2015-ci ilin dekabr ayında manatın devalvasiyasından sonra yaranan narazılığı aradan qaldırmaq üçün Azərbaycan iqtidarı büdcədən maliyyələşən təşkilatlarda işləyənlərin əmək haqqını 10 faiz artırdı. Ölkədə baş verən qiymət artımı ilə müqayisədə 10 faizlik artım az olsa da, bu, büdcə təşkilatlarında işləyənlərə müəyyən təsəlli oldu. Amma buna baxmayaraq, Maliyyə Nazirliyi 10 faizlik əmək haqqı artımının ödənilməsini təmin etməyib. Bəzi qurumlarda bu artımın aprel ayından tez ödənməyəcəyi bildirilir.

Büdcə təşkilatlarından birində çalışan şəxs reyting.az saytına deyib ki, vəziyyət görünəndən də pisdir.

Onun sözlərinə görə, hazırda büdcətəşkilatlarında xarici ezamiyyətlər də qadağan olunub. Daxili ezamiyyətlər isə kəskin şəkildə azaldılıb:

"Hətta kağız almağa da vəsait ayrılmır. Əməkhaqları isə gecikdirilir. Daha doğrusu, Maliyyə Nazirliyi əməkhaqlarının ödənməsi ilə bağlı ikili standartlar həyata keçirir. Nazirliklərdə və digər yuxarı icra or-qanlarında işləyənlərin yanvar və fevral aylarına olan əməkhaqları ödənsə də, digər büdcə təşkilatlarına münasibətdə vəziyyət fərqlidir".

Məlumatda bildirilir ki, nazirlikdə işləyənlər maaşlarını alsalar da, onlara tabe olan qurumlarda çalışanlar barədə düşünən yoxdur. Buna görə də büdcədən maliyyələşən təşkilatları üç qrupa bölmək olar:

Birinci qrupdakılar yanvar və fevral aylarının maaşını alsalar da artımı almayıblar. Belə təşkilatların sayı azdır.

İkinci qrupdakılar ancaq yanvar ayının maaşını alıb.

Üçüncü qrup büdcə təşkilatlarında çalışanlar isə bu il ümumiyyətlə əməkhaqqı almayıblar. Ona görə də büdcə təşkilatlarında narazılıq artmaqdadır.

Göründüyü kimi, yaranan vəziyyət iqtidarın ciddi qərarlar verməsini qaçılmaz edir. Əks təqdirdə qısa müddətdən sonra büdcədən maliyyələşən təşkilatlarda işləyənlər də narazılar ordusuna qoşulabilərlər.