COVİD-19-dan necə xilas oldum? - Professor yazır
Tarix: 23-07-2021 00:48 | Bölmə: Xəbər lenti
COVİD-19-dan necə xilas oldum?
Q. İsakov

İyul ayının 8-də axşam saatlarında temperaturum 38,8 dərəcə selsiyə yüksəldi. Dərhal təcili tibbi yardım çağırdıq. Yüksək temperaturuma rəğmən təzyiqim normal idi.

Təcili tibbi yardım həkimi burnumdan COVİD-19 testi üçün yaxma götürdü. Mən, dərhal Gürcüstanın Borjomi rayonunun Bakuriani kurortunun ailə həkimi, Bakuriani kurortunda Fövqəladə Halların Koordinasiyası və Təcili Yardım Mərkəzinin həkimi, qardaşım Gudsiyət İsakova zəng vurub, vəziyyətimi izah etdim.


G. İsakov

COVİD-19 xəstələrinin müalicəsi üzrə ixtisaslaşan qardaşım hazırda Borjomi rayonunda bu xəstəliklə mübarizənin ön cəbhəsində yer tutur. O, COVİD-19 xəstələrini Tbilisi, Borjomi, Gürcüstanın digər şəhər və rayon xəstəxanalarında yerləşdirməklə və ya onları öz evlərində müalicə etməklə məşğuldur.

Qardaşım dərhal müəyyən etdi ki, mən COVİD-19-a yoluxmuşam.

O, təcili olaraq temperaturu aşağı salan, immuniteti yüksəldən, qanda tromboların miqdarını aşağı salmağa kömək edən dərmanlar yazdı. Dərmanları qəbul etdim. Temperaturum aşağı düşdü. Əhvalım yaxşılaşmağa başladı.

İyulun 9-da COVİD-19 testimin nəticələri haqqında telefonuma rəsmi məlumat gəldi. Testimin nəticəsi müsbət idi. Yəni COVİD-19-a yoluxmuşdum.


V. Abdullayev

İyul ayının 9-dan bu günə kimi Binəqədi rayon 10 saylı poliklinika üzrə sahə həkimimiz Almira xanım da hər gün bir neçə dəfə vəziyyətimlə maraqlandı. 10 saylı poliklinikanın həkimləri evimizə dərmanlar gətirdilər. Almira xanım, qardaşım və Azərbaycanda tanınmış həkimlərdən olan kürəkənim Vaqif Abdullayev səhhətimlə gündəlik maraqlanıblar. Vaqif Abdullayev dərmanlarla təchiz edilməyimdə böyük işlər gördülər.

İndi mən tamamilə sağalmışam. Qardaşımla kürəkənimin mənim sağlamlığım üçün etdikləri işləri, zamanlarını mənə həsr etmələrini normal qohumluq əlaqəsi hesab edirəm.


Almira xanım

10 saylı Binəqədi rayon poliklinikasının həkimlərinin, sahə həkimimiz Almira xanımın gündə bir neçə dəfə vəziyyətimlə maraqlanmasını Azərbaycanda COVİD xəstələrinə güstərilən dövlət qayğısının təzahürü, Hippokrat andına sədaqəti ilə izah edirəm.

Mən bir daha əmin oldum ki, dünya öz peşəsinə hörmət edən, insana insani münasibət göstərən, həkimlərin, alimlərin, özünə hörmət edən məmurların, xalqını və vətənini sevən, öz missiyasını şərəflə yerinə yetirən dövlət başçılarının çiyinləri üzərində dayanır.

Son olaraq qeyd edim ki, bu yazını yazmaqda əsas məqsədim COVİD-19 xəstəliyinə tutulan şəxslərin çox tez bir zamanda diaqnozunun qoyulmasının və müalicələrin dərhal başlanmasının vacibliyidir. Yalnız belə olan halda COVİD-19-a yoluxanlar tez bir zamanda sağalar və xəstəliyi yüngül keçirərlər.

Prof.Dr. Qüdrət İsaqov

AMEA Fizika İnstitutunun əməkdaşı,
Avropa Təbiət Elmləri Akademiyasının (ATEA) akademiki,
Müstəqil Ekspert Qrupunun rəhbəri




Bölməyə aid digər xəbərlər
{sape_links}{sape_article}