14:50 / 28-02-2024
Lavrov Türkiyəyə gedir
Professor: “Ermənistan dəhliz məsələsini gündəmdən çıxarmağa çalışır”
Tarix: 02-12-2023 18:25 | Bölmə: Slayd
Professor: “Ermənistan dəhliz məsələsini gündəmdən çıxarmağa çalışır”

“Ermənistan parlamentinin sədri Alen Simonyan bəyan etdi ki, Qarabağ məsələsi onlar üçün bitib və 15 gün ərzində Azərbaycanla sülh sazişi bağlana bilər. Hesab edirəm ki, əslində, Azərbaycan və Ermənistan üçüncü tərəfin iştirakı olmadan sərhəddə görüş keçirməklə ən düzgün yolu seçib. Aydın görünür ki, Ermənistan tərəfinə təzyiq edilir ki, sülh sazişi Moskvada imzalanmasın. Elə Azərbaycana da təzyiqlər edirlər. Fikrimcə, Azərbaycan və Ermənistan üçüncü tərəfləri narazı salmamaq üçün sərhəddə bir raya gəliblər”.

Bunu Reyting.az-a professor Cümşüd Nuriyev Azərbaycan və Ermənistan baş nazirlərinin müavinləri səviyyəsində görüşü şərh edərkən deyib.

C. Nuriyevin fikrincə, ilk olaraq iki ölkə arasında çərçivə sazişi, yəni sülh razılaşması olmalıdır ki, digər proseslərdə irəliləyiş əldə edilsin:

“Burada əsas iki vacib məsələ öndə olmalıdır:

birincisi, sərhədlərin razılaşdırılması -delimitasiya,

ikincisi, infrastrukturun - Zəngəzur dəhlizinin fəaliyyətə başlaması”.

C. Nuriyev əlavə edib ki, Ermənistan dəhliz məsələsini gündəmdən çıxarmağa çalışır, çünki 2020-ci ilin 10 noyabrında imzalanan üçtərəfli razılaşmaya əsasən dəhlizə nəzarəti Rusiya həyata keçirməlidir. İrəvan isə bunu arzulamır.

“Azərbaycan artıq İran üzərindən Naxçıvana yol çəkir. Yəni bizim alternativ yolumuz var”, - deyən C. Nuriyev xatırladıb ki, Ermənistan sərhəd məsələsində 1975-ci il xəritəsini təklif edir: “Çünki həmin dövrdə sərhəd dəqiqləşdirilməsi olmayıb. Azərbaycan ilə Ermənistan arasında sərhəd dəqiqləşdirilməsi əsasən 1920 və 1929-ci illərdə olub. Nəticədə Mehri Ermənistana verilib və Naxçıvanla Azərbaycanın arası kəsilib. Əlbəttə, ruslar bunu bilərəkdən, düşünülmüş şəkildə ediblər. Üstəlik, 1984-cü ildə Qazax rayonu istiqamətində Fərəhli meşəsindən torpaqlar Ermənistana verilib. Hesab edirəm ki, Azərbaycan tərəfi bu məsələləri də qoyur”.

Professorun sözlərinə görə, proses uzun çəkəcək, amma çərçivə sazişi imzalanmalıdır ki, Azərbaycan və Ermənistan bir platformaya keçə bilsin.

C. Nuriyevin iddisına görə, hazırda ABŞ və Avropa Rusiyanı Cənubi Qafqazdan çıxarmaq istəyir: “Bu da gərginliyi artırır. Amma biz burada Rusiya ilə həmişəlik qonşu olacağıq, odur ki, bizə Rusiya ilə qarşıdurma, eyni zamanda yeni torpaqlar uğrunda savaş da lazım deyil”.

C. Nuriyev sonda qeyd edib ki, artıq Rusiya növbəti qurban ölkənin -Moldovanın adını çəkib və Ermənistan da qurbanlardan biri ola bilər.

Y. QACAR
Reyting.az




Bölməyə aid digər xəbərlər
{sape_links}{sape_article}