2025-ci ilin dekabr ayı ilə müqayisədə gündə 46.000 barel azdır.

Bildirilir ki, Rusiya neft hasilatını azaltmağa davam edərsə, digər OPEC+ üzvlərinə bazar payını itirmək riski ilə üzləşir.

Qeyd edilir ki, ABŞ sanksiyaları səbəbindən tankerlərdə saxlanılan Rusiya xam neftinin miqdarı artmaqda davam etdikcə Rusiyanın neft hasilatı azalır.

“Fevral ayının əvvəlində tankerlərdə yığılan Rusiya neftinin həcmi 143 milyon barelə çatdı ki, bu da bir il əvvəlkindən təxminən iki dəfə və noyabr ayının sonundan dörddə bir çoxdur”, - deyə nəşr vurğulayır.

Bundan əlavə, ABŞ prezidenti D. Trampın ABŞ və Hindistan arasında ticarət sazişinin mümkünlüyünü elan etdikdən sonra bütün dövlətə məxsus və özəl Hindistan neft emalı zavodları Rusiya xam neftinin alışını dayandırıb. Hindistan tərəfindən rədd edilən neft daşıyan bəzi tankerlər Çinə gedir, “lakin Çin bazarının Moskvadan nə qədər əlavə neft qəbul etməyə hazır olduğu hələ də məlum deyil”.

Bundan əlavə, neft hasilatının azalması neft və qaz gəlirlərindən asılı olan Rusiyanın büdcəsinə də zərbə vuracaq. Bu kontekstdə “Bloomberg” xatırladır ki, Rusiya büdcəsinin neft və qaz gəlirləri yanvar ayında qlobal neft qiymətlərinin aşağı düşməsi, neft alıcıları üçün böyük endirimlər və rublun möhkəmlənməsi səbəbindən beş illik minimuma düşüb.

V. QULİYEV