17:58 / 22-05-2024
"Şamaxı" çempion olub
“Böyük Dəmir Çin Səddi” layihəsinə start verilir
Tarix: 13-03-2023 17:55 | Bölmə: İqtisadiyyat
“Böyük Dəmir Çin Səddi” layihəsinə start verilir

Çin lideri Si Cinpin ölkəsinin inkişaf sürətini qorumaq üçün qlobal təhlükəsizlikdə daha fəal rol oynayacağını bildirib.

Reyting.az
-ın xəbərinə görə, üçüncü hakimiyyət müddətinə başlayan Si Cinpin Ümumçin Xalq Nümayəndələri Konqresinin (ÜXK) Baş Assambleyasının bağlanış iclasında vurğulayıb ki, Çin özünün “milli oyanış”ını həyata keçirmək üçün inkişaf və təhlükəsizlik arasında tarazlıq yaratmalıdır.

Çinin çoxtərəfliliyi müdafiə edəcəyini, qlobal təhlükəsizlik təşəbbüslərini dəstəkləyəcəyini, gələcəkdə qlobal idarəetmə sisteminin islahatı və qurulmasında fəallıq göstərəcəyini bildirən S. Cinpin deyib ki, bu, dünya sülhünə müsbət enerji verməklə yanaşı ölkəsinin inkişafına əlverişli beynəlxalq şərait yaradacaq.

Milli təhlükəsizliyə hərtərəfli baxışın zəruriliyini vurğulayan S. Cinpin əlavə edib:

“Təhlükəsizlik inkişafın əsasıdır, sabitlik rifahın ilkin şərtidir. Çin milli təhlükəsizlik sistemini və milli təhlükəsizliyini qorumaq imkanlarını təkmilləşdirməlidir. İctimai təhlükəsizlik və sosial idarəetmə sistemini gücləndirməli, yeni inkişaf modelini yeni təhlükəsizlik arxitekturası ilə təmin etməlidir”.



Milli müdafiənin və “bütün cəbhələrin” inkişafının vacibliyini vurğulayan S. Cinpin diqqətə çatdırıb ki, Çin silahlı qüvvələri ölkənin suverenliyini, təhlükəsizliyini və inkişaf maraqlarını effektiv şəkildə qoruya bilən “Dəmir Böyük Səddə” çevrilməlidir.

Çinin “milli oyanış”ını həyata keçirmək üçün yüksək keyfiyyətli inkişafa diqqət yetirməli olduğuna işarə edən S. Cinpin, elm və texnologiya sahəsində özünü inkişafetdirmə və özünü təminetmənin vacibliyini vurğulayıb.

Çin lideri eyni zamanda ABŞ və Qərb ölkələrini “Çinin inkişafını boğmağa çalışmaqda” ittiham edib.

Çinin inkişafı ilə bağlı xarici şərtlərin sürətlə dəyişdiyini, qeyri-müəyyənlik və gözlənilməzliyin artdığını bildirən S. Cinpin deyib ki, ABŞ-ın rəhbərliyi altında Qərb ölkələri Çinə qarşı topdansatış mühafizə və təzyiq siyasəti həyata keçirir. Bu isə inkişaf səylərinə unikal maneələr yaradır.

Onu da qeyd edək ki, S. Cinpin Ümumçin Xalq Nümayəndələri Konqresində keçirilən səsvermədə yekdilliklə yenidən dövlət başçısı seçilib.

E. KAMAL
Reyting.az




Bölməyə aid digər xəbərlər
{sape_links}{sape_article}