İranın sabiq xarici işlər naziri Bakıya gəlməkdən qorxdu?
Tarix: 14-11-2019 16:23 | Bölmə: Siyasət
İranın sabiq xarici işlər naziri Bakıya gəlməkdən qorxdu?

Noyabrın 14-də Bakıda Dünya dini liderlərinin II Sammiti işə başlayıb.

Reyting.az
xəbər verir ki, ikigünlük Sammitdə “Multikulturalizm, tolerantlıq və dinlərarası həmrəyliyin təşviqində Azərbaycan dövlətinin nümunəvi rolu”, “Şeyxülislam Allahşükür Paşazadənin dini rəhbər və ictimai xadim kimi sivilizasiyalararası və dinlərarası əməkdaşlığın inkişafına töhfəsi”, “Dini liderlər terrorizm, təcavüzkarlıq, ksenofobiya, islamofobiya, antisemitizm və xristianofobiya əleyhinə”, “Qadın və uşaq haqlarının qorunması, gənclərin maarifləndirilməsində dini liderlərin, dövlət, elm və ictimai xadimlərin birgə fəaliyyətinin əhəmiyyəti” mövzuları ətrafında müzakirələr aparılacaq.

Sammitin yekunlarına dair Bakı Bəyannaməsi qəbul olunacaq.

Tədbirdə dünyanın 5 qitəsindən 70-dən çox dövlətin, 25 ənənəvi din və dini təriqətin lider və təmsilçiləri, həmçinin 10-dək nüfuzlu beynəlxalq təşkilatın 500-ə yaxın yüksək səviyyəli nümayəndəsi, o cümlədən Rusiya Federasiyası subyektlərinin başçıları və dini rəhbərləri iştirak edirlər.

Lakin gözlənildiyinin əksinə olaraq, İran nümayəndə heyətinə Ayətullah Xamnəinin müşaviri, sabiq xarici işlər naziri Əli Əkbər Vilayəti təşrif gətirməyib. Onu İran İslam Respublikasının Mədəniyyət və İslami Əlaqələr Təşkilatının sədri Abuzər İbrahimi Türkman əvəz edir.

Vilayətinin sammitə qatılmaması bir sıra suallar doğurub. Güman ki, onun Bakıya gəlməməsinin səbəbi Argentina hökumətinin rəsmi Bakıdan tələbidir.

Argentina 1994-cü ildə Buenos-Ayres AMİA yəhudi mərkəzinin partladılması ilə əlaqədar İranın keçmiş xarici işlər nazirini həbs etmək istəyir.

Terror hadisəsi zamanı İranın xarici işlər naziri olmuş Vilayəti də bu işlə əlaqəli sayılır.

Noyabrın 8-də Argentinanın xarici işlər naziri Azərbaycanın Buenos-Ayresdəki səfiri Rəşad Axundovu Xarici İşlər Nazirliyinə (XİN) çağıraraq Vilayətinin Bakıda olacağından Argentina hökumətinin "dərin narahatlığını" ifadə edib və onun "ekstradisiya məqsədiylə həbs edilməsini təmin etmək üçün" Azərbaycanın əməkdaşlığını istəyib.

2016-cı ildə Vilayətinin Sinqapur və Malayziyaya səfəri öncəsi onun həbsi üçün müraciət edilib, lakin müsbət cavab alınmayıb. İki il sonra Rusiyaya eyni tələb irəli sürülüb.

Vilayətinin yerinə Bakıya gəlmiş İran İslam Respublikasının Mədəniyyət və İslami Əlaqələr Təşkilatının sədri Abuzər İbrahimi Türkman noyabrın 13-də prezident İlham Əliyevlə görüşüb. Onun beynəlxalq konfrans çərçivəsində bəzi ölkələrin din xadimləri və mədəniyyət xadimləri ilə görüşləri planlaşdırılır.

Reyting.az




Bölməyə aid digər xəbərlər
17-03-2024, 12:16 “Kompas” səmtini azıb

{sape_links}{sape_article}