Rusiyada müharibə hazırlığı: generallar da daxil olmaqla 300-dən çox zabitin toplantısı keçiriləcək
Tarix: 06-12-2021 17:46 | Bölmə: Slayd
Rusiyada müharibə hazırlığı: generallar da daxil olmaqla 300-dən çox zabitin toplantısı keçiriləcək

Rusiyada bütün yüksək səviyyəli hərbi komandirlərin bir araya gələcəyi və kütləvi səfərbərlik toplantısının keçiriləcəyi bildirilir.

Reyting.az
xəbər verir ki, Britaniyanın “Financial Times” qəzeti buna səbəb kimi ABŞ-ın əldə etdiyi kəşfiyyat məlumatlarını Avropa ilə paylaşmasını və NATO ölkələrinin fikirlərində ciddi dəyişikliyin baş verməsini göstərir.

Qəzet yazır ki, ABŞ Avropanı Rusiyanın Ukraynanı işğal etməyə hazırlaşdığına inandıraraq, Avropa İttifaqı və NATO ölkələrinə kəşfiyyat məlumatları təqdim edib. Xatırladaq ki, bundan əvvəl Rusiya Xarici Kəşfiyyat Xidməti Vaşinqtonu Moskvaya nəzarət etmək üçün Avropadan dəstək almağa çalışmaqda ittiham etmişdi.

Ukraynanın müdafiə naziri Aleksey Reznikov isə deyib ki, Ukrayna, ABŞ və Böyük Britaniyanın kəşfiyyat orqanları Rusiya hərbçilərinin Ukrayna sərhədləri yaxınlığında cəmləşdirilməsi ilə bağlı məlumat mübadiləsi aparır. Rusiya buna cavabında heç bir ölkəni təhdid etmədiyini və öz ərazisində qoşunların yerini dəyişməsinin suveren hüququ olduğunu dəfələrlə bəyan edib.

Britaniya mətbuatı yazır ki, diplomatik “məşğulluq” və ABŞ-ın kəşfiyyat məlumatlarını bölüşmək qərarı bəzi skeptik ölkələri, o cümlədən Almaniyanı “Kremlin tezliklə Ukraynaya qoşun göndərəcəyinə” inandırıb.

Mənbələr bildirir ki, Ağ Evin bu cür “qeyri-xarakterik” hərəkətlərə əl atmasına səbəb ABŞ-ın bəzi avropalı müttəfiqlərinin “Rusiya işğalı” ilə bağlı bəyanatlarına inanmamasıdır.

Onu da xatırladaq ki, ABŞ noyabrın əvvəlində NATO nazirlərinin toplantısı öncəsi məlumat paylaşmağa başlayıb. Vaşinqton müttəfiqlərə Amerika kəşfiyyatının hesabatları və rus qoşunlarının Ukrayna sərhədində cəmləşdiyini göstərən digər sübutlar da təqdim edib. Bir mənbəyə görə, kəşfiyyat məlumatları "olduqca təfərrüatlıdır".

İddialara görə, Avropa Birliyinin bəzi ölkələri və NATO üzvləri Moskva ilə qarşı-qarşıya gəlmək əvəzinə dialoq çağırışı ediblər və onlar Rusiyanın “təxribat olmayacağı təqdirdə işğala cəhd etməyəcəyinə” inanırlar. Lakin ABŞ-ın son kəşfiyyat məlumatları belə ölkələrin fikrini dəyişdirib.

Qəzet yazır ki, ABŞ prezidenti Co Bayden rusiyalı həmkarı Vladimir Putini Ukrayna ilə bağlı bir daha "xəbərdar etmək" niyyətindədir. Bundan əvvəl Ağ Ev rəsmi olaraq təsdiqləyib ki, prezident Bayden dekabrın 7-də Putinlə görüşəcək və bu görüş zamanı o, Ukrayna sərhədində “Rusiyanın hərbi fəaliyyəti” ilə bağlı narahatlığını dilə gətirəcək.

Məlumat üçün bildirək ki, Rusiya Müdafiə Nazirliyinin Cənub Hərbi Dairəsinin komandanı Vadim Astafjevs bildirib ki, Cənub Hərbi Dairə Komandanlığı operativ səfərbərlik iclasında gizli əməliyyatlar və qoşunların yerdəyişməsi məsələlərinə baxacaq.

Hərbi Dairə Komandiri Aleksandr Dvornikovun rəhbərlik etdiyi əməliyyat səfərbərliyi toplantısı alay komandirləri də daxil olmaqla, bütün hərbi element və bölmə komandirlərinin iştirakı ilə ilk dəfə keçiriləcək. Videokonfrans vasitəsilə keçiriləcək iclaslarda 300-dən çox zabit və generalın iştirak edəcəyi bildirilir.

“Bir neçə istiqamətdə eyni vaxtda kəşfiyyat və hücum komplekslərinin yaradılması prosesi yüksək dəqiqliyə malik aviasiya, hərbi dəniz, raket qoşunları və raket artilleriyasının iştirakı ilə mümkün qədər tez həyata keçirilməlidir”, - Dvornikov bildirib.




Bölməyə aid digər xəbərlər
bütün xəbərlər
{sape_links}{sape_article}