15:58 / 12-10-2019
Qarğış edən radikallar
Bakı Nəqliyyat Agentliyi ölkədə narazılıq yaradır - Fotolar
Tarix: 27-09-2019 10:07 | Bölmə: Slayd
Bakı Nəqliyyat Agentliyi ölkədə narazılıq yaradır

Bu ilin sentyabr ayının 25-də Azərbaycan prezidenti İlham Əliyev və birinci xanım Mehriban Əliyevanın iştirakı ilə Bakı Nəqliyyat Agentliyinin “Koroğlu” Nəqliyyat Mübadilə Mərkəzinin açılışı oldu. Qeyd edək ki, dövlət başçısı hələ illər öncə Bakı şəhərində ictimai nəqliyyatın müasir tələblərə uyğunlaşdırılması və intellektual idarə edilməsi üçün sərəncam imzalayıb, bununla bağlı müvafiq qurumlara tapşırıqlar verib. Eyni zamanda sərnişinlərin rahatlığı üçün ayrı-ayrı vaxtlarda ciddi işlər görülüb, müasir avtobusların alınmasına böyük məbləğdə vəsaitlər xərclənib.

İnsafən, görülən tədbirlər sayəsində əvvəlki illərlə müqayisədə şəhər nəqliyyatında müsbətə doğru ciddi dəyişikliklər baş verib. Amma aidiyyəti qurumların işə məsuliyyətsiz yanaşması və ayrı-ayrı məmurların şəxsi maraqlarını güdməsi son vaxtlar şəhər nəqliyyatının fəaliyyətindən narazılıqları artırır.

Sərnişinlərə süni problem yaradırlar

Reyting.az
xəbər verir ki, orta və ali məktəblərdə dərslərin başlanması ictimai nəqliyyatın fəaliyyətindən narazılıq edənlərin sayına təsir göstərib. Sərnişinlər bildirirlər ki, insanların marşrut avtobuslarından daha çox istifadə etdiyi səhər və axşam saatlarında ciddi problemlə üzləşirlər. Hətta ayaqüstə durmaq üçün yer olmadığından (125 saylı marşrut da belələrindəndir -red.) növbəti bir neçə marşrutu gözləmək məcburiyyətində qalırlar. Bu da işə və dərsə tələsən sərnişinlərə əlavə problemlər yaradır. Şəhər nəqliyyatına məsul olan Bakı Nəqliyyat Agentliyi (BNA) isə sərnişinlərə yaratdığı süni problemin həllinə biganə yanaşır, günün həssas saatlarında marşrutların qrafikini sıxlaşdırmaq istəmir.

Tramvayı, trolleybusu bərpa edin!

Bakı Nəqliyyat Agentliyi ölkədə narazılıq yaradır
E. Bayramlı

BNA-nın fəaliyyətindən narazı olan çoxsaylı şəxslərdən biri də “Altay” Araşdırmalar Mərkəzinin rəhbəri Elçin Bayramlıdır. Mərkəz rəhbərinin sözlərinə görə, Bakının nəqliyyat sistemi daha da təkmilləşdirilməli, marşrutların sayı artırılmalıdır: “Tramvayı, trolleybusu bərpa edin, avtobus marşrutlarının qəsdən azaltdığınız sayını artırın. Paytaxtın cənubdan yeganə giriş olan Yeni Salyan şossesində cəmi bir marşrut işləyir, o da dəmiryol vağzalına qədər, başqa yerə getmək üçün gərək, 2-3 avtobus dəyişəsən. Bu isə sərnişinlərin əlavə vəsait xərcləməsinə və haqlı narazılığına səbəb olur”.

Agentlik sərnişinlərin “cibinə girir”

E. Bayramlı bildirir ki, şəhərin əksər ərazisində ictimai nəqliyyat sistemi tələblərə cavab vermir. Bilərəkdən ictimai nəqliyyatın sayını kəskin şəkildə azaldıblar ki, sərnişinlər 1 əvəzinə 2-3 marşruta pul ödəməyə məcbur olsun. Yəni, müvafiq qurum bu yolla sərnişinlərin “cibinə girir”.

BNA-nın yaratdığı narazılıqlar marşrut avtobusları və sərnişin daşınması ilə məhdudlaşmır. Agentlik əməkdaşlarının ayrı-ayrı avtomobil sahiblərinə yazdığı cərimələr də etirazlara səbəb olur. Hətta bəzi sürücülər iddia edirlər ki, 1-2 dəqiqəlik dayanmaya görə onlara qanunsuz cərimə yazırlar.

Bakı Nəqliyyat Agentliyi ölkədə narazılıq yaradır

E. Bayramlı isə bildirir ki, BNA paytaxt küçələrində avtomobillərin dayanmasını rəsmi şəkildə qadağan edib: “Şəxsi avtomobilinlə bir neçə dəqiqəlik dayanıb sərnişin düşürür ya mindirirsən, BNA-nın əməkdaşları dərhal 20 manat cərimə yazırlar”.

Mərkəz rəhbəri iddia edir ki, BNA-nın əməkdaşları öz “əməlləri” ilə vaxtilə sürücülər arasında narazılıq yaratmış Nəqliyyat Nazirliyinin “qoçuları”ndan da amansızdırlar: “Bu səlahiyyət DYP-dən alınıb BNA-ya veriləndə insanlar sevinirdi, amma belə işlərə sevinmək lazım deyil, çünki həmişə yenisi əvvəlkindən betər olur”.

Yeni dayanacaqlar təşkil olunmalıdır

Ekspertin sözlərinə görə, Bakı dünyada avtomobillərin dayanması faktiki olaraq qadağan edilən bəlkə də yeganə şəhərdir. BNA-nın tələbindən belə anlaşılır ki, avtomobil daim hərəkətdə olmalıdır, 24 saat ərzində dayana bilməz: “Bu rüsvayçılığa son qoyulmalıdır. İnsanlara haqsız cərimə yazmaqdansa, şəhərdə “at oynadan” avtobusları, yük maşınlarını, avtoşları cərimələmək lazımdır”.

Ekspert təklif edir ki, şəhərdə yeni dayanacaqlar təşkil olunmalıdır: “Beş-altı dayanacaq var, hamısı da pullu. Qalan yerlərdə dayanmağı qadağan ediblər”.

E. Bayramlının da adı bu yaxınlarda BNA-nın “cərimə dəftəri”nə düşüb: “Qəza işıqlarını yandırmışdım, özüm də avtomobildəydim, bir-iki dəqiqəlik yolun kənarında dayanmışdım, çünki adam gəlib minməlidir və yol hərəkətinə mane olmurdum. Buna baxmayaraq, BNA əməkdaşları dərhal cərimə yazıblar”.

Hətta E. Bayramlının avtomobilini saxladığı yerdə avtobus dayanacağı da olmayıb: “Hər gün minlərlə adama cərimə yazırlar, hətta işıqforda dayanana, sərnişin düşürənə, maşını xarab olana da. Belə amansızlığın tarixdə analoqu yoxdur”.

Mərkəz rəhbəri sonda qeyd edib ki, dar küçələri bağlayanlara, 2-ci, 3-cü cərgələrdə avtomobil saxlayanlara qarşı tədbir görmək əvəzinə beşzolaqlı yolun ən sağında 1-2 dəqiqə dayanan və hərəkətə mane olmayana cərimə yazmaq ədalətsizlikdir, insanlara qənim kəsilməkdir.

Elxan KAMAL
Reyting.az

P.S. Redaksiya Bakı Nəqliyyat Agentliyinin məsələyə münasibətinə yer ayırmağa hazırdır.

скачать dle 10.5фильмы бесплатно




Bölməyə aid digər xəbərlər
{sape_links}{sape_article}