Avropa Məhkəməsi Eldar Həsənovla bağlı Bakıya sorğular göndərib
Tarix: 29-04-2021 23:59 | Bölmə: Slayd
Avropa Məhkəməsi Eldar Həsənovla bağlı Bakıya sorğular göndərib

Azərbaycanın sabiq baş prokuroru, keçmiş səfir Eldar Həsənovun vəkilləri Adəm Məmmədov, Cavad Cavadov, Cəlil Mirzəyev və Valeh Mehrəliyev aprelin 14-də prezident İlham Əliyevə müraciət etmişdilər.

Müraciətdə qeyd olunurdu ki, Eldar Həsənovun səhhəti ciddi formada ağırlaşıb, onun həyatı təhlükədədir, amma iki aya yaxındır müayinə və tibbi yardım üçün müxtəlif xəstəxanalardan ixtisaslaşmış həkimlərin istintaq təcridxanasına dəvət olunması barədə verilmiş vəsatətlər, müraciətlər konstitusiyaya, humanizm prinsiplərinə, beynəlxalq hüququn normalarına zidd olaraq nəticəsiz qalıb: “Həmçinin son altı ay ərzində dəfələrlə Eldar Həsənovun Bakı şəhərində ixtisaslaşmış xəstəxanalarda əməliyyat olunmasına dair verilmiş vəsatətlər, şikayətlər heç bir qanuni əsas gətirilmədən rədd edilib.

Son altı ildə yeddi ağır cərrahi əməliyyat keçirən, hazırda onurğa problemlərindən iflic ərəfəsində olan, dəhşətli ağrılar keçirən, davamlı ürək ağrıları ilə müşayiət olunan şəkərli diabetdən əziyyət çəkən Eldar Həsənov istintaq qrupunun bu cür qeyri-insani münasibətini səhhətinə, sağlamlığına, yaşamaq hüququna yönəlmiş qəsd kimi qiymətləndirir”.

Reyting.az-ın Novator.az-a istinadla verdiyi məlumata görə, aprelin 29-da vəkil Cavad Cavadov sosial şəbəkədə yaydığı açıqlamasında bildirib ki, onun və digər vəkillərin 14 aprel müraciəti də bir nəticə verməyib: “Çox təəssüflər olsun ki, həmin müraciətin əks-sədasını görə bilmədik. Eldar Həsənovun səhhəti isə getdikcə ağırlaşır, onun sağlıq durumunu sözlə izah etmək mümkün deyil.

Vəkil olaraq utanıram ki, Baş Prokurorluğun İstintaq İdarəsi adekvat tibbi yardım göstərilməsinə bu cür biganə münasibət göstərir. Həmçinin utanıram ki, sadə humanitar məsələni ölkə daxilində hüquqi müdafiə vasitələri ilə həll etmək mümkün olmur”.

Cavad Cavadov xatırladıb ki, Eldar Həsənov həbsinin ilk günündən onunla bağlı məsələnin ölkə daxilində, hüquqi müstəvidə həllini tapmasını istədiyini bəyan edib.

Lakin Cavad Cavadov mövcud durumda onun və digər vəkillərin Avropa İnsan Hüquqları Məhkəməsinə müraciət etmək məcburiyyətində qaldığını vurğulayıb: “Müraciətdə Eldar Həsənovun özəl tibbi klinikalarda müayinədən keçməsi, müayinə üçün özünün seçdiyi həkimlərin dəvət olunması və həkimlərin hələ onun həbsindən qabaq planlaşdırdığı əməliyyatların reallaşdırılması üçün qərar qəbul olunmasını xahiş etmişik”.

Cavad Cavadovun sözlərinə görə, ötən həftədən müraciəti araşdırmağa başlayan Avropa Məhkəməsi Azərbaycan hökumətinə sorğular göndərib və sorğuların qısa müddətdə cavablandırılmasını tələb edib.

Cavad Cavadov qeyd edib ki, səkkiz aydan çoxdur həbsdə saxlanan Eldar Həsənov barəsində seçilmiş həbs qətimkan tədbirinin daha üç ay artırılmasına hazırlıq görülür.

Xatırladaq ki, 1955-ci il oktyabrın 10-da Kəlbəcər rayonunun Laçın kəndində doğulan Eldar Həsənov indiki Azərbaycan Texniki Universitetini elektronika mühəndisi ixtisası, SSRİ Daxili İşlər Nazirliyinin Akademiyasını hüquqşünas ixtisası ilə bitirib.

1977-ci ildən Azərbaycanın Daxili İşlər Nazirliyi sistemində çalışıb, müfəttiş, baş müfəttiş, cinayət-axtarış şöbəsinin rəis müavini, rəisi postlarını tutub, Bakının Nizami rayonunun, Gəncə şəhərinin milis rəisi, İnterpolun Milli Mərkəzi Bürosunun rəisi, daxili işlər nazirinin birinci müavini olub.

1993-1995-ci illərdə baş prokurorun birinci müavini, 1995-2000-ci illərdə baş prokuror vəzifəsində xidmət edib. Ədliyyə general-leytenantıdır.

2001-ci il martın 28-dən Eldar Həsənov Azərbaycanın Rumıniyada fövqəladə və səlahiyyətli səfiri olub, 2009-cu il sentyabrın 14-dən ölkəni həmçinin Serbiyada, 2010-cu il iyulun 28-dən eyni zamanda Monteneqroda, həmin il avqustun 31-dən həmçinin Bosniya və Herseqovinada təmsil edib. 2013-cü il martın 28-də onun Rumıniyadakı təmsilçiliyinə xitam verilib.

2020-ci il iyulun 3-dən Dövlət Təhlükəsizliyi Xidməti Xarici İşlər Nazirliyində istintaq-əməliyyat tədbirləri aparıb, bir neçə məmur cinayət məsuliyyətinə alınıb.

İyulun 16-da prezident İlham Əliyev xarici işlər naziri olan Elmar Məmmədyarovu vəzifədən azad edib, Ceyhun Bayramov xarici işlər naziri təyin olunub.

Avqustun 13-də açıqlama yayan Dövlət Təhlükəsizliyi Xidməti bildirib ki, Xarici İşlər Nazirliyinin fəaliyyət istiqamətləri üzrə maliyyə yoxlamaları zəminində Azərbaycanın Serbiya, Monteneqro, Bosniya və Herseqovinadakı səfiri Eldar Həsənov şübhəli şəxs qismində tutulub.

Avqustun 14-də Səbail Rayon Məhkəməsi Eldar Həsənov barəsində həbs qətimkan tədbiri seçib. Ona vəzifə səlahiyyətlərindən sui-istifadə, dövlət büdcəsinin, məqsədli büdcə fondlarının və ya büdcədənkənar dövlət fondlarının vəsaitindən təyinatı üzrə istifadə etməmə ittihamları irəli sürülüb.

Avqustun 17-də prezident İlham Əliyev Eldar Həsənovu Azərbaycanın Serbiya, Monteneqro, Bosniya və Herseqovinadakı səfiri vəzifəsindən azad edib.

Avqustun 24-də bəyan olunub ki, Eldar Həsənov barəsində cinayət işi Xarici İşlər Nazirliyi əməkdaşlarının Dövlət Təhlükəsizliyi Xidmətinin İstintaq İdarəsində istintaq edilən cinayət işindən ayrılaraq istintaqın davam etdirilməsi üçün Baş Prokurorluğun İstintaq İdarəsinə göndərilib.

Eldar Həsənov Dövlət Təhlükəsizliyi Xidmətinin istintaq təcridxanasında saxlanır.

Xarici İşlər Nazirliyinin ittiham olunan əməkdaşları ev dustaqlığına buraxılsa da, Eldar Həsənovun həbsdən çıxmaq üçün müraciətləri nəticəsiz qalıb.

Eldar Həsənov hüquq elmləri doktoru, professordur. Gəncə Pedaqoji Universitetinin müəllimi, Azərbaycan Pedaqoji Universitetinin dosenti olub.

Mütəşəkkil cinayətkarlıq, xüsusilə terrorizm və narkotik vasitələrin qanunsuz dövriyyəsinə dair və digər mövzularda kitabların, dərslik və dərs vəsaitlərinin, elmi və publisistik əsərlərin müəllifidir.




Bölməyə aid digər xəbərlər
bütün xəbərlər
{sape_links}{sape_article}