BQXK qarşısında məsələ qaldırıldı: “Girovluqdakı azərbaycanlılar üçüncü ölkəyə köçürülsün”
Tarix: 14-08-2020 17:52 | Bölmə: Siyasət
BQXK qarşısında məsələ qaldırıldı: “Girovluqdakı azərbaycanlılar üçüncü ölkəyə köçürülsün”

Qarabağ Azadlıq Təşkilatının (QAT) sədri Akif Nağı, QAT Ali Məclisin sədri Barat İmani, QAT idarə heyətinin üzvü Sahib Musayev Beynəlxalq Qırmızı Xaç Komitəsinin (BQXK) Bakı nümayəndəliyində olub, qurumun ictimaiyyətlə əlaqələr şöbəsinin müdiri İlahə Hüseynova və Saxlanılanlara baş çəkmə qrupunun üzvü Elem Xayrulinlə görüşüblər.

Reyting.az
xəbər verir ki, bu gün reallaşan görüşdə QAT sədri Akif Nağı erməni girovluğunda saxlanılan Dilqəm Əsgərov və Şahbaz Quliyevlə bağlı cəmiyyətin narahatlıq və narazılığını qurum nümayəndəliyinin diqqətinə çatdırıb.

Akif Nağı BQXK-nin nümayəndələrinə deyib ki, işğalçı Ermənistanın əsir və girovlarla qeyri-insani davranışı hər kəsə məlumdur:

“Pandemiya şəraitində Dilqəm Əsgərov və Şahbaz Quliyevin həyatı üçün təhlükələr daha da artıb, üstəlik, cəbhənin Tovuz istiqamətində son gərginliklə bağlı onlara qarşı münasibətdə ermənilərin son dərəcə qəddar hərəkət etdikləri heç kəsdə şübhə doğurmur. Ona görə də istəyirik ki, BQXK rəhbərlik səviyyəsində daha ciddi addımlar atsın, onların ən azından 3-cü ölkəyə köçürülməsi üçün tədbirlər görsün”.

Sahib Musayev həm QAT İdarə heyətinin üzvü, həm də Dilqəm Əsgərovun qardaşı kimi həyacanını gizlətmədən diqqəti bir sıra məqamlara yönəldib: “Biz bütövlükdə BQXK-nin fəaliyyətini müsbət dəyərləndiririk. Amma bir neçə vacib məqamla bağlı gözləntilərimizi, istəyimizi, narazılığımızı dilə gətirməliyik.

Birincisi, son 4 il ərzində Dilqəmdən foto və ya video görüntülər ala bilməmişik. Onun real vəziyyəti, sağlamlıq durumu ilə bağlı heç bir məlumatımız yoxdur.

İkincisi, bir neçə dəfə bizim oraya səfər edib qardaşımızla görüşmək məsələsi gündəmə gəlib, amma nə üçünsə baş tutmayıb. Məsələn, Rusiya və Ukrayna arasında bu cür yaxınların görüş səfərləri Beynəlxalq Qırmızı Xaç Komitəsinin vasitəsilə təşkil edilib. Amma bizim səfərlərimiz təşkil olunmur”.

Barat İmani qeyd edib ki, ermənilərin əsir və girovlara işgəncə verməsi məlum məsələdir. Dilqəm və Şahbaz bu barədə BQXK-nin nümayənədlərinə ermənilərdən ehtiyat edərək bir söz deyə bilməzlər. Komitə əməkdaşları işgəncə faktlarını aşkar etmək üçün özəl formalardan istifadə etməlidir.

Sonda QAT sədri bir daha vurğulayıb ki, BQXK-dən öz imkanlarını ciddi şəkildə işə salaraq D. Əsgərov və Ş. Quliyevin üçüncü ölkəyə köçürülməsinə nail olmasını gözləyirik.

BQXK-nin nümayəndələri QAT rəhbərliyinin təklif və fikirlərini dinləyib, qeydlərini aparıblar.

Reyting.az




Bölməyə aid digər xəbərlər
bütün xəbərlər
bütün xəbərlər
{sape_links}{sape_article}