ABŞ prezidenti Donald Tramp aprelin ilk həftəsində Çin lideri Si Cinpinlə zirvə görüşü üçün Pekinə səfər edəcək.

Reyting.az “Politico” nəşrinə istinadla xəbər verir ki, Donald Trampın planları ilə tanış olan üç mənbə məlumatı təsdiqləyib. Lakin Ağ evin sözçüsü səfər tarixlərinin hələ müəyyən edilmədiyini bildirib.

Yeri gəlmişkən, 2025-ci ilin oktyabrında Cənubi Koreyada keçirilən zirvə görüşündən sonra Tramp apreldə Çinə səfər etmək niyyətini açıqlayıb.

Həmçinin qeyd etmək lazımdır ki, iki lider ötən həftə telefonla danışıblar. Hesab edilir ki, söhbət növbəti səfərə hazırlıq xarakteri daşıyır. Söhbət zamanı ticarət məsələlərindən tutmuş xarici münaqişələrə qədər müxtəlif məsələlər müzakirə olunub.

Rəsmi mənbələrə görə, Donald Tramp bildirib ki, Si Cinpinlə söhbəti zamanı liderlərin 2025-ci ilin oktyabrında Cənubi Koreyada keçirilən görüşdə müzakirə etmədikləri Tayvan mövzusunu da müzakirə ediblər.

Qeyd olunur ki, yaz danışıqlarında Tayvan məsələsi də müzakirə oluna bilər.

Çin Xarici İşlər Nazirliyinin məlumatına görə, Si Cinpin Tayvan məsələsinin Çin-ABŞ münasibətlərində ən vacib məsələ olduğunu vurğulayıb: “Tayvan Çinin ərazisidir. Çin öz suverenliyini və ərazi bütövlüyünü qorumalıdır. Çin heç vaxt Tayvanın ayrılmasına icazə verməyəcək. ABŞ Tayvana silah satmaqda ehtiyatlı olmalıdır".

"Politico" yazır ki, qarşıdan gələn sammit iki lider arasında 2026-cı ildə keçiriləcək dörd görüşün birincisi ola bilər. ABŞ maliyyə naziri Skott Bessentin sözlərinə görə, Si Cinpinin Donald Trampla bu yay Vaşinqtonda və ya Mar-a-Laqoda görüşməsi də mümkündür. Liderlər həmçinin Mayamidə keçiriləcək G20 sammitində və Çinin Şençjen şəhərində nəzərdə tutulan APEC (Asiya-Sakit Okean İqtisadi Əməkdaşlıq) çərçivəsində görüşə bilərlər.

Y. QACAR