Elçibəyin köməkçisi: “Firudin Cəlilov yalan danışır”
Tarix: 10-10-2019 10:25 | Bölmə: Xəbər lenti
Elçibəyin köməkçisi: “Firudin Cəlilov yalan danışır”

“Keçmiş təhsil naziri Firudin Cəlilovun müsahibəsindən indicə xəbər tutdum. Gop, yalan, böhtanın sərhəddinin pozulduğu müsahibəni təəccüblə oxusam da, gözlənilməz olmadı. Çünki professor Cəlilov əvvəllər də verdiyi bəzi müsahibələrdə Əbülfəz Elçibəyə qarşı etikaya uyğun olmayan formada qərəzini büruzə verib. O zaman xəstəliyini nəzərə alıb cavab verilməmişdi. Amma indi elə iddialar səsləndirib ki, şahidi və iştirakçısı olduğumuz yaxın tarixi saxtalaşdırmasına “Dur!” demək zərurəti yaranıb”.

Bu sözləri mərhum prezident Əbülfəz Elçibəyin köməkçisi Oqtay Qasımov sabiq təhsil naziri Firudin Cəlilovun test üsulunun Azərbaycana gətirilməsi ideyasının ona məxsus olması haqda fikirlərini şərh edərkən deyib.

Oqtay Qasımov əlavə edib ki, bu iddialar əsassızdır: “Firudin Cəlilov müsahibəsində “İndiyə qədər mən bu barədə danışmamışam. Amma görürəm ki, artıq danışmaq lazımdır”,- deyir. Adamdan soruşarlar, nə üçün Elçibəyin və Vurğun Əyyubun sağlığında yox, onların yoxluğunda danışmağa başlamısan? Rəhmətə gedənin arxasınca danışmaq, özü də yalan danışmaq hansı milli-mənəvi dəyərin göstəricisidir? Professor cəmiyyətdən ona yönələcək suallara yəqin ki, aydınlıq gətirər. Ona qədər bəzi məsələlərə açıqlıq gətirməyin faydalı olacağını düşündük.

Əvvəla, 1991-ci ilin avqustunda Elçibəyin təklifi ilə AXC tərəfindən Türkiyəyə göndərilən 50 tələbənin qəbul imtahanına rəhbərlik edən Vurğun Əyyuba sənədlərin hazırlanması və texniki işlərdə AXC qərargahının ştatlı işçisi kimi Ellada Məmmədli kömək edib. Prosesin yüksək səviyyədə və şəffaflıqla həyata keçirilməsi Elçibəy tərəfindən yüksək qiymətləndirilib və sonradan bu, V. Əyyubun TQDK-ya sədr təyin olunmasında əsas faktorlardan biri olub.

İkincisi, həm də universtitet müəllimi olan Elçibəy təhsil sahəsindəki problemləri yaxşı bilir, bu sistemdəki korrupsiya və rüşvətxorluğu aradan qaldırmağın yolunun test üsulunun tətbiqindən keçəcəyinə dərindən inanırdı. Misirdə işlədiyi vaxtdan bu barədə düşünmüş, sonrakı dövrlərdə Türkiyədən gələn təhsil mütəxəssisləri ilə bu mövzuda xeyli müzakirələr aparıb, test üsulunun tətbiqi məsələsini özünün seçki platformasına daxil edib. İdeyanın müəllifinin Elçibəy olduğunu çox sayda şahidlər təstiqləyə bilər.

Üçüncüsü, Əbülfəz Elçibəylə Firudin Cəlilovun münasibətləri 1991-ci ilə qədər yaxşı olsa da, o zaman Ali Sovetdə latın əlifbasına keçidlə bağlı aparılan müzakirələrdən sonra soyuqluq yaranıb. Belə ki, Elçibəy gələcəkdə yaranacaq vahid türk əlifbası məsələsində onunla həmrəy olduğunu bildirən Firudun müəllimə aralarındakı razılaşmanın Ali Sovetdəki müzakirələrdə yeni əlifbada nəzərə alınmasını təklif etməyi tövsiyə edir. O, isə bu söhbəti mərhum İsmayıl Şıxlıya çatdıraraq prosesə mane olduğundan Elçibəy bunu ona sonadək bağışlamadı. Hakimiyyət dönəmində prezident tərəfindən qəbul edilməyən nazirin onun qapısını çırpıb getmək uydurması sadəcə, gülüş doğurur və qeyri-ciddidir.

Firudun müəllimi Baş Nazirin müavini vəzifəsinə Elçibəy yox, Mütəllibov təyin edib və 18 may 1992-ci ildə Rəhim Hüseynov başda olmaqla Mütəllibovun 14 mayda təyin etdiyi bir çox şəxslərin təyinatı, əldə edilən razılaşmaya görə Ali Sovetdə təsdiqlənib. Elçibəyin Cəlilova soyuq münasibətinin nəticəsi və işindəki bəzi nöqsanlara görə Təhsil nazirliyi iki yerə ayrılıb və digər hissəsinə mərhum Tofiq Haciyev rəhbər təyin edilib.

Dördüncü, Firudun müəllimin yaddaşındakı problem ortada. Əvvəla TQDK Təhsil Nazirliyinə yox, birbaşa prezidentə tabe olduğundan bu qurumu onun yaratması fikri, yumşaq desək yalandır. Bu qurum Elçibəyin fərmanı ilə yaradılıb. Digər tərəfdən, Türkiyəyə göndərilən 2000 tələbə üçün ayrıca imtahan keçirilməsi fikri absurddur. Bütün tələbələr üçün imtahan bir dəfə keçirilib.

Firudun müəllimə xatırlatmaq istəyirəm ki, Prezidentin iradəsi, istəyi olmasa, istənilən nazir ən gözəl ideyasını belə həyata keçirə bilməz. Bu həm də Firudun müəllimə aiddir. Digər tərəfdən, cəmiyyətin gözü tərəzidir. Bunu da unutmaq lazım deyil”.

Reyting.azскачать dle 10.5фильмы бесплатно




Bölməyə aid digər xəbərlər
{sape_links}{sape_article}