Əli Məsimli: “Təhlükəsizlik yastığımız kifayət qədər qalındır”
Tarix: 10-08-2020 12:44 | Bölmə: Slayd
Əli Məsimli: “Təhlükəsizlik yastığımız kifayət qədər qalındır”

“Avronun məzənnəsində cüzi qiymət artımı baş verib. Əslində dünya iqtisadiyyatında aparıcı rolu dollar oynayır. Avropa isə son dövrlər güc toplamaqla alternativ kimi çıxış etməyə çalışır”.

Bunu Reyting.az-a Milli Məclisin deputatı Əli Məsimli indiki iqtisadi şərtlər daxilində devalvasiyanın mümkün olub-olmaması ilə bağlı suala cavabında deyib.

Tanınmış iqtisadçının sözlərinə görə, avro və dollar dünya iqtisadiyyatındakı rolunda müxtəlif iqtisadi rıçaqlardan istifadə etməklə bu rəqsi başlayır: “Avro bahalaşanda dollar ucuzlaşır, dollar bahalaşanda isə avro ucuzlaşır. Odur ki, indiki zamanda avronun bahalaşması dolların ucuzlaşması ilə müşahidə olunur. Amma dolların ucuzlaşmasında müşahidə olunan məqamlar heç də milli valyutalara şamil edilən məsələ deyil. Bunlar artıq ölkə iqtisadiyyatının durumu, onun tədiyə balansında saldonun müsbət və ya mənfi olması, həmin ölkənin daha çox ticarətdə olduğu ölkələrlə münasibəti, həmin ölkələrin milli valyutasında dəyişikliklər və digər amillərdən asılıdır”.

Deputatın fikrincə, Mərkəzi Bank və digər qurumların manatın nisbi sabitliyini saxlamaq üçün kifayət qədər imkanları var: “Eyni zamanda bizim təhlükəsizlik yastığımız kifayət qədər qalındır, bəlli valyuta ehtiyatlarımız var”.

Ə. Məsimli diqqətə çatdırıb ki, bu ilin aprel-may aylarında neftin qiyməti kəskin ucuzlaşarkən, hətta 15-16 dollar səviyyəsinə enərkən, devalvasiya məsələsi aktuallaşıb: “Amma neftin qiymətinin ucuzlaşması qısa müddətə davam etdi. Bütün hallarda bu durum milli valyutamızın ucuzlaşmasına təsir etmədi. Bu, daha çox tədiyə balansında mənfi saldonun azalmasına təsir edə bilərdi. Bu baxımdan aprel-may aylarında neftin qiymətinin 15 dollara enməsindən sonra Mərkəzi Bank və digər qurumların manevrləri sayəsində devalvasiya olmadı”.

Deputat xatırladıb ki, hazırda bir barrel neftin qiyməti 40 dolların üzərindədir: “Əgər büdcədə neftin bir barrelinin qiyməti 35 dollardan götürülübsə, burada çoxvariantlı ssenarilərdən istifadə etmək lazımdır. Zənnimcə, neftin qiyməti 35 dollar olarsa, bu zaman ödəniş balansında mənfi saldo yaranacaq. Burada Mərkəzi Bankın və digər qurumların manevr imkanları istiqamətində əlavə tədbirlər görməsi vacib olacaq. Bu, Mərkəzi Bankın gücü daxilindədir və manatın sabitliyini saxlamaq üçün işlərin davam etdirilməsi mümkündür”.

Ə. Məsimli orta səviyyəli proqnozlardan çıxış edərək, diqqətə çatdırıb ki, əgər neftin qiyməti 40 dolların ətrafında olsa, bu zaman tədiyə balansında poblem yaranmır: “Bu baxımdan neftin qiymətinin 40 dollardan yuxarı olması manatın sabitliyinin davam etdirilməsinin neftlə bağlı hissələrini gücləndirmiş olacaq. Nəzərə alaq ki, Neft Fondunun və Mərkəzi Bankın kifayət qədər ehtiyatı var və bu ehtiyatların kiçik hissəsini sərf etməklə xarici valyutaya tələbat yaranan zaman manevr imkanlarını artıracaq. Hesab edirəm ki, proqnozlaşdırılması mürəkkəb olan vəziyyət müşahidə edilsə də, Mərkəzi Bank və aidiyyəti qurumlar manatın sabitliyini qoruyub saxlamağa hazırdırlar”.

Reyting.az




Bölməyə aid digər xəbərlər
bütün xəbərlər
bütün xəbərlər
{sape_links}{sape_article}