Yeni büdcə layihəsində şəffaflıq tam təmin edilməyib - Foto
Tarix: 12-11-2019 18:53 | Bölmə: Slayd
Yeni büdcə layihəsində şəffaflıq tam təmin edilməyib

“Büdcə layihəsi hazırlanarkən şəffaflıq və ədalət prinsipi tam təmin edilməyib. Azərbaycan Prezidenti dəfələrlə vurğulayıb ki, büdcə layihələri qənaətlə və səmərəli istifadə olunmalı, investisiya layihələri şişirdilməməlidir. Təəssüf ki, biz millət vəkilləri bu məsələdə Prezidentə kömək etmək imkanı xaricindəyik”.

Reyting.az
xəbər verir ki, bu fikirləri Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev Milli Məclisin plenar iclasındakı çıxışı zamanı səsləndirib.

Millət vəkili bildirib ki, “Büdcə sistemi haqqında” qanuna zidd olaraq dövlət investisiya proqramının layihəsi büdcə zərfinə daxil edilməyib: “Ona görə də bizim neçə obyekt tikiləcəyi, hansı obyektin tikintisinə nə qədər vəsait ayrılması barədə ən kiçik məlumatımız belə yoxdur”.

Q. Həsənquliyev deyib ki, Hesablama Palatası 34 dövlət proqramı, 4 tədbirlər proqramı, 7 tədbirlər planı ilə əlaqədar 15 icraçı quruma məktub göndərib və icraçı qurumlar tərəfindən verilən təkliflər əksər hallarda ümumi şəkildə əsaslandırılıb, konkret hədəflər göstərilməyib: “Hesablama Palatasının rəyində bu cür qeyd olunur. Bununla Hesablama Palatası əlsində, Prezidentin dediklərini təsdiq edib. Söhbət büdcə xərclərinin 37,9 faizini təşkil edən 10 milyard 209, 9 milyon manatın xərclənməsindən gedir. Bununla yanaşı gələn il 951 milyon manat xarici kredit hesabına dövlət əsaslı vəsait qoyuluşu nəzərdə tutulur. Xarici borc üzrə büdcədən 1 milyard 828 milyon vəsaitin geri qaytarılması göstərilib. Biz bilirik ki, götürülən kreditlər də əsasən tikintiyə sərf olunur. Ona görə də dövlət zəmanəti ilə götürülən kredit müqavilələri Milli Məclisdə təsdiq olunmalıdır. Çünki biz, o pulları büdcədən qaytarırıq. Əlbəttə, həmin pulların səmərəli istifadə olunduğu sahələr var. Məsələn, mən bir neçə gün bundan əvvəl APA İnformasiya Agentliyinin yaydığı bir məlumatla tanış oldum. Dünya İqtisadi Forumunun 2019-cu il üçün dərc etdiyi qlobal rəqabətlilik hesabatında Azərbaycan Dəmir Yollarının səmərəlilik indeksi 70,8 faiz olub. Bu sahədə islahatlar real olaraq həyata keçirilir və hər bir vətəndaşı məmnun edir.

Amma “Azərenrji”yə dəfələrlə artıq vəsait yönəldilib. Buna baxmayaraq keçən ilin yayında Mingəçevirdə baş verən qəza nəticəsində ölkənin yarısı qaranlığa qərq oldu. Biz xarici dövlətlərdən elektirik enerjisi almaq məcburiyyətində qaldıq. Ümid edirəm ki, yeni rəhbərlik orada da köklü dəyişikliklərə nail olacaq”.

Yeni büdcə layihəsində şəffaflıq tam təmin edilməyib
Q. Həsənquliyev

Q. Həsənquliyev xatırladıb ki, “Duinq Biznes” hesabatında Azərbaycan 190 ölkə arasında 34-cü yeri tutur: “Amma bu ilin 9 ayında əsas kapitala investisiyaların həcmində 49,4 faiz paya malik olan sənaye investisiyaları 10 faiz, xarici investisiyaların həcmi 27,6 faiz azalıb. Bu da onu göstərir ki, biz iqtisadi sferanı tənzimləyən, biznes mühitini yaxşılaşdıran qanunlar qəbul etməklə yanaşı qanunların aliliyini təmin etmək məqsədilə məhkəmə hüquq islahatlarını da dərinləşdirməliyik”.

Millət vəkilinin sözlərinə görə, təqdim olunan sənədlərdən görünür ki, neft hasilatı 2,8 faiz azalıb, qaz hasilatının 29,3 faiz artması isə ümumi neft-qaz sektorunda yalnız 1 faizlik artımı təmin edib: “Neft sektoru büdcə gəlirlərinin 56,1 faizini təşkil edir. Əgər neftin qiyməti və hasilatı azalacaqsa, biz gələcəkdə maliyyə problemləri ilə üz-üzə qalacağıq. Mən hesab edirəm ki, bundan yayınmaq üçün qeyri-neft sektorunun və özəl sektorun inkişafına xüsusi diqqət yetirməliyik. Dövlət biznes fəaliyyəti ilə məşğul olmamalıdır. İqtisadiyyatda proteksianizmə son qoyulmalıdır. Biz böyük özəlləşməyə getməliyik. Gələn il özəlləşmədən büdcəyə 62 milyon manat vəsaitin daxil olması proqnozlaşdırılır ki, bu da çox kiçik rəqəmdir. Məsələn, bu günlərdə informasiya və kommunikasiya texnologiyalarının tətbiqi üzrə fəaliyyət göstərən özəl sektorun nümayəndələri mənə müraciət edərək deyirlər ki, Nəqliyyat, Rabitə və Yüksək Texnologiyalar Nazirliyi dövlətə məxsus kabel-kanalizasiya qurğularından istifadəyə “Bakı Telefon Rabitəsi” MMC və “Aztelekom” MMC vasitəsilə qadağa qoyub. Özləri isə artıq müasir dünyada istifadə olunmayan və köhnəlmiş qurğulardan istifadə etməklə keyfiyyətli xidmət göstərə bilmirlər. Söhbət 21 özəl şirkətə yaradılan problemlərdən gedir. Hesab edirəm ki, müvafiq strukturlar bu məsələni aydınlaşdırıb tədbir görəcəklər”.

Q. Həsənquliyev sonda qeyd edib ki, yeni büdcədə islahatlarla bağlı xərclərə 878 milyon manat, beynəlxalq və ölkə səviyyəli tədbirlərin keçirilməsinə 226 milyon manat, Prezidentin Ehtiyat Fonduna isə 300 miylon manat vəsait ayrılır: “Biz bu vəsaitlərə nəzarət edə bilmirik.

Sonda mən deputat həmkarımın o fikrini də dəstəkləyirəm ki, hökumət siyasi partiyalara, QHT-lərə və KİV-lərə də ayrılan vəsaiti artırmalıdır”.

Reyting.az
скачать dle 10.5фильмы бесплатно




Bölməyə aid digər xəbərlər
{sape_links}{sape_article}