Ayılar Göygölün kəndlərinə hücum edib - Fotolar
Tarix: 25-10-2023 13:39 | Bölmə: Cəmiyyət
Ayılar Göygölün kəndlərinə hücum edib

Göygöl rayonunun Quşçu və Qarabulaq kəndlərinə ayılar hücum edib, təsərrüfatlara zərər vurublar.

Reyting.az
xəbər verir ki, bu barədə kənd sakinləri bildiriblər.

Məlumata görə, son günlər dəfələrlə onlara məxsus arı yeşikləri, mal-qara və meyvə ağacları ayılar tərəfindən zərər görüb.

Sakinlər bildirib ki, bir neçə gün öncə həm Quşçu kəndində, həm də qonşu kəndlər olan Qarabulaq və Sarısuda bir neçə nəfərin təsərrüfatına ayılar tərəfindən ciddi zərər yetirilib.

Ayılar Quşçu kənd sakini Y. Qarayevaya, həmçinin Qarabulaq kənd sakini M. Haqveridyevaya məxsus arı təsərrüfatına zərər vurub, bir neçə pətək dağılıb, arı ailələri tələf olub.

Ayılar Qarabulaq kənd sakini E. Məmmədova məxsus meyvə və qoz ağaclarını da sındırıb. Qarabulaq kənd sakini S. Alışanova məxsus 2 baş mal-qara isə ayılar tərəfindən parçalanıb.

Sakinlər oxşar halın qonşu kənd olan Sarısuda da baş verdiyini bildiriblər.

Onların sözlərinə görə, ayılar bir neçə dəfə kənddə görünüblər. Sakinlər ayıların nəinki təsərrüfatlara, hətta özlərinə də zərər vuracağından ehtiyat edirlər.

Məsələ ilə bağlı Ekologiya və Təbii Sərvətlər Nazirliyinə müraciət olunub. Nazirliyin 10 saylı Regional idarəsinin əməkdaşları ərazidə olub, faktları qeydə alıblar.

"İdarədən bildirdilər ki, rəsmi ov tüfəngi olan bir neçə kənd sakini ayıların kəndə, təsərrüfata hücum etməməsi üçün növbə çəksinlər, əgər ayılar gələrsə, havaya atəş açaraq onları qorxudub ərazidən uzaqlaşdırsınlar. Qeyd etdilər ki, ayını öldürmək olmaz, əgər ayını öldürsələr, külli məbləğdə cərmə ödəməli olacaqlar", - deyə sakinlər bildirib.

Kəndlilər heç bir sakində ov tüfəngi olmadığını və növbə çəkə bilməyəcəklərini deyiblər.

Qeyd edək ki, hər iki kənd meşəlik və dağlıq ərazidə yerləşir. Kənd sakinləri isə maldarlıq, arıçılıq və əkinçiliklə məşğul olur.







Reyting.az




Bölməyə aid digər xəbərlər
27-02-2024, 13:03 8 vəkil cəzalandırılıb

{sape_links}{sape_article}