16 tonluq xəzinə üzə çıxıb - Fotolar
Tarix: 11-06-2024 12:39 | Bölmə: Slayd
16 tonluq xəzinə üzə çıxıb

Çinin əzəmətli və sirli imperatoru Qinin məqbərəsindən 16 ton xəzinə tapılıb. Ehtimala görə həmin qiymətli əşyalar şahzadə Qaoya məxsus olub.

Reyting.az
"Arkeonews" nəşrinə istinadla bildirir ki, xəzinə Qin Şi Huanqdinin dəfn olunduğu və dünyanın ən böyük məqbərəsi hesab edilən qədim ərazidə aparılmış qazıntılar zamanı üzə çıxıb.

Yerli arxeoloqlar deyiblər ki, axtarışlar zamanı 16 ton ağırlığında xəzinə, yəni qiymətli sarkofaqı aşkara çıxarıblar.

Alimlərin ehtimalına görə, tapılmış tabut çox güman ki, imperatorun oğlu şahzadə Qaoya məxsusdur.



Çinli arxeoloqlar yeni tapılan bu xəzinənin 16 metr dərinlikdə basdırıldığını söyləyiblər. Sarkofaqda 6000 gümüş sikkə, zireh, nefrit, müxtəlif döyüş silahları, qızıl və gümüşdən düzəldilmiş dəvə fiqurları, eləcə də çox sayda mətbəx əşyaları dəsti olub. Alimlər vurğulayır ki, qədim zamanlarda Çində imperatorun və yaxud yüksək rütbəli döyüşçülərin yaxın qohumları da belə sərvətlərə malik idilər.

Ən maraqlı məqam dəfn üçün ayrılmış ərazi ilə bağlıdır. Arxeoloqlar qazıntıların getdiyi ərazidə imperatorun dəfni üçün ayrılmış sahənin 57 kvadrat kilometr olduğunu söyləyiblər. Onların sözlərinə görə, seysmik aktivlik təhlükəsi səbəbindən bu ərazinin böyük hissəsi hələ qazılmayıb. Alimlər belə təhlükəli seysmik ərazidə hansı məqsədlə məqbərə salındığının konkret izahını verməkdə çətinlik çəkirlər.



Xatırladaq ki, bu əzəmətli və monumental Çin imperatorunun türbəsi təxminən sayı 8000 nəfərə çatan atlının, yəni terrakotta döyüşçülərinin heykəllərinin, guya onlar tərəfindən məqbərənin qorunduğu üçün də çox məşhurdur. Buna görə də yeraltı şəhəri xatırladan bu məqbərə UNESCO-nun dünya mədəni irs siyahısına daxil edilib.

Onu da qeyd edək ki, iyunun 12-də "Netflix"-in təqdimatında İngiltərə-Çin kinematoqrafçılarının birgə lentə aldıqları "Terrakotta döyüşçülərinin sirləri" sənədli filmi nümayiş etdiriləcək. Bu filmdə tarixçilər, eləcə də arxeoloqlar qazıntılar başlayan tarixdən indiyə qədər imperatorun türbəsi ilə bağlı tapılıb əldə edilən bütün kəşflər haqqında, həmçinin yenicə tapılmış 16 ton ağırlığında xəzinə barədə çox maraqlı və ətraflı məlumatlar verməklə öz fikirlərini bölüşəcəklər.

Oqtay QORÇU




Bölməyə aid digər xəbərlər
{sape_links}{sape_article}