“Rusiya Zəngəzur dəhlizinin açılmasında ona görə maraqlıdır ki...” - Deputat
Tarix: 02-03-2021 09:51 | Bölmə: Slayd
“Rusiya Zəngəzur dəhlizinin açılmasında ona görə maraqlıdır ki...”

“İndi Ermənistan çox ağır vəziyyətdədir. Ermənistanın dünənində olan hərbi cinayətkarlar beynəlxalq tribunal qarşısında cavab vermək əvəzinə yenidən hakimiyyətə qayıtmaq haqqında düşünürlər. Onlar müharibə formatından zənginləşmək üçün istifadə etmək istəyirlər. 20 ildən artıq hakimiyyətləri dövründə onlar bu məqsədlərini dünyaya nümayiş etdiriblər. Onların əlləri həm Azərbaycan, həm də erməni xalqının qanına batıb. Onlar mütləq cəzalarını almalıdırlar. Almasalar, regionda stabilliyi pozmaq, yenə də müharibəni canlandırmağa çalışacaqlar”.

Bu sözləri Reyting.az-a Milli Məclisin deputatı Asim Mollazadə Ermənistanda müşahidə olan hakimiyyət uğrunda amansız mübarizəni şərh edərkən deyib.


A. Mollazadə

Asim Mollazadə qeyd edib ki, Ermənistanın daxilindəki problemlər bölgədə yeni sistemin yaradılmasına mane olur:

“Azərbaycanın revanşistlərə layiq olduğu cavabı vermək üçün dəmir yumruğu var. Lakin stabillik pozulan yerdə inkişafa problemlər yaranır.

Azərbaycanın böyük nəqliyyat layihələrinin, böyük qayıdış planlarının qarşısını almaq istəyən qüvvələr bilməlidir ki, Azərbaycanın və onun dostlarının, müttəfiqlərinin yetərincə gücü var ki, revanşistlərin cavabını versin. Problem məhz Erməmistanda olacaq, onlar faciə ilə üzləşəcəklər. Sülh və əməkdaşlıq əvəzinə müharibəyə başlasalar, Ermənistan bir dövlət kimi xəritədən silinə bilər. Ona görə də, mənə elə gəlir ki, Ermənistanın imkanı çatacaq ki, öz gələcəyinə soyuqqanlı baxıb hərbi cinayətkarların qarşısını alsın”.

Ermənistan-Rusiya münasibətlərindən də söz açan deputat əlavə edib ki, Rusiya sülh planından məmnundur: “Əslində Rusiya maraqlıdır ki, Zəngəzur dəhlizi açılsın və rusların imkanları genişlənsin. Çünki Rusiya əlavə xərclərdən və “baş ağrısından” başqa Ermənistandan heç nə qazanmayıb. Odur ki, Paşinyan bu məsuliyyəti üzərinə götürərək üçtərəfli sazişin icrasını sona çatdırsa, Rusiya bundan razı qalar.

Ermənistanın da başqa şansı yoxdur. Region ölkələri ilə əməkdaşlıq qursalar, ərazi iddialarına son qoysalar, bizim yaratdığımız platformalara qoşulsalar Rusiya da bundan bəhrələnər. Çünki Rusiya beynəlxalq sanksiyaların acısını hazırda ciddi şəkildə hiss edir”.

Reyting.az




Bölməyə aid digər xəbərlər
bütün xəbərlər
{sape_links}{sape_article}