Rasim Musabəyov: “Nüvə silahından istifadə hədəsi müəyyən mənada şantajdır”
Tarix: 22-09-2022 11:05 | Bölmə: Slayd
Rasim Musabəyov: “Nüvə silahından istifadə hədəsi müəyyən mənada şantajdır”

Rusiya ilə Qərb arasındakı hazırkı münasibətlər SSRİ dövründəki Kuba böhranını xatırladır. Dünyada ən çox nüvə başlığına malik olan Rusiya elan edir ki, təhlükəsizliyi səbəbindən bu silahlardan istifadə edə bilər. Bu isə III Dünya Müharibəsi - nüvə savaşı deməkdir. Görəsən, belə bir savaş başlaya bilərmi?

Milli Məclisin deputatı, politoloq Rasim Musabəyov Reyting.az-a deyib ki, belə bir müharibəni mümkün saymır.

Onun qənaətincə, nüvə silahından istifadə qeyri-mümkündür. “Bu, intihara bərabərdir. Bunun üçün müharibə aparmaq lazım deyil. İntihar etmək istəyirsənsə, Rusiya öz nüvə başlıqlarını öz ərazisində partlatsa, bu, dünyanın sonu demək olardı. Götür nüvə başlığını at Amerikaya, Amerika da sənə atsın və ya intihar et... Bunların arasında elə də ciddi fərq yoxdur. Bu baxımdan ciddi analitiklər deyirlər ki, böyük nüvə müharibəsi ağlasığan deyil. Böyük nüvə savaşı da faktiki III Dünya Müharibəsi deməkdir”, - R. Musabəyov əlavə edib.

Politoloqun fikrincə, ola bilsin, Putin nüvə başlığından istifadə etmək haqqında fikirə gələ bilər: “Amma bundan dərhal sonra “düyməni basdı və nüvə zərbəsi endirildi”,- məsələsi yoxdur. Bu qərar yeddi əldən keçərək icraçıya çatır. İcraçı isə bunun təsdiqlənməsini istəyir. Beləcə, göstəriş yenidən geriyə qayıtmalıdır. Hesab olunur ki, bu qərar keçdiyi təqdirdə belə, kifayət qədər adekvat insanlar var ki, bunun nəyə gətirəcəyini anlayırlar. Odur ki, belə bir qərar verilsə də, onun icrası mümkün görünmür”.

Rusiyanın Ukraynaya qarşı taktiki nüvə başlığından istifadə edəcəyinə gəldikdə, Musabəyov bunun da çətin olacağını düşünür:

“ABŞ deyir ki, belə olacağı təqdirdə bu qərarı verənlər qısa müddətdə məhv ediləcək. Yəni onların daha dəqiq raketləri və məlumatları var. Odur ki, bu silahdan istifadə hədəsi müəyyən mənada şantajdır. Ehtimal var, taktiki nüvə silahından istifadə oluna bilər. Ancaq hər şey izlənilir. Nüvə silahı elə deyil ki, hazır vəziyyətdə olsun və kimsə qərar verib, dərhal atsın. Öncə nüvə başlıqları gətirilməlidir. Bu başlıqlar tərpədildikdə isə dünya tərəfindən izlənilir. Hələlik deyirlər ki, nüvə başlıqlarından istifadə etmək üçün hərəkətlər müşahidə edilmir”.

Reyting.az




Bölməyə aid digər xəbərlər
21-09-2022, 15:10 Putinə təzyiqlər artır

{sape_links}{sape_article}