İcra başçısı sahibkarı rayondan didərgin salıb - Müraciət
Tarix: 26-01-2021 00:28 | Bölmə: Slayd
İcra başçısı sahibkarı rayondan didərgin salıb

Tərtər rayonunun icra başçısı Müstəqim Məmmədovdan narazı sakinlərin sayı artır. Belə şəxslərdən biri də rayonun Əskipara kənd sakini, Yeni Azərbaycan Partiyasının üzvü, Qarabağ Azadlıq Təşkilatının Tərtər rayon şöbəsinin rəhbəri Babək Yolçu oğlu Sadıqovdur.

Babək Sadıqov Reyting.az saytı vasitəsilə Azərbaycan Respublikasının Prezidentinə müraciət edib, ondan kömək istəyir.

O, dövlət başçısına müraciətində yazır ki, sahibkarlıq fəaliyyəti ilə məşğuldur və 5 ildir fermer təsərrüfatı qurub. Əsas fəaliyyəti əkinçilikdir. Pambıq, şəkər çuğunduru, günəbaxan, qarğıdalı və digər bu kimi bitkilər becərir. Yazdığına görə, yaratdığı təsərrüfatda yüzlərlə kənd sakini çalışır, ailəsi üçün çörəkpulu qazanır.

B. Sadıqov xeyriyyəçiliklə də məşğul olduğunu bildirir:

“Aprel döyüşlərində və İkinci Qarabağ savaşı dövründə Azərbaycan Ordusuna maddi yardımlar etmişəm və lazım gələrsə, öz köməkliyimi əsirgəməyəcəm, xalqıma, dövlətimə bağlı bir insan kimi əlimdən gələni edəcəyəm”.

B. Sadıqov müraciətində daha sonra yazır:

“Hörmətli cənab Prezident!

Sizin apradığınız siyasəti dəstəkləyir, Ali Baş Komandan kimi Sizinlə qürur duyuram. Sizə güvənib, Sizə arxalanıb təmas xəttində 2015-ci ildən bu günədək sahibkarlıqla məğul olmağa başlamışam. Amma Tərtərin icra başçısı Müstəqim Məmmədov mənə qarşı qərəzlidir, bütün işlərimi dayandırmağa, el arasında məni nüfuzdan salmağa çalışır. M. Məmmədov vəzifəsinə uyğun olmayan hərəkətlərə yol verir, məni təhqir edir, əxlaqa sığmayan ifadələr işlədir, kənd əhalisini üzərimə qaldırmağa çalışır. O, hüquq-mühafizə orqanlarına məni cinayətkar kimi təqdim edir. Amma mən cinayətkar deyil, sahibkaram. Ən azından yaratdığım təsərrüfatda yüzlərlə insan çalışır. Amma icra başçısı bunu da nəzərə almır”.

Tərtər sakin xatırladır ki, Ulu öndərimiz Heydər Əliyev 1997-ci ildə ölkədə torpaq islahatları aparıb, kənd sakinlərinə pay torpağı verilib: “Göstəriş verildi ki, yararlı ərazilər əkin sahəsinə, yararsız sahələr maldarlıq üçün otlaq sahəsinə verilsin. Otlaq sahəsini isə əkmək qadağandır. Amma M. Məmmədov və onun dəstəsi mənim vətəndaşlardan aldığım 7 hektar 92 sot ərazinin xəritəsində dəyişiklik edərək, əkinə yararsız sahə kimi göstəriblər.

Nəzərinizə çatdırıram ki, M. Məmmədov bələdiyyə və gənc ailələr üçün ayrılmış ərazilərin hektarını 300-400 manata satdırır. O, belə qanunsuz əməlləri ilə məni və kəndin digər sakinlərini dövlətin siyasətindən narazı salmağa çalışır. Amma biz bilirik ki, Siz xalqımız, dövlətimiz üçün gecə-gündüz çalışır, bizim yaxşı yaşamağımızı istəyirsiniz.

Cənab Prezident!

Tərtərin icra başçısı məni evimdən, işimdən didərgin salıb, həbslə təhdid edir. Mən onun şərindən qorunmaq üçün ölkənin müxtəlif rayonlarında gizlənməyə məcburam.

Fevral ayının 1-dən orta məktəblərdə dəsrlər başlayır, mənim 4 azyaşlı övladım məktəbə getməlidir. Mənim övladlarım isə ata üzünə həsrət qalıblar. Mən uşaqlarımdan əyani formada xəbər tuta bilmirəm. Belə yaşayışla necə layiqli vətəndaş, necə igid əsgər böyüdə bilərəm?

Mənə məxsus torpağın geri alınması üçün bu illər ərzində bütün qurumlara müraciət edirəm, amma M. Məmmədovun tapşırığı ilə heç bir qurum mənim problemimi həll etmir, əksinə, mənə hədə-qorxu gəlir, təzyiq göstərirlər. Sizdən xahiş edirəm ki, mənim 7 hektar 90 sot torpağımın mənə qaytarılmasına köməklik edəsiniz və təhlükəsizliyimin təmin olunmasına göstəriş verəsiniz".

P.S: Redaksiya əməkdaşlarının icra başçısı M. Məmmədovla əlaqə saxlamaq cəhdləri alınmayıb. Onun da mövqeyinə hörmətlə yanaşır və məsələyə münasibətinə yer ayırmağa hazırıq.




Bölməyə aid digər xəbərlər
bütün xəbərlər
{sape_links}{sape_article}