Azərbaycan Xankəndi, Xocalı və Xocavəndə də suverenliyini bərpa edəcək - Partiya sədri
Tarix: 18-07-2021 11:39 | Bölmə: Slayd
Azərbaycan Xankəndi, Xocalı və Xocavəndə də suverenliyini bərpa edəcək

“ABŞ, Fransa, Almaniya və digər ölkələr 30 il müddətində Qarabağ probleminin həllində maraqlı olmayıb. Zamanında Minsk qurupu problemi həll etmək məqsədilə yaradılsa da, bu qrupu təmsil edən ölkələr problemin həllində maraqlı olmadığından proses 30 il davam etdi”.

Bu sözləri Reyting.az-a Aydınlar Partiyasının sədri, keçmiş deputat Qulamhüseyn Əlibəyli Minsk qrupu da daxil olmaqla bir sıra ölkələrin 44 günlük Vətən müharbəsindən sonra az qala Azərbaycanın Konstitusiya və qanunlarından kənar hökm vermək istəklərindən danışarkən deyib.

Partiya sədri hesab edir ki, Azərbaycanın hərbi cəhətdən qalib gəlməsi, Türkiyənin bölgəyə daxil olması, habelə Azərbaycan və Türkiyənin regionda yeni siyasi reallıqlar yaratması faktiki olaraq 30 il bu prosesdə iştirak edən ölkələri kənarda qoyub. Onun sözlərinə görə, indi həmin ölkələr son 30 ildə olduğu kimi, artıq söz sahibinə çevrilmirlər: “Aydındır ki, onların məhdud geosiyasi maraqları var. Bu maraqlar da ermənilərin hansısa formada müdafiə olunması, Azərbaycan və Türkiyənin sıxışdırılmasından ibarətdir. Odur ki, bu kimi açıqlamalar verilir, hansısa addımlar atılır. Zənnimcə, üç ölkə səfirinin Şuşaya getməkdən imtinası da bunun bir nümunəsidir”. Q. Əlibəyli əlavə edib ki, indi də Fransa prezidenti Makronun Ermənistana səfəri, hətta Xankəndi şəhərinə gedəcəyi haqda söz-söhbətlər təxminən bununla əlaqədardır: “Yəni bölgədə baş verən yeni geosiyasi reallıqları qəbul etmək istəmirlər. Onlar köhnə vəziyyətə qayıtmaq istəyirlər. Çünki əvvəlki vəziyyətdə bölgədə söz sahibi olublar”.

Partiya sədrinin fikrincə, həmin dövlətlər unudurlar ki, Azərbaycan hərbi baxımdan qalib gəlib: “Üstəlik, Türkiyə də Azərbaycanla birlikdə bölgədə söz sahibinə çevrilib və həmin dövlətlərin demarşları, müəyyən siyasi təzyiqləri nəticə verməyəcək. Azərbaycan gec-tez digər ərazilərdə - Xankəndi, Xocalı və Xocavəndə də öz suverenliyini bərpa edəcək”.

Q. Əlibəyli bildirib ki, son zamanlar atəşkəsin pozulması həm də ermənilərə zərbə vurur: “Ən azı Ermənistanda hakimiyyətdə olan qüvvələrə, eləcədə separatçılara da zərbədir. Üstəlik, Rusiyaya zərbədir. Amma gərginlik digər həmsədrlər və regionda marağı olan ölkələr üçün maraqlı görünə bilər. Hesab edirəm ki, qeyri-sabit vəziyyət yaratmaq fonunda Rusiya bölgədə hərbi iştirakçılığını genişləndirməkdə maraqlı ola bilər. Digər ölkələr də sabitliyin pozulmasına, Azərbaycan və Türkiyənin bu sabitliyə nəzarət edə bilməməsinə, özlərinin prosesə daxil olmasında maraqlıdırlar. Yəni fərqli maraqlar var. Çünki sabitlik olanda onlara ehtiyac duyulmur”.

Reyting.az




Bölməyə aid digər xəbərlər
bütün xəbərlər
{sape_links}{sape_article}