SOCAR-da kütləvi ixtisar: 10 minə yaxın şəxs işsiz qalacaq
Tarix: 09-06-2021 13:49 | Bölmə: Slayd
SOCAR-da kütləvi ixtisar: 10 minə yaxın şəxs işsiz qalacaq

“May ayında OPEC+ ölkələrinin neft hasilatının azaldılması ilə əlaqədar qərarı oldu. Onda qeyd etdim ki, Azərbaycanın neft sahəsində çalışan 5 mindən yuxarı insan işsiz qalacaq. Amma proses göstərdi ki, daha çox insan ixtisara düşür”.

Bunu Reyting.az-a Neftçilərin Hüquqlarını Müdafiə Təşkilatının (NHMT) rəhbəri Mirvari Qəhrəmanlı deyib. O bildirib ki, neftçıxarma sahəsində ixtisarlar sürətlə davam edir:

“Təşkilatımız tərəfindən “SOCAR-da idarəetmə islahatları” (nhmt-az.org): Müşahidə Şurası şirkətdə nəyi dəyişəcək? barədə araşdırma aparılmış və bununla bağlı iqtisadiyyat naziri, SOCAR-ın Müşahidə Şurasının sədri Mikayıl Cabbarova da təkliflər vermişik.

Müşahidə Şurasının üzərinə ştat cədvəlinin yenidən təsdiqi və bir sıra öhdəliklər də qoyulub. Baxmayaraq ki, SOCAR ağır vəziyyətdədir, amma Müşahidə Şurası özünün mükafalandırılmasını da nəzərdə tutub. Bu vəziyyət şirkətin buraxdığı səhvlərin nəticəsidir.

İldə 6 milyon ton neft çıxardan SOCAR-ın 50 mindən yuxarı işçisi var idi. Bundan əlavə, o qədər qohumbazlıq olur ki…

SOCAR-da bir nəfərə 9 menecer düşür. Yəni bir nəfər işçi üzərində 9 nəfər dayanır. SOCAR-ın həddindən artıq ştatı var. Bir-birini təkrarlayan şöbələr, kimlərdən ötrüsə yaradılmış MMC-lər... SOCAR-ın özünün şöbəsi varsa, ona paralel başqa MMC-nin yaradılmasına nə ehtiyac? Məsələn, ekologiya ilə əlaqədar departament var, ekologiya idarəsi, Ekol Birgə Müəssisəsi var, bununla yanaşı idarə və müəssisələrdə də ekoloji şöbələr yaradılıb. OPEC+ qərar verənə qədər SOCAR-da ixtisarların aparılması vacib idi”.


M. Qəhrəmanlı

Mirvari Qəhrəmanlı əlavə edib ki, SOCAR-da 2015-ci ilin siyasəti təkrarlanır: “O vaxt işçinin qarşısına 3 şərt qoyurdular. Bu, indi də təktrarlanır: ya sən ixtisara düşürsən, ya əmək haqqının 5 mislini alıb ərizə yazıb gedirsən, yaxud da ərizə yazıb proqrama qoşulursan və 1 il ərzində səni işlə təmin edirik. Maaşının 5 mislini almaq üçün ərizə yazıb gedənlər həmkarlar təşkilatı ilə razılaşdırılmış bir prosesdir. Burada işçi deyir ki, mən narazı deyiləm və gələcəkdə SOCAR və tərəfdaşları tərəfindən elan olunan müsabiqədə iştirak etməyəcəm. Bu halda işçini ömürlük SOCAR və onun tərəfdaş şirkətlərində işləməkdən məhrum edirlər. Proqramda isə göstərilir ki, il ərzində 50 faiz maaşını alacaqsan və il ərzində işlə təmin olunacaqsan. 2015-ci ilin təcrübəsi göstərir ki, bu da yalandır”.

M. Qəhrəmanlının sözlərinə görə, SOCAR-da ixtisarlar kütləvidir, davam edir və bu qurumdan 10 minə yaxın işçi kənarlaşdırılacaq:

“Ötən həftədən nəqliyyat idarəsindəki işçilərin ixtisarı başlayıb və bu ixtisarlar ilin sonuna kimi davam edəcək. Narahatlığım odur ki, ixtisarlar düzgün və ədalətli, əmək qanunvericiliyinə uyğun aparılmır. Qohum-əqrəba üçün iş yerləri düzəldilir, onlardan ixtisara düşəni yoxdur. SOCAR-da qohumlar üçün yaradılmış artıq ştatlarda hələ ki, ixtisarlar olmur”.

Hüquq müdafiəçisi qeyd edib ki, NHMT tərəfindən 2018-ci ildə SOCAR-ın digər böyük şirkətlər kimi biznes qurumuna çevrilməsi üçün Energetika nazirliyinə Təkliflər paketi təqdim olunub. Bildiriblər ki, qazma, tikinti, nəqliyyat SOCAR-ın tərkibindən çıxarılmalı və müqavilə əsasında fəaliyyət göstərməlidir.

M. Qəhrəmanlının iddiasına görə, SOCAR rəhbərliyinin gülməli bir siyasəti var: “Bilmirəm ətrafdakıları küt hesab edirlər, ya kütləri qabağa verirlər. Mən deyirəm, ixtisardır, onlar deyir ki, optimallaşmadır.

Ölkə başçısı da 2020-ci ilin martında çıxışında dedi ki, pandemiya dövründə ixtisarlar olmasın və buna üç nazirlik də qoşuldu. Bütün ixtisara gedənləri aldadıb ərizə yazdırırlar ki, proqrama qoşul. Onlara ərizəsini yazdırıb işdən çıxarır, sonra da deyirlər ki, biz ixtisar etməmişik. Bu dəqiqə belə bir siyasət aparırlar və bu siyasətdə Mikayıl Cabbarov da günahkardır. Aparılan siyasət şəffaf deyil. Neft şirətinin birdəfəlik strukturu formalaşmalıdır. Çünki orada çalışanlar stress keçirir, əziyyət çəkirlər”.

Təşkilat rəhbərinin sözlərinə görə, yaradılan Müşahidə Şurası da yenilik edə bilmir: “Orada olanların arasında sahə üzrə peşəkar mütəxəssis yoxdur. O qədər mütəxəssisi işdən qovublar ki… Bir deyən yoxdur ki, xarici şirkətlərin sturukturuna, diqqət yetirin.

Şirkətdən bir vitse-prezidenti işdən çıxartsalar nə qədər işçi sayı azalacaq. O qədər MMC-lər yaradıblar, niyə? Əgər şirkətin özünün qazma tresti varsa niyə yeni MMC yaradırsınız?

Müşahidə Şurası yarananda bunları analiz etməli idi. Ötən ildən yaranmasına baxmayaraq hər hansı irəliləyiş görmürük. Elə həmin SOCAR-dır! Hələ qorxuram Müşahidə Şurasında olanların da ailə üzvləri üçün ştat açalar”.

Hüquq müdafiəçisi sonda diqqətə çatdırıb ki, SOCAR rəhbərliyi fəhləni, qazmaçını ağlada-ağlada işdən çıxarır. Bu vəziyyət dərindən araşdırılmalı, ölkədə müzakirə mövzusuna çevrilməlidir.

Reyting.az




Bölməyə aid digər xəbərlər
bütün xəbərlər
{sape_links}{sape_article}