Gömrükçülər sahibkarları müflisləşdirir - İdxalla məşğul olan çoxsaylı MMC fəaliyyətini dayandırıb
Tarix: 21-07-2021 10:19 | Bölmə: Slayd
Gömrükçülər sahibkarları müflisləşdirir - İdxalla məşğul olan çoxsaylı MMC fəaliyyətini dayandırıb

Azərbaycan Dövlət Gömrük Komitəsi ilə sahibkarlar arasında xeyli müddətdir davam edən narazılıqlar artır. Bir qrup sahibkar iddia edir ki, xaricdən ölkəyə mal gətirərkən Gömrük Komitəsinin əməkdaşları onlara ciddi problemlər yaradır, qanundankənar tələblər irəli sürür və süründürməçiliyə məruz qoyaraq dövlət rüsumundan əlavə vəsait ödənilməsinə vadar edirlər.

Sahibkarların həm sosial şəbəkələr vasitəsi ilə yayılan, həm də Reyting.az-a göndərilən müraciətində bildirilir ki, ölkəyə məhsul idxal edən zaman yaradılan problemlər onlara ciddi şəkildə mane olur, çoxsaylı iş adamını fəaliyyətini dayandırmaq məcburiyyətində qoyur.

Sahibkarların iddiasına görə, ölkə gömrüyündəki özbaşınalıqlar səbəbindən gün ərzində Azərbaycanda onlarla, bəlkə də daha çox MMC və ya fiziki şəxs kimi çalışan sahibkar fəaliyyətini dayandırır:

“Ölkədə kiçik sahibkarlığı məhv edirlər. Burada əsas rolu Dövlət Gömrük Komitəsi oynayır. Bu qurum sanki inhisarçılara qulluq edir. İnhisarçıların gətirdiyi yükü gömrükdə dərhal rəsmiləşdirir, himayədarı olmayan kiçik sahibkarın isə idxal etdiyi malı aylarla hansısa ödənişli anbarda saxlatdırırlar. Sahibkardan bəyannamə qiymətini qaldırmaq tələb olunur. Malın gətirilməsinə əsas verən və kommersiya sənədləri sayılan müqavilə və invoysda göstərilən qiymətlər nəzərə alınmır. Gömrük dəyərini istədikləri kimi kor-təbii təyin edirlər. Bəyannamə qiymətini dərhal qaldırmayan sahibkarın yükü isə müxtəlif bəhanələrlə aylarla ödənişli anbarlarda saxlanılır. Həmin anbarlar isə yüksək vəzifəli məmurlara yaxın şəxslərin MMC-lərinə məxsusdur”.

Qeyd olunur ki, sahibkarların mallarını öz anbarlarında saxlaması və ya təminatla buraxılması xahişlərini təmin etmir, gömrük dəyərini müəyyənləşdirmək üçün uzun-uzadı əsassız araşdırmalar aparır, qanunvericiliklə nəzərdə tutulmayan sənədlərin təqdim edilməsini tələb edirlər.

Haqsızlıqla üzləşdiklərini bildirən iş adamlarının müraciətində qeyd olunur ki, sahibkar ölkəyə 1000 manat dəyərində mal gətirirsə, gömrükçülər həmin mala görə 2000-3000 manat anbarpulu ödətdirir. Həmin vəsait isə nağd şəkildə alınır, buna görə ödəniş qəbzi vermirlər, vəsaiti bank köçürməsi ilə qəbul etmirlər: “Həmin anbarlarda da hec bir şərait yoxdur, antisanitariya baş alıb gedir. Anbarların çoxunun lisenziyası da yoxdur”.



Sahibkarların iddiasına görə, ən böyük qanunsuzluq Hava Nəqliyyatında Baş Gömrük İdarəsində hökm sürür: “Orada Pərviz adlı bir idmançı - güllə atan var, idarə rəisidir. İQ dərəcəsini cox aşağı hesab edirik. Sanki sahibkarlara qənim kəsilib. Aeroportdakı «Anbar Tofiq» ləqəbli şəxslə əlbir olaraq sahibkarların yükünün üzərindəki sənədləri dəyişdirərək, onları ya rüşvət ödəməyə, ya da bəyannamə qiymətlərini qaldırmağa məcbur edirlər. Bunları çinayətkar qruplaşmaya, reket dəstəsinə bənzədənlər də var. Zorən yığılan rüsumların bir hissəsi isə sonradan gömrükçülərin maaş kartlarına mükafat kimi keçirilir. Gömrükdə sahibkarlara yaradılan əsassız problemlər isə ölkədə qiymətlərin günü-gündən artmasına səbəb olur”.

Sahibkarlar şikayətlərinə baxılmadığını bildirirlər:

“Məhkəmələr də sanki gömrüyün təsiri altındadır. Bu məsələdə gömrükçülərlə bəzi məhkəmə hakimlərinin müəyyən qohumluq əlaqələri də rol oynayır. Bəzi hakimlər isə Gömrük Komitəsinə qarşı qərar qəbul etməyə qorxur, hüquqları pozulan sahibkarla bağlı ədalətli qərar verməyə cəsarətləri catmır. Hətta bəzi hakimlər Gömrük Məcəlləsini oxumağa belə ərinirlər. Bu səbəbdən də sahibkarların iddiasını rədd edirlər.

Apellyasiya şikayətinin də mənası yoxdur. Hətta sahibkarlardan biri Hava Nəqliyyatında Baş Gömrük İdarəsinin qanunsuz əməllərinə etiraz əlaməti olaraq özünü Prezident Administrasiyasının binası qarşısında yandırmağa məcbur olmuşdu. Bir dəstə sahibkar isə Nazirlər Kabinetinin qarşısına üz tutmuşdu. Amma nə faydası? Sanki kiçik sahibkarlığın məhvinə göstəriş verilib, ölkəyə malı yalnız inhisarçılar gətirə bilərlər”.

Azərbaycan Respublikasının Prezidentindən, Dövlət Gömrük Komitəsinin sədrindən və digər əlaqədar qurumların rəhbərlərindən problemin həllində kömək istəyən sahibkarlar daha sonra yazır:

“Gömrükçülərin bu qanunsuz oyunlarına son qoyulmalıdır. Gömrük Komitəsi ləğv edilməli, sistem tamamilə dəyisdirilməli və Komitənin bazasında xalqa xidmət edən Gömrük Xidməti yaradılmalıdır”.

Qeyd edək ki, müəyyən səbəblərdən hələlik adlarının ictimailəşdirilməsini istəməyən sahibkarlar kütləvi şəkildə məhkəmələrə müraciət etmək və digər təsirli tədbirlər görmək üçün vəkillərlə məsləhətləşmələrə başlayıblar. Sahibkarlar arasında tam razılıq əldə edildikdən sonra Gömrük Komitəsinin binası qarşısında etiraz aksiyaları da daxil olmaqla, müxtəlif tədbirlərə əl atılacaq.

Bayram günləri səbəbindən ölkədə qeyri-iş günü olduğundan Dövlət Gömrük Komitəsinin və Hava Nəqliyyatında Baş Gömrük İdarəsinin məsələyə münasibətini öyrənmək mümkün olmayıb. Reyting.az Gömrük Komitəsinin və Baş Gömrük İdarəsinin də mövqeyinə hörmətlə yanaşır və sahibkarların ölkə KİV-lərində yayılan müraciəti ilə bağlı onların da mövqeyinə yer ayırmağa hazırdır.




Bölməyə aid digər xəbərlər
bütün xəbərlər
{sape_links}{sape_article}