Hicab hərəkatı inqilaba çevrilir - Təhlil
Tarix: 19-11-2022 19:25 | Bölmə: Siyasət
Hicab hərəkatı inqilaba çevrilir

İranda kürd əsilli 22 yaşlı gənc fəal Məhsa Əminin ölümündən sonra başlayan etiraz aksiyaları hər gün bir az daha şiddətlənir. İranın Tehran, Təbriz, Əhvaz, Yəzd, Rəşt, Urmiya və bir sıra şəhərlərində etiraz aksiyalarında “Diktatora ölüm!”, “Azadlıq!”, “Bu il başqa ildir, Seyid Əli devrilibdir!”, "Azadlıq, Ədalət, Milli Hökumət", "Buna etiraz deməyin! Bu inqilabdır!" və digər şüarlar səsləndirilir.

İranın molla rejiminin etiraz aksiyalarına silahlı və sərt müdaxilələrindən sonra həyatını itirənlərin sayında artım müşahidə olunur. Həmin şəxslərdən biri də Təbriz Azad Universitetinin tibb fakültəsinin tələbəsi azərbaycanlı Aylar Həqqidir.

Şərqi Azərbaycan vilayətinin Məlikan (Məlik kəndi) şəhərində doğulan və Təbrizdə yaşayan Aylar Həqqi bu şəhərdə baş qaldıran etirazlar zamanı rejim qüvvələrinin açdığı atəş nəticəsində həyatını itirib.


Aylar Həqqi

İslam İnqilabı Keşikçiləri Korpusuna yaxınlığı ilə tanınan “Fars” xəbər agentliyi Şəhran Qülləsinin təhlükəsizlik kamerasının lentə aldığı videonu yayımlayıb və iddia edib ki, Aylar Həqqi maşından endikdən bir az sonra çuxurluğa düşərək həyatını itirib. Lakin bu videoda sadəcə, bir qadının maşından düşdüyü görünür və hətta şəxsin üzünü və kimliyini müəyyən etmək belə mümkün deyil.

Ayların qohumlarının dediyinə görə, o, noyabrın 16-da axşam rejimə qarşı keçirilən nümayişə gedəndən sonra həmin gün saat 19:00 radələrində başının arxasından güllələnərək həyatını itirib.

Məhsa Əminin də əxlaq polisi tərəfindən öldürülməsinə baxmayaraq rejim Məhsanın ölümünün təbii səbəblərdən, daha dəqiqi, ürəktutması nəticəsində baş verdiyini açıqlamışdı.

Ümumiyyətlə, rejim iki aydır davam edən etiraz aksiyalarında həyatını itirən vətəndaşların ölüm səbəbi olaraq “yüksəkdən yıxılma”, “intihar”, “ürək problemi” və “üsyançı izdihamın içindən hücum” kimi açıqlamalar irəli sürür.


Məhsa Əmini

Amma Məhsanın qətli kütləvi aksiyalara səbəb olduğu kimi, Ayların qətli isə inqilabı başladacaq! Aylar Həqqinin qətli İrandakı mövcud etiraz aksiyalarını inqilab kontekstinə keçirəcək. A. Həqqinin noyabrın 18-də Təbrizin Vadi-Rəhmət Qəbiristanlığında keçirilən dəfn mərasimi də bunu deməyə əsas verir.

Dəfn mərasimində molla rejimi əleyhinə “Azadlıq, ədalət, milli hökumət!” “Azərbaycan milləti, çəkəməz bu zilləti!”, “Biz ölməyə hazırıq, Babəkin sərbazıyıq! (əsgəriyik)” və “Hamımız Aylarıq, mübarizə davam edir!” şüarları səsləndirilib.

Nəticə etibarilə M. Əminin qətli İranda hicab hərəkatını başlatdığı kimi, A. Həqqinin qətli hərəkatı inqilaba keçirəcək.

Turan Rzayev
Politoloq




Bölməyə aid digər xəbərlər
{sape_links}{sape_article}