Rusiya, ehtimal ki, Avropada, xüsusən də Baltikyanı ölkələr və ya qonşularından birinə qarşı yeni hərbi münaqişələrə hazırlaşır.

Reyting.az xəbər verir ki, bu, Münhen Təhlükəsizlik Konfransının müəlliflərinin Amerikanın Avropa üçün “təhlükəsizlik çətiri”nin sonu barədə xəbərdarlıq etdiyi yeni hesabatında bildirilir.

Sənəddə qeyd olunur ki, ABŞ prezidenti Donald Trampın ikinci administrasiyası Avropa təhlükəsizliyi üçün məsuliyyətin NATO-nun Avropadakı üzvlərinin üzərinə düşməli olduğunu açıq şəkildə bəyan edib. Xüsusilə, ABŞ müdafiə naziri Pit Haqset 12 fevral 2025-ci ildə Təmas Qrupunun iclasında Avropanın təhlükəsizliyinin təmin edilməsinin avropalılar üçün prioritet olmasının vacibliyini deyib.

Vaşinqtonun yeni doktrinasına görə, Avropa ölkələri Ukraynaya həm ölümcül, həm də ölümcül olmayan yardımın “əksəriyyətini” öz üzərinə götürməlidir.

Hesabata görə, 2025-ci ilin yanvar ayından ABŞ-nın hərbi dəstəyi kəskin şəkildə azalıb və Vaşinqton Avropa İttifaqının (Aİ) ticarət güzəştləri ilə birlikdə təhlükəsizlikdən getdikcə iqtisadi təzyiq vasitəsi kimi istifadə edir.

Bu fonda analitiklər Kremlin aqressiv siyasətini gücləndirdiyini düşünürlər. Rusiya iqtisadiyyatını tamamilə hərbi əsasa keçirib, federal büdcənin təxminən 40 faizini müdafiəyə xərcləyib və Ukraynaya qarşı müharibədə maksimalist məqsədlərindən əl çəkməyib.

Hesabat müəllifləri kəşfiyyat məlumatlarına istinadla bir neçə potensial ssenariyə işarə edirlər:

Ukraynada mümkün atəşkəsdən iki il sonra Baltikyanı ölkələrdə regional müharibə başlaya bilər;

Rusiyanın qonşularından birinə qarşı lokal münaqişə mümkündür - altı ay ərzində.

Həmçinin qeyd olunur ki, Moskva artıq Avropada hibrid kampaniyasını gücləndirib. Buraya enerji infrastrukturuna qarşı sabotaj və 2025-ci ilin sentyabr ayında Polşa və Estoniyanın hava məkanının pozulması daxildir.

Bildirilir ki, ABŞ getdikcə müttəfiq deyil, “hakim” kimi çıxış edir.

Avropa ölkələrinin müdafiə büdcələrini ümumilikdə 41 faiz artırmasına baxmayaraq, hesabat müəllifləri bu addımları qeyri-kafi hesab edirlər. AB daxilində vahid müdafiə sistemi yaratmaq əvəzinə, dövlətlər Vaşinqtonun sədaqətini qorumaq üçün Amerika silah sistemlərini, xüsusən də “F-35” və “Patriot” almağa davam edərək “sənaye millətçiliyi” yolunu tutublar.

Hesabatı yekunlaşdıran analitiklər xəbərdarlıq edirlər ki, daha da tərəddüd və strateji qərarların olmaması Avropanı müxtəlif təsir dairələri arasında “boz zonada” qoya və tədricən onun öz gələcəyini müstəqil şəkildə müəyyən etmək qabiliyyətini sarsıda bilər.

N. ORUCOV