Əməkdar artist Musiqili Teatra qayıdıb - Foto
Tarix: 03-12-2021 18:20 | Bölmə: Mədəniyyət
Əməkdar artist Musiqili Teatra qayıdıb

İstedadlı tenor, Akademik Opera və Balet Teatrının aparıcı solistlərindən olan Əməkdar artist Fərid Əliyev bundan sonra yaradıcılıq fəaliyyətini Azərbaycan Dövlət Akademik Musiqili Teatrında davam etdirəcək.

Bu barədə Reyting.az-a Musiqili Teatrdan məlumat verilib.

2011-ci ilə qədər Akademik Musiqili Teatrın həm rus, həm də Azərbaycan bölmələrində səhnələşdirilən “Şən dul qadın” (F.Leqar), “Maritsa” (İ.Kalman), “Silva” (İ.Kalman), “Çılğın qaskoniyalı” (Q.Qarayev), “Talelər qovuşanda” (R.Hacıyev), “O olmasın, bu olsun”, “Arşın mal alan” (Ü.Hacıbəyli) kimi tamaşalarda əsas partiyaları ifa edən Əməkdar artist bu teatra dönüşünü səhnə fəaliyyətinin yeni mərhələsi adlandırıb və xoş təəssüratlarını bölüşüb:

“Akademik Musiqili Teatrın yaradıcı kollektivinin son uğurları məni hədsiz sevindirir və bu teatra cəlb edən əsas səbəblərdən biri də teatrın repertuarında olan yeni tamaşalardır. Həmin səhnə əsərlərində özümü müxtəlif obrazlarda görmək istəyim məni bu qocaman sənət ocağına yenidən qaytardı. İllər əvvəl qaldığım yerdən daha inamla və böyük həvəslə fəaliyyətimi davam etdirmək niyyətindəyəm”.

F. Əliyev deyib ki, indiyə qədər Akademik Opera və Balet Teatrında çalışıb, 30-dan çox tamaşada müxtəlif partiyaları ifa edib: “Amma Musiqili Teatrın yeri qəlbimdə tam başqadır. Məni elə ilk gündən belə isti və doğma qarşılayan teatrın rəhbərliyi və kollektivinə dərin təşəkkürümü bildirirəm. Hazırda "Cehizsiz qız" (A.Ostrovski) tamaşasında mənə yenicə həvalə olunan obrazın üzərində məşqlərimə başlamışam. Yaradıcı kollektivimizə uğurlar arzulayıram”.





Bölməyə aid digər xəbərlər
bütün xəbərlər
bütün xəbərlər
{sape_links}{sape_article}