17:38 / 28-03-2024
Əməkdar artist vəfat edib
Professor: “Azərbaycan həssas mərhələyə daxil olub”
Tarix: 03-12-2020 18:01 | Bölmə: Siyasət
Professor: “Azərbaycan həssas mərhələyə daxil olub”

“44 günlük Vətən müharibəsi başa çatdı. Dekabrın 1-nə qədər problemin birinci mərhələsi müşahidə olunurdu, artıq ikinci mərhələ başlayıb. İkinci mərhələ ilə birinci mərhələnin fərqi ondadır ki, birinci mərhələdə əsas problem hərb meydanında baş verirdi, ikinci mərhələdə əsas savaş diplomatik sahədə - masa arxasına gedəcək. Məncə, bütün dövlət qurumları bu prosesə cəlb edilməlidir. Çünki biz həssas mərhələyə daxil olmuşuq. İndi çox ehtiyatlı olmalıyıq. Qələbənin sevincini ancaq dost ölkələr yaşaya bilər, amma qələbəni həzm edə bilməyənlər də çoxdur”.

Bu fikirləri Reyting.az-a Azərbaycanın keçmiş təhsil naziri, Milli Məclisin sabiq üzvü Firudin Cəlilov deyib.

Professorun fikrincə, prosesə ətraflı nəzər saldıqda, aydın olur ki, bizim nəzərdə tutduğumuz və arzuladığımız məsələlərin həllində qarşımıza böyük maneələr çıxa bilər. Bu səbəbdən də böyük qələbənin gətirdiyi böyük nigaranlıq da var:

“Rus qoşunlarının sülhməramlı adı ilə gəlməsi. Qondarma qurumun tam olaraq bizim nəzarətimizə keçməməsi, bu gün orada əli silahlı terrorçuların olması kimi hallar var. Narahatlıq törədən məsələlər çox olduğundan təklif edirəm ki, bundan sonra qrafik tutulmalı və icra edilməlidir.

44 gündə xalqımız yumruq kimi idi, müxalifət iqtidarın arxasında idi. Bu yumruğun boşalmasına imkan vermək lazım deyil. Əgər buna qədər bütün problemlər bir nəfərin çiynində idisə, bundan sonra hamı çiynini bu yükün altına verməlidir. Müxalifət, müstəqil təşkilatlar, ictimai qurumlar və s. Heç kim Qarabağ məsələsində birləşən yumuruğun açılamasına imkan verməməlidir. Qarabağ məsələsi ətrafında birlik və həmrəylik davam etməlidir”.

F. Cəlilov əlavə edib ki, dövlət qurumları buna qədər gündə 8 saat işləyirdisə, bundan sonra 10-12 saat iş başında olmalıdır: “Xüsusilə, Qarabağla bağlı işləyən qurumlar. İşğaldan azad edilən 7 rayonun Bakıda və digər ərazilərdə icra qurumları, idarələri var. Onlar da qeyd etdiyim qrafiklə rayonlarına çatmalı və qaçqınlarla bağlı bütün problemləri həll etməlidir. Qaçqınlarla iş üzrə Dövlət Komitəsi də gecə-gündüz işləməlidir. Həmçinin ermənilərin Qarabağda olduğu məntəqələrə yaxın kəndlər məskunlaşdırılmalıdır. Laçın dəhlizinin Ermənistandan başladığı yerdə Azərbaycan Sərhəd Qoşunlarının əsgərləri durmalıdır. Azərbaycan sərhədinə daxil olan insanların pasportu yoxlanılmalıdır. Bunlar ciddi məsələlərdir və gecikdirmək olmaz. Əlbəttə, yol Laçın şəhərindən keçir, yeni yolun inşaası üçün vaxt lazımdır. Amma biz həmin yolun çəkilişini gözləməli deyilik. Xalq bu məsələlərdə səfərbər olmalıdır. Biz daima düşmən tərəfinin nə düşündüyünü, hansı addımlar atacağını analiz etməliyik”.

Sabiq nazirin dediyinə görə, elə məqamlar var ki, onu dilə gətirə, detallar üzərində durmaq istəmir. Məsələn, türk ordusunun hələ də niyə gəlmədiyi, gələrsə hansı addımlar atacağı və s.

F. Cəlilov sonda qeyd edib ki, xalqda Rusiya sülhməramlıları ilə bağlı, onların başqa işlər görəcəyinə dair narahatlıqların olması anlaşılandır: “Amma xalqımız unutmasın ki, rus sülhməramlıları bura müəyyən müddətə gəlib. Bizdən fərqli olaraq rus sülhməramlılar hara gedibsə, müddətsiz gedib. Məsələn, Gürcüstana, Moldovaya və digər yerlərə. Bizdə isə onlara konkret müddət qoyulub. Həm də burada onlara alternativ türk ordusu olacaq. Üstəlik, Naxçıvana yolun açılması da çox müsbətdir. Bundan Azərbaycan və Türkiyə udur. Sabah İranın, Ermənistanın da bura qoşulması məsələsi ola bilər. Bütün bu məsələlər ölülüb-biçilməlidir. Həssas məqam olduğuna görə, nəyi deyib, nəyi deməməyimizin fərqində olmalıyıq. Ümumilikdə isə qarşıda çox ağır işlər var. Odur ki, 2-3 il əl-qolumuzu çırmalıyıb ciddi çalışmalıyıq”.

Reyting.az




Bölməyə aid digər xəbərlər
17-03-2024, 12:16 “Kompas” səmtini azıb

{sape_links}{sape_article}