12:10 / 25-06-2022
Sabah yağışlı hava olacaq
Azərbaycan əleyhinə növbəti kampaniya başlayır
Tarix: 19-05-2022 18:04 | Bölmə: Siyasət
Azərbaycan əleyhinə növbəti kampaniya başlayır

“Azərbaycan müstəqillik əldə etdikdən bu yana daima ikili standartlarla üzləşib. Biz bunu gündəlik həyatımızda görümüşük. Mən bununla bağlı onlarla misal çəkə bilərəm. Odur ki, Bakı bir sıra qlobal layihələrə ev sahibliyi etdiyi ərəfədə yenidən kimlərinsə kampaniyaya başlaması, hansısa məsələləri süni şəkildə şişirtməsi müşahidə edilir. Bu, əlbəttə təsadüfi deyil”.

Bunu Reyting.az-a deputat Məlahət Həsənova deyib.

M. Həsənova bildirib ki, vacib beynəlxalq tədbirlər ərəfəsində Azərbaycana qarşı “qara PR” kampaniyaları daha da artır.

Onun sözlərinə görə, hər dəfə ölkəmizdə “Formula 1” yarışması keçirilən vaxtlarda “heyvanlara qarşı qəddarlıq” mövzusu gündəmə gətirilir və küçələrdə itlərin öldürülməsi haqda məlumatlar yayıb, bunun üzərində böyük beynəlxalq kampaniya qururlar.

Milli Məclis üzvü diqqətə çatdırıb ki, yaxın günlərdə Azərbaycanda 3 beynəlxalq tədbir keçiriləcək: “Mən “Texnofest” festivalı, “Formula-1” yarışması və Qlobal Bakı Forumunu nəzərdə tuturam. Bu ərəfədə yenə “ənənəvi” vasitələrdən istifadə olunur. Yenə də nələrisə əsassız olaraq şişirdəcək və Azərbaycana qarşı çirkin kampaniya qurmağa çalışacaqlar. Bir daha deyirəm ki, Azərbaycanın müstəqillik tarixində belə halları çox görmüşük. Sözsüz ki, belə əsassız kampaniyalar qəbuledilməzdir”.

M. Həsənova xatırladıb ki, Qarabağ işğal altında olarkən xalqımızın dünya mirasına daxil olan mədəni irsi ilə bağlı monitorinqlərin aparılması üçün Azərbaycan YUNESKO-ya müraciət edib: “Amma o dövrdə bu qurum deyirdi ki, belə bir monitorinq bizim səlahiyyətimizə aid deyil. İndi Azərbaycan əzəli torpaqlarını işğaldan azad edib, YUNESKO ərazimizdəki hansısa erməni abidəsinin “dağıdılması” ilə bağlı əsassız fikirlər işlədir”.

Ölkəmizin Avropa İttifaqı ilə münasibətlərinin yüksək səviyyədə inkişaf etdiyini deyən M. Həsənovanın sözlərinə görə, Azərbaycan gözləyirik ki, Ermənistanla saziş imzalansın:

“Eləcə də ABŞ-la münasibətlər yaxşılaşır. Amma o gün Bakıdakı Fəvvarələr bağında aksiya keçiriblər. Sanki bunların Azərbaycan əleyhinə hazır tezisləri var. Bir şey olan kimi başlayırlar oxumağa”.


M. Həsənova

Deputat bir məsələyə də diqqət çəkərək deyib: “44 günlük Vətən müharibəsi zamanı Almaniyanın “Bild” nəşri “Bayraktar TB2”-ləri tənqid edirdi. İndi bu silahlar Ukraynada istifadə olunur və Qərb mətbuatı onları tərifləyir. Yəni biz daima belə ikili standartlarla daima üzləşmişik. Əksər hallarda bunlar dünya ermənizminin təsiri ilə baş verir.

Baxın, neçə gündür İrəvanda etiraz aksiyaları başlayıb. Polislər fəalların saçından tutub zorakı üsulla maşına basır. Amma nədənsə Qərb mediası buna əhəmiyyət vermir, insan hüquqlarının pozulmasını gözə soxmur”.

Deputat bildirib ki, artıq belə təşkilatların maskası cırılıb. Yəni əvvəllər müəyyən qədər ədalət, demokratiya imitasiyası etsələr də, indi bu da yoxdur: “Odur ki, beynəlxalq tədbirlər ərəfəsində Azərbaycana qarşı hansısa ənənəvi kampaniyaların aparılmasının məqsədini bilirik”.

Deputat sonda deyib: “Şükürlər olsun ki, 44 günlük müharibədə Azərbaycan həm haqlı, həm də güclü olduğunu göstərdi. Müharibəyə qədər bütün beynəlxalq qurumlar Azərbaycan torpaqlarının işğalına dair qərarlar qəbul etmişdi, amma bu yetərli deyildi. Çünki haqlı olmaq kifayət etmir, həm də güclü olmaq lazımdır. Azərbaycan prezidenti dövlətimizi gücləndirdi, müdafiə imkanlarımızı artırdı. Həm gücümüzlə haqlı olduğumuzu sübut etdik, həm də ədaləti bərpa etdik. Bu səbəbdən də həm güclü, həm də haqlı olmalıyıq”.

Reyting.az




Bölməyə aid digər xəbərlər
22-06-2022, 19:33 General həbs edilib

{sape_links}{sape_article}