10:30 / 12-05-2021
Azərbaycan nefti bahalaşıb
Elçin Şıxlı: “Rusiya dünyanın diqqətini yayındırmağa çalışır”
Tarix: 21-04-2021 17:22 | Bölmə: Slayd
Elçin Şıxlı: “Rusiya dünyanın diqqətini yayındırmağa çalışır”

“Rusiya Müdafiə naziri cənab Şoyqunun son açıqlaması blefə daha çox oxşayır. Çünki bu saat Rusiya əsas qüvvəsini Ukrayna istiqamətinə yönəldib. Bəllidir ki, ruslar Qara dənizdə təlimlər keçir, aprelin 20-dən 24-nə qədər Krım ətrafını və Qara dəniz hövzəsini uçuşsuz zona elan edib. İndi ABŞ və NATO-nun da əsas diqqəti Ukraynadadır”.

Bu fikirləri Reyting.az-a siyasi analitik Elçin Şıxlı Rusiya Müdafiə naziri Sergey Şoyqunun son çıxışını qiymətləndirərkən deyib.

Xatırladaq ki, general Şoyqu, Şimali Atlantika Alyansının (NATO) bir sıra Qafqaz və Yaxın Şərq ölkələrində vəziyyətin normallaşmasına qarşı çıxmaq cəhdləri səbəbi ilə Rusiyanın Cənub Hərbi Dairəsi (CHD) qoşunlarının döyüş qabiliyyətinin artırıldığını bildirib.

S. Şoyqu əlavə edib ki, Yaxın Şərq regionunun və Qafqazın bir sıra ölkələrində qeyri-stabil vəziyyət müşahidə olunur. Ona görə də, alyansın vəziyyətin normallaşmasına müqavimət göstərmək cəhdləri Rusiyanı simmetrik olaraq strateji məhdudlaşdırma tədbirləri görməyə və Cənub Hərbi Dairəsi qoşunlarının döyüş qabiliyyətini artırmağa məcbur edir. Onun sözlərinə görə, Cənub Hərbi Dairəsində daha bir motoatıcı diviziya yaradılıb.

Elçin Şıxlı isə deyir ki, diqqət Ukraynadadır: “Ukrayna da bəyan edir ki, artıq ordumuz var, əgər Rusiya ərazimizə girsə, 2014-cü ildəki kimi olmayacaq.

Sakaaşvili də açıq elan edir ki, baş verənlər 2008-ci ildə Gürcüstana rusların işğala başlaması vəziyyətini xatırladır. Amma indi 2008-ci ildəki ab-hava deyil, dünya dəyişib. Polşadan tutmuş İngiltərəyə qədər bütöv Avropa, ABŞ ciddi müqavimətə hazırdır. Belə olan halda Qafqazda və Yaxın Şərq ölkələrində ciddi problem yoxdur. Ruslar sadəcə, fikir yayındırmaq istəyirlər. Onlar dediklərini Ukraynada vəziyyət sabitləşdikdən sonra edə bilərlər”.

E. Şıxlı xatırladıb ki, II Dünya müharibəsində SSRİ ikinci cəbhənin açılmasını gözləyirdi: “Almaniyanın müttəfiqi Yaponiya Uzaq Şərqdə hücuma keçmədi, bu da SSRİ-yə imkan verdi ki, oradakı qoşunlarını Qərb cəbhəsinə atsın. İndi Rusiya blef edərək dünyanın diqqətini yayındırmağa çalışır. Rusiya indiki iqtisadi vəziyyətində iki cəbhədə müharibə apara bilməz”.

E. Şıxlı əlavə edib ki, əgər Rusiya Cənub Hərbi Dairəsinin qüvvələrini gücləndirsə, Türkiyə də adekvat addımlar atacaq: “Pakistanla həm Türkiyənin, həm də Azərbaycanın əlaqələri yaranacaq. Unutmaq lazım deyil ki, Pakistan nüvə dövlətidir. Zənnimcə, Şoyqu vaxt udmaq və fikir yayındırmaq istəyir. Amma bu onların gələcək planlarında ola bilər. Əgər Ukraynada istədiklərini edə bilsələr, bu tərəfə də keçmək üçün planları olacaq. Amma bu, indiki vəziyyətdə ağlabatan deyil”.

Reyting.az




Bölməyə aid digər xəbərlər
bütün xəbərlər
{sape_links}{sape_article}