11:29 / 07-12-2021
Azərbaycan nefti bahalaşır
İran yük avtomobillərinin Qarabağa girişini qadağan edib - Sabiq səfirin şərhi
Tarix: 20-10-2021 17:33 | Bölmə: Slayd
İran yük avtomobillərinin Qarabağa girişini qadağan edib - Sabiq səfirin şərhi

İrana məxsus yük avtomobillərinin və bu ölkə vətəndaşlarının Ermənistan vasitəsilə Azərbaycan Respublikasının ərazisinə - Laçın rayonuna və Qarabağın digər bölgələrinə girişi qadağan edilib. İranın Yollar və Nəqliyyat Agentliyinin nəqliyyat şirkətlərinə göndərdiyi sənəddə bu qadağadan bəhs edilib. Sənədə əsasən, Qarabağ bölgəsi ilə hər hansı bir ticarət müqaviləsinin (Erməni separatçılarının nəzarətindəki bölgələr nəzərdə tutulur-red.) imzalanması da qadağandır. Reyting.az xəbər verir ki, bu barədə İranın “Mehr” agentliyi məlumat yayıb.

Bildirilir ki, İranın rəsmi dövlət sərhədi xaricindən Azərbaycan Respublikasının ərazisinə istənilən giriş Azərbaycanın ərazi bütövlüyünün pozulması kimi qəbul edilir.

İranın Beynəlxalq Daşımalar və Tranzit Yolları İdarəsinin baş direktoru Məhəmməd Cavad Hedayəti İran Xarici İşlər Nazirliyinin 9 oktyabr tarixli təlimatına istinadla beynəlxalq nəqliyyat şirkətlərinin həmkarlar ittifaqlarına bununla bağlı məktub da göndərib.

İranın Azərbaycandakı sabiq səfiri Əfşar Süleymani bu qərarı Reyting.az-a şərh edərkən deyib ki, Nəqliyyat Nazirliyi bir saat əvvəl belə bir qərar verib.

Sabiq səfirin sözlərinə görə, gecə də olsa verilən qərar müsbətdir:

“Münasibətlərdə problem yaranan gündən çıxışlarımda bildirirdim ki, məsələyə real baxmaq, danışmaq və ortaya problem çıxıbsa, onu həll etmək lazımdır. Baxın görün Azərbaycan tərəfi nə deyir, biz nə deyirik, yoluna qoyun.

Qeyd edim ki, İran yük avtomobillərinin Xankəndiyə, Laçına getməsi məsələsini bir sıra adamlar pozurdular. Guya belə şey olmayıb. Qalanından - İlham Əliyevin İran hərbi təlimləri haqqında fikirlərindən başlayırdılar. Mən də deyirdim ki, öncədən fikirlər var. Xankəndinə gedən avtomobillərlə bağlı İrana şifahi formada deyiblər, daha sonra nota verilib. Bunu həll etmək lazımdır. Mən məntiqlə, real vəziyyətə baxaraq İranda fikirlərimi açıq deyirdim. Düzdür, mənə qarşı da kimlərsə danışırdı. Amma indi onların başı aşağı, mənim başım yuxarı oldu. Hamı gördü ki, Azərbaycan və İran arasında münasibətlərin yaxşılaşmasını istəyirəm”.


Ə. Süleymani

Ə. Süleymani bildirib ki, bu gün verilən qərarı öncədən etsəydilər belə böyük problem də yaranmazdı: “Mən də qeyd edirdim ki, bu məsələni həll etmək lazımdır ki, maraqlı qüvvələr bu işi sağa-sola çəkməsin, dedi-qodulara əsas yaranmasın. Bu işi o gün etsəydilər daha gözəl olardı. Mən bir zamanlar bu işlərin içində olmuşam, münsibətlərdə elə anlar olub ki, bəzi məsələlərin baş verməsinə, dərinləşməsinə yol verməməyə çalışmışam. Həm rəhmətlik Heydər Əliyevin, həm də Prezident İlham Əliyevin zamanında. Bir daha hesab edirəm ki, belə problemləri tədbirlə, çox əsaslı düşüncə ilə həll etmək olardı. Düşünürəm ki, bu reallığın və haqqın qələbəsidir, iki ölkə arasında münasibətlərin güclənməsinə səbəb ola bilər. Eyni zamanda digər problemləri də tədricən yoluna qoymaq olar”.

Keçmiş səfir İran Nəqliyyat Nazirliyinin bu qərarının daha tez verilməli olduğunu qeyd edərək bildirib ki, indi də belə bir qərarın verilməsi yaxşı iş sayılmalıdır: “Mənim fikrimcə, bu yaxşı əməldir. Gecdə olsa, olması yaxşıdır. Qonşu ölkələr məsələləri şəffaf və reallığa əsaslanaraq çözməlidir və bu da onun bir nümunəsidir. Yəni problemləri demək, danışmaq, müzakirə etmək lazımdır. Bu halda “informasiya müharibəsinə” də yer qalmaz. Bu istiqamətdə gedilsə, yaxşı olar. Bir-birinin işlərinə qarışmasınlar. Məncə, əsas Azərbaycan və İranın münasibətləri dərinləşməsə, dostluq möhkəm olmasa, bu regionda sabitliyin və inkişafın da xeyrinə olmaz.

İran və Azərbaycan arasında mövcud olan müştərək ənənələr, yaxınlıq heç bir ölkədə yoxdur. Bəzi məsələlərdə müəyyən soyuqluq yaranıb. Amma iki ölkə arasında tarixi-mədəni əlaqələr var. Biz qonşuyuq. Ümid edirəm ki, son qərar bizi bir-birimizə daha da yaxınlaşdırar. Münasibətlərdə mövcud olan digər problemlərin də bu formada çözüləcəyinə ümid edirəm”.




Bölməyə aid digər xəbərlər
bütün xəbərlər
{sape_links}{sape_article}