Deputat: “Pensiyaçıların maddi vəziyyəti ağırdır”
Tarix: 13-11-2019 20:09 | Bölmə: İqtisadiyyat
Deputat: “Pensiyaçıların maddi vəziyyəti ağırdır”

“Sosial Müdafiə Fondu ilə bağlı bəzi məsələlərə diqqəti cəlb etmək istəyirəm. Məni ciddi narahat vedən məsələ ondan ibarətdir ki, yaşayış minimumunun məbləği 157, pensiyanın aşağı həddi 200, orta hədd 293, əlilliyə görə orta aylıq pensiya 197, birinci qrup əlillər üçün 238,2 manat nəzərdə tutulub”.

Reyting.az
xəbər verir ki, bu fikirləri Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev Milli Məclisin plenar iclasında çıxışı zamanı səsləndirib.

Millət vəkili bildirib ki, bu məbləğlər əslində Azərbaycan reallığında çox kiçikdir: “157 manatla bir nəfərin yaşaması qeyri-mümkündür. O cümlədən də, pensiyanın aşağı həddi 200 manatdır. Yaşayış minimumu 157 manat müəyyən olunub. Biz kommunal xərcləri, işıq, qaz, su pulunu, yaşlı insanların da bir çoxunun tibbi müayinəyə və dərmanlara böyük ehtiyacının olduğunu nəzərə alsaq görərik ki, həqiqətən də pensiyaçıların vəziyyəti ağırdır. Əlbəttə, müəyyənlər artım var. Əmək və əhalinin sosial müdafiəsi naziri Sahil Babayev qeyd elədi ki, ötən illə müqayisədə sosial xərclər 30 faiz artırılıb. Amma hesab edirəm ki, bu rəqəmlər yetərli deyil. Ona görə yetərli deyil ki, 2015-ci ildə baş vermiş iki devalvasiyadan sonra Azərbaycan manatı xarici valyutaya nisbətdə 2 dəfədən artıq dəyər itirib. Üstəlik, bir çox ərzaq və sənaye, xüsusilə də yüngül sənaye məhsulları, geyimlər ölkəmizə xaricdən idxal olunur”.

Q. Həsənquliyevin sözlərinə görə, keçən ilin 9 ayı ilə müqayisədə bu il idxal 31,3 faiz artıb.

Deputat diqqətə çatdırıb ki, vergi orqanlarının xətti ilə qeyri-neft sektorundan toplanan vəsait 5 milyard olduğu halda, Gömrük Komitəsinin xətti ilə toplanan vəsait 4 milyarddır: “Bu rəqəmlər də bir-biri ilə xeyli dərəcədə yaxınlaşır. Hesab edirəm ki, bu, hökuməti ciddi şəkildə narahat etməlidir”.

Q. Həsənquliyevi ən çox narahat edən məsələlərdən biri əlil və şəhid ailələrinin mənzil təminatı ilə bağlıdır: “Əgər nazir Sahil Babayevdə o statistika varsa, istərdim ki, bizi də məlumatlandırsın. Sahil Babayev qeyd etdi ki, əlil və şəhid ailələri üçün 934 mənzil tikilib təhvil veriləcək. Gələn il də bunlar üçün mənzil tikintisinə 110 milyon manat ayrılıb. Məsələn, mənim tanıdığım 20 Yanvar əlilləri var ki, bu günə qədər mənzil ala bilməyiblər. Nə qədər adam növbəyə dayanıb və biz hər il 110 milyon manat ayırsaq bizə neçə il lazımdır ki, əlilləri, xüsusilə də şəhid ailələrini mənzillə təmin edə bilək? Biz komitə iclasında bu məsələləri qaldıranda Maliyyə naziri Samir Şərifov dedi ki, “büdcə qaydalarına görə, xərclərin yuxarı həddi var, biz bunu artıra bilmərik”. Söhbət gedir ki, cari illə müqayisədə büdcənin həcmi 103 faiz həddində artırıla bilər. Amma mən düşünürəm, tutaq ki, bəndlər üzrə elə sahələr var ki, o sahələrdən həmin vəsaiti götürüb bu istiqamətdə xərcləri artırmaq olar. Məsələn, beynəlxalq və ölkə səviyyəli tədbilərin keçirilməsinə 226 milyon manat ayrılıb. Bura idman tədbirlərinin keçirilməsi daxil deyil. Ona görə ki, əlavə olaraq idman obyektlərinin tikintisi və idman tədbirlərinin keçirilməsinə büdcədən 200 milyon manat vəsait ayrılıb. Yəni bu xərcləri kəsmək lazımdır. Bizə də məlumat verilmir ki, hansı beynəlxalq və ölkə səviyyəli tədbirlərdən söhbət gedir”.

Millət vəkili əlavə edib ki, Prezidentin 300 milyonluq ehtiyat fondu var, lazım olarsa oradan vəsait ayrılar: “Bundan başqa, tutaq ki, Milli Məclisin tədbirləri olur. Tədbirlərin keçirilməsi, qonaqların qəbulu və yola salınması xərcləri Milli Məclisin büdcəsindən qarşılanır. Yaxud, Prezident Administrasiyasının qonağı varsa, onların öz vəsaiti var və tələb olunan xərclər o vəsaitlərə daxildir. Yəni buna bir aydınlıq gətirilməlidir. Milli Məclisin müvafiq komitəsi bu məsələdə hökumətlə işləyir. Yəni bunlar bizə məlumat verməlidirlər. Yoxsa ümumi formada tərifləməklə düzəlməyəcək. Yaxud islahatlarla bağlı xərclər 878,52 milyon manat göstərilir. Bu bir milyarda yaxın vəsaitin hara xərclənəcəyi barədə bizə məlumat verilmir. Adını sadəcə, “islahatlarla bağlı xərclər”,- qoyublar. Hesab edirəm ki, bu məsələ barədə də düşünməliyik.

Məcburi köçkünlər üçün mənzil tikintisinə cəmi 200 milyon manat ayrılıb. Bu insanlar ev-eşiklərini, torpaqlarını itiriblər. Bunlar nə qədər növbə gözləyəcəklər? Hər il mən bu məsələni qaldırıram. Birinci vitse-prezident Mehriban xanım çox sağ olsun ki, onun təşəbbüsü ilə “Paşa Holdinq” köçkünlər üçün əlavə olaraq böyük bir kompleks tikdi. Özəl sektor da bu işə kömək etdi. Amma bu yetərli deyil. Bu, birbaşa Qaçqın və Məcburi Köçkünlərlə İş üzrə Dövlət Komitəsinin işi olduğu kimi, həm də Əmək və əhalinin sosial müdafiəsi naziri Sahil Babayevin də işi olmalıdır. Bu məsələ onu, ümumiyyətlə, hökuməti, hər birimizi düşündürməlidir”.

Q. Həsənquliyev hesab edir ki, islahatlarla bağlı xərclər üçün tələb olunan böyük məbləğdə vəsaiti məcburi köçkünlər, əlil və şəhid ailələri üçün mənzillərin tikintisinə ayırmaq lazımdır:

“Sahil Babayev keçən dəfə dedi, amma aydınlıq gəlmədi. Mən istəyərdim ki, burada iştirak edən Hesablama Palatasının sədri Vüqar Gülməmmədov aydınlıq gətirsin. Hesablama Palatasının bizə verdiyi rəydə qeyd olunur ki, qarşıdakı 3 il ərzində inflyasiyanın həcmi 4,1, əməkhaqqı artımı isə 1,7 faiz proqnozlaşdırılır. Hətta bizə diaqram da təqdim ediblər, Hesablama Palatasının rəyinin 44-cü səhifəsində bu öz əksini tapıb. Amma sonra Sahil Babayev çıxış edərək bildirdi ki, bu doğru məlumat deyil, hər il orta hesabla əməkhaqqında 17 faz artım gözlənilir. Bu ziddiyyətə də aydınlıq gətirilməlidir”.

BAXCP sədri qeyd edib ki, istehlak mallarının əksəriyyəti xarici valyuta ilə alınır: “Ona görə də bəzi məhsulların qiyməti yüksəkdir. Əhalinin, xüsusilə də aztəminatlı ailələrin sosial vəziyyətində problemlər var. Biz, həm pensiyalarn aşağı həddini, həm də yaşayış minimumu ilə bağlı müəyyənləşdirilən 157 manatı artırmalıyıq. Mən hesab edirəm ki, bu çox vacibdir”.

Q. Həsənquliyev sonda nazir S. Babayevə bir daha müraciət edib: “Burada qeyd olunub ki, işsizliyə görə 1243 adam sığorta alıb. Bu da çox az rəqəmdir. Niyə işsizliyə görə bu qədər az insan sığorta alıb? Müraciət etməyiblər, yoxsa həqiqətən də cəmi 1243 adam bununla bağlı müraciət edib? Buna da aydınlıq gətirilsəydi yaxşı olardı”.

Reyting.azскачать dle 10.5фильмы бесплатно




Bölməyə aid digər xəbərlər
{sape_links}{sape_article}